Hiprus Naoa itəm kəməte tuwɨn kəm noanol rəha Isrel Nəghatən əkuəkɨr rəha naoa u Hiprus ?Pah təməte naoa u? Kitat kotəruru məmə pah təməte naoa u. Etəm təməte naoa u təməsəteən nərgɨn e naoa. Etəm təməte təməsəplanən Iesu Kristo. Məto təməto Namnusən Təwɨr o netəmim pɨsɨn-pɨsɨn mɨn itəm kəmotəplan Iesu. Kən suah u, in tɨtun nəghatən rəha Oltesteman, ne nolən rəha netəm Isrel aupən. Okəm-naka Panapas o Apolos təməte naoa u, məto-inu ilau kiatun nat tahmen e suah u. Kən ilau iahgin e niməfak. Netəmim neen, nɨkilat təht məmə Pol təməte, məto nɨkitat təsəhtən nəhlan məto-inu e leta tepət rəha Pol, təmələhəu-pən nərgɨn, məto nərgɨn tɨkə e naoa u. ?Təməte tatuwɨn kəm pah? Təməte naoa u kəm netəm Isrel itəm kotahatətə e Kristo Iesu, məto okəm-naka neen kəmotɨtəlɨg-pən noan məsɨn e nolən rəha nətəu-pənən Lou rəha Moses. Okəm-naka ilat kəsotɨtun wɨrən nəukətɨ Namnusən Təwɨr. ?Nəmegəhən tahro nulan nian təməte? E nian əh, netəm Isrel koatərəkɨn netəm Isrel itəm koatahatətə e Iesu Kristo. Nɨkilat təpou ron. Təwɨr məmə ilat okotəto məmə nahatətəən rəhalat in nɨpahrienən, kən Iesu in Kristo itəm Uhgɨn təmən məmə otahl-ipa. ?Təməte naoa u o naka? E nian əh netəmim neen e niməfak, nɨkilat təht məmə nolən rəha nətəu-pənən Lou rəha Moses e Oltesteman, in ilɨs taprəkɨs-in nolən rəha nahatətəən e Iesu Kristo. Məto nolən mɨn nəhlan rəha Oltesteman, ilat narmɨn mɨn əm rəha natɨmnat mɨn itəm Iesu otol. Kəmotəte naoa u məmə netəmim okotəplan motɨtun məmə Iesu Kristo in ilɨs taprəkɨs-in natɨmnat rafin, tahmen-pən e ien mɨn, ne nagelo mɨn, ne Moses, ne Aron ne pris mɨn. Nolən rəha nahatətəən e Iesu Kristo in təwɨr pɨk taprəkɨs-in nolən rəha nətəu-pənən lou rəha Moses. Inu, in nɨpahrienən məto-inu natɨmnat rafin rəha Oltesteman təmuwa mol nɨpahrienən lan e Iesu Kristo. Kən nɨmɨsən rəhan in tahmen əm məmə otos-irəkɨs nolən rat mɨn rəha etəmim.
1Kristo təmol əp Uhgɨn kəm itat 1 Aupən ikɨn, Uhgɨn təmatən[a] nəghatən rəhan, məto təmatələhəu əm e səpag kəm tɨpɨtat mɨn e nian tepət ne suatɨp pɨsɨn pɨsɨn mɨn. 2 Məto roiu əh, kɨnotegu-pən e namnun nian,[b] kən tɨnatəghat ətuatɨp əm kəm kitat e Nətɨn, itəm in təmɨləs-ipər məmə otərəmərə e nautə rafin rəha tata rəhan.[c] Kən e Nətɨn əh, in təmol natɨmnat rafin e nətueintən.[d] 3 Nətɨ Uhgɨn in nəhag-əhagən rəha nəwɨrən ne nəsanənən rəha Uhgɨn.[e] In təməru ətuatɨp rəhan tata e natɨmnat rafin.[f] In tatəmɨk ətain natɨmnat rafin e nəsanənən rəha nəghatən rəhan.[g] Nian in təmɨmɨs rəkɨs məmə otafəl rəkɨs rəhatat nolən rat mɨn,[h] kən in tatəpələh e rəhn matɨp kig, ikɨn rəha nepətən ne nɨsiaiiən, e nego e neai.[i] Nətɨ Uhgɨn u, in ilɨs taprəkɨs-in nagelo mɨn 4 Tol nəhlan, Uhgɨn təmɨləs-ipər rəkɨs Nətɨn u, kən in ilɨs taprəkɨs-in nagelo mɨn, tahmen-pən məmə nərɨg u itəm Uhgɨn təmos-ipən kəm in, in ilɨs pɨk taprəkɨs-in nərgɨlat rafin.[j] 5 Uhgɨn təməsən agɨn-əhən kəm nagelo kit rəhan məmə, “Ik nətɨk. Roiu enuwa rəham tata ətuatɨp.”[k] Məto in təməghat nulan kəm Iesu. Kən Uhgɨn təməsən agɨn-əhən kəm nagelo kit məmə, “Io tata rəham, kən ik onəkuwa nətɨk.” Məto in təməghat nəhlan kəm Iesu.[l] 6 Məto e nian Uhgɨn tahl-ipa Nətɨn itəm təmaupən maiir[m] tuwa e nətueintən, kən in tən məmə, “Pəs rəhak rafin nagelo mɨn, nɨpɨnəgɨlat taru nɨsɨp e nɨsiaiiən, motənwiwi in.” 7 Nian Uhgɨn tatəghat-in nagelo mɨn, in tatən məmə, “Io emol rəhak nagelo mɨn ilat kotahmen e nɨmətag itəm tətan ikɨn mɨn rafin, matol rəhak wək. 8 Məto təmatəghat-in Nətɨn kən matən məmə, “Uhgɨn, rəham nərəmərəən otətatɨg lilɨn, namnun tɨkə. Kən nətuatɨpən in nəlnal rəha nərəmərəən rəham. 9 Ik nəmolkeike əm nətuatɨpən kən metəhau nolən eko-eko mɨn. Tol nəhlan, io u, rəham ətuatɨp Uhgɨn, io emələhəu aupən ik, kən ik ilɨs e ik mɨn neen. Kən emol-pən oel e rəhm-kapə, tatəgətun məmə ik kig, matol nɨkim tagien taprəkɨs-in ik mɨn neen.”[p] 10 Kən Uhgɨn tatən-ipən mɨn kəm in məmə, “Iərəmərə, e nətuounən, ik nəmol nətueintən u, mol in təskasɨk. Kən e nelməm atɨp əm, ik nəmol natɨmnat rafin itəm kotatɨg e neai. 11 Natɨmnat mɨn u rafin, ilat okəpanotɨkə, ilat okotoas tahmen e nɨməhan itəm təməmnəmɨt, məto ik nətatɨg lilɨn əm.[q] 12 Ik onakaiu-aiu ilat, tahmen əm məmə etəmim təmaiuaiu rəhan nɨməhan. Ik onakəuhlin natɨmnat mɨn u, tahmen e etəmim təmɨkɨs rəhan nɨməhan, məmə in otətəut-in in pɨsɨn. Məto ik, nəkətatɨg lilɨn əm nulan, kən okol nəsɨmɨsən nian kit.”[r] 13 Uhgɨn təməsən-ipən agɨn-əhən kəm nagelo kit rəhan məmə, “Ik əpələh e rəhak matɨp, ikɨn rəha nepətən ne nɨsiaiiən, kən matəsahgin. Pəs io ekos-iəhau rəham tɨkɨmɨr mɨn, 14 Məto nagelo mɨn, ilat iolwək mɨn əm. Nagelo mɨn, ilat narmɨn mɨn itəm Uhgɨn təmahl-ipa məmə okoatehm netəmim itəm okotos nəmegəhən ron.
HIPRUS 2 ->
- a Hip 2:2
- b 1 Pita 1:20
- c Sam 2:8
- d Jon 1:1-3; Kol 1:16
- e Jon 1:14; 12:41; Aes 6:1-4
- f Jon 14:9; Fil 2:6-7; Kol 1:15; 2 Kor 4:4
- g Kol 1:17
- h Taet 2:14
- i Fil 2:5-11; Kol 1:15-18.
- j Efes 1:20-21; Fil 2:9
- k Sam 2:7; Wək 13:33; Hip 5:5; 1 Kron 17:13
- l Mat 3:17
- m Katən məmə in təmaupən maiir məto-inu təmaupən maiir e pian mɨn. Katəghat-in nəhlan Iesu, məto-inun in təmaupən matɨg, uarisɨg natɨmnat mɨn rafin (Əplan mɨn Kolosi 1:15). Tol nəhlan, kən natɨmnat rafin mɨn, in rəhan əm. Tatos nepətən ne nɨsiaiiən nəhlan tahmen e suakəkə itəm təmaupən maiir. Sam 89:27; Hip 2:10; Rom 8:29.
- n Sam 104:4
- o Nɨmətag ne nɨgəm kəmueia nian Uhgɨn təmos-ipa Lou. Hip 2:2; 12:18-21.
- p Sam 45:6-7
- q Aes 34:4; 51:6; Nol Əpən 6:12-17
- r Sam 102:25-27
- s Nəghatən Kris ətuatɨp tatən məmə, “ekol rəham tɨkɨmɨr mɨn ilat kotahmen e nat kit itəm nəkəpələh matəfipər nelkəm lan,” kən nɨpətɨn u məmə, “Oekol ik ilɨs agɨn taprəkɨs-in rəham tɨkɨmɨr mɨn.”
- t Sam 110:1
- a Hip 2:2
- b 1 Pita 1:20
- c Sam 2:8
- d Jon 1:1-3; Kol 1:16
- e Jon 1:14; 12:41; Aes 6:1-4
- f Jon 14:9; Fil 2:6-7; Kol 1:15; 2 Kor 4:4
- g Kol 1:17
- h Taet 2:14
- i Fil 2:5-11; Kol 1:15-18.
- j Efes 1:20-21; Fil 2:9
- k Sam 2:7; Wək 13:33; Hip 5:5; 1 Kron 17:13
- l Mat 3:17
- m Katən məmə in təmaupən maiir məto-inu təmaupən maiir e pian mɨn. Katəghat-in nəhlan Iesu, məto-inun in təmaupən matɨg, uarisɨg natɨmnat mɨn rafin (Əplan mɨn Kolosi 1:15). Tol nəhlan, kən natɨmnat rafin mɨn, in rəhan əm. Tatos nepətən ne nɨsiaiiən nəhlan tahmen e suakəkə itəm təmaupən maiir. Sam 89:27; Hip 2:10; Rom 8:29.
- n Sam 104:4
- o Nɨmətag ne nɨgəm kəmueia nian Uhgɨn təmos-ipa Lou. Hip 2:2; 12:18-21.
- p Sam 45:6-7
- q Aes 34:4; 51:6; Nol Əpən 6:12-17
- r Sam 102:25-27
- s Nəghatən Kris ətuatɨp tatən məmə, “ekol rəham tɨkɨmɨr mɨn ilat kotahmen e nat kit itəm nəkəpələh matəfipər nelkəm lan,” kən nɨpətɨn u məmə, “Oekol ik ilɨs agɨn taprəkɨs-in rəham tɨkɨmɨr mɨn.”
- t Sam 110:1