7 Nɨkik keikei mɨn, iəu iəsəteiən nəghatiən vi kəti kəm təmah məmə onəkotol, kəni mətəu iətətei in əuas[r] iətəm nəmotos rəkɨs e nətuəuiniən, nian nəmotətəu nanusiən təuvɨr;[s] nəghatiən əuas u in nəghatiən nɨnotəhrun rəkɨs məmə nəkotolkeikei itəmah mɨn. 8 Mətəu e neruhiən kəti mɨn, nəghatiən u iətəm iətətei tatuvnə o təmah məmə onəkotol, in tətəuhlin məmə nəghatiən vi,[t] mətəu-inu kɨneruh e suaru vi kəti e nəmiəgəhiən rəha Iesu mɨne rəhatəmah. Mətəu-inu rəueiu, napinəpuiən tɨnətagɨm,[u] konu nəhagəhagiən pəhriən[v] tɨnətasiə rəkɨs.[w]

9 Kəni iətəmi u tətəni məmə in tətatɨg e nəhagəhagiən mətəu tətəməki e pian,[x] in tətatɨg əhanəh e napinəpuiən.[y] 10 Iətəmi u iətəm tolkeikei pian, in tətəhtul e nəhagəhagiən,[z] kəni nati kəti tɨkə e nɨkin məmə otapitətəl lan, morin.[aa] 11 Mətəu iətəmimi u iətəm tətəməki e pian, in tətatɨg e napinəpuiən,[bb] kəni mətan e napinəpuiən, kəni məruru ikɨn tatuvən=pən ikɨn, mətəu-inu napinəpuiən tətəuveg nəhmtɨn.[cc]

15 Sotolkeikeiən nəhue nɨftəni[ii] uə natimnati mɨn rəha nəhue nɨftəni. Nəmə iətəmi kəti tatolkeikei nəhue nɨftəni, kəni nolkeikeiən rəha Tatə Uhgɨn təsatɨgiən e nɨkin.[jj] 16 Mətəu-inu natimnati rəfin u rəha nəhue nɨftəni, ilah u, kəsotsɨpəniən o Tatə Uhgɨn, mətəu kautsɨpən e nəhue nɨftəni əmə. Natimnati rəfin u rəha nəhue nɨftəni, ilah u, nolkeikei pɨkiən natimnati rəha nəhuvegɨn əmə,[kk] kəni nolkeikeiən natimnati iətəm tatiuvirəkɨs nəhmtɨtəmi,[ll] mɨne nəfəriən o rəhalah nautə, mɨne nepətiən. 17 Kəni nəhue nɨftəni u otəpanɨkə. Kəni nolkeikei pɨkiən nautə mɨn otəpanɨkə. Kəni nolkeikei pɨkiən o noliən mɨn rəha nəhue nɨftəni iətəm kautiuvi nətəlɨgiən rəha nətəmimi otəpanɨkə.[mm] Mətəu iətəmimi iətəm tatol nəuia Tatə Uhgɨn,[nn] in otətatɨg itulɨn.

18 Kəlkələh mɨn, kɨnotevɨg=pən e naunun nian.[oo] Nəmotətəu məmə Tɨkɨmɨr rəha Krɨsto[pp] otuva.[qq] Kəni rəueiu tɨkɨmɨr mɨn rəha Krɨsto tepət, kɨnəhuva rəkɨs.[rr] Tol lanəha, kitah kotəhrun məmə, kɨnotevɨg=pən e naunun nian. 19 Nətəmi mɨn u, kəmotəpəh rəhatah niməfaki mɨn[ss] mətəu ilah səniəmə rəhatah agɨn mɨn, aupən agɨn mətəuarus=pa u rəueiu mɨne. Nəmə rəhatah agɨn mɨn, kəməsohietiən e tah. Mətəu ilah kəmohiet e tah, kəni tətəgətun məmə ilah səniəmə rəhatah mɨn əhruahru.

20 Mətəu itəmah ko, Iətəmi Əhruahru, in təmalɨku=pɨnə[tt] kəm təmah e Narmɨn Rəha Uhgɨn,[uu] kəni itəmah rəfin nəkotəhrun nati u. 21 Iətətei nati u kəm təmah, səniəmə nəkotəruru nɨpəhriəniən, mətəu itəmah nɨnotəhrun rəkɨs nɨpəhriəniən, kəni motəhrun məmə nɨpəhriəniən təsəuəiən e neiuəiən.[vv] 22 ?Pəh u in ieiuə? Iətəmimi u iətəm tətəni məmə Iesu səniəmə in Krɨsto iətəm Uhgɨn təməni məmə otahli=pa. Iətəmimi u inu, tɨkɨmɨr rəha Krɨsto. In təsəniən nɨpəhriəniən e Tatə Uhgɨn mɨne Nətɨn.[ww] 23 Iətəmi təsəniən nɨpəhriəniən e Nətɨn təruru nosiən Tatə. Iətəmi tətəni nɨpəhriəniən e Nətɨn, in tatos mɨn Tatə Uhgɨn.[xx]

24 Otaskəlɨm tiəkɨs mautol nati nak nəmotətəu e nətuəuiniən, nian nəmotətəu nanusiən təuvɨr. Nəmə nautol, kəni itəmah onəkotəhtul=pən e Nətɨn, mɨne Tatə Uhgɨn.[yy] 25 Kəni nati u inu, nəmiəgəhiən itulɨn, in təməni əskasɨk məmə otəfa kəm tah.

26 Iətətei nəghatiən mɨn u kəm təmah mətəni pətɨgəm nətəmimi mɨn u nətəm okotiuvi rəkɨs itəmah.[zz] 27 Mətəu Narmɨn Rəha Uhgɨn iətəm nəmotos e Krɨsto,[] in tətatɨg əhanəh e nɨkitəmah. ?Tol lanəha, pəh mɨn təhrun nəgətuniən nati vi kəti kəm təmah? Narmɨn Rəha Uhgɨn tətəgətun natimnati rəfin kəm təmah,[] kəni nəgətuniən əha rəhan, in nɨpəhriəniən, səniəmə neiuəiən. Tol lanəha, otəhtul=pən əskasɨk e Krɨsto,[] təhmen=pən əmə məmə Narmɨn rəhan təməgətun itəmah məmə nəkotol.

28 Kəni rəueiu əha, kəlkələh mɨn, otəhtul=pən lan, məmə nian in otuva[] kəni kitah kəsotəgɨniən məsotaulɨsiən e nəhmtɨn[] e rəhan nuvaiən.

29 Nəmə nəkotəhrun məmə in təhruahru,[] onəkotəhrun əsas məmə nətəmimi rəfin nətəm kautol noliən əhruahru, ilah u, nenətɨn mɨn.[]

<- 1 JON 11 JON 3 ->