Tesalonicenses

1 ¿Yaje mija ime Tesalónicawejeakarã? Yi'i Ᵽablo, suᵽabatirã majeyomarã Silvano, Timoteoᵽitiyika ika ᵽaᵽera mijaro'si yija ᵽũatayu. I'suᵽaka mijaro'si sayija ᵽũatayu Maᵽaki Tuᵽarãrirã, suᵽabatirã maiᵽamaki Jesucristorirãoka mija imamaka. I'suᵽaka simamaka Maᵽaki Tuᵽarãte jia mijare baarũ, jia mija imaokaro'si.

2-3 I'suᵽakajaoka mijaka jĩjimaka imawa'ri, “Jia mibaayu Tuᵽarã”, mijaro'si kire yija ãrĩrijayu. I'suᵽaka mijaro'si yija baarijayu, mijaka yija imaroyiraᵽaka ᵽoto, Jesucristore yi'yurã imarĩ, jia kiro'si mija baaroyiraᵽaka yija õñua simamaka. Ã'mitirikõrĩ je'e: Wayuĩabu'airã imarĩ, jia mija jeyobaabu'aroyiraᵽe. I'suᵽakajaoka “Rita sime maiᵽamaki Jesucristore ate ᵽe'rietarũkia”, ãñurã imarĩ, ba'iaja jũarika mija rakajeᵽããrijariroyiraᵽe. I'suᵽaka mija imamaka, ĩ'rãkurimarĩa Maᵽaki Tuᵽarãte mijaro'si yija jẽñeĩjirijayu. 4 Mija ã'mitiᵽe yijeyomarã, Tuᵽarãte mijare wayuĩarijayu. I'suᵽakajaoka “Tuᵽarãte nare wã'maeka”, yija ãrĩᵽuᵽajoayu mijareka. 5 Jesucristorika bojariroka mijare yija wãrõu'muraᵽaka ᵽoto okatakaᵽimarĩa mijare sayija wãrõraᵽe. Esᵽíritu Santore yijare jeyobaaraᵽakaᵽi ãrĩwa'ri jia mijare sayija wãrõraᵽe. I'suᵽaka yija baaraᵽaka simamaka “Rita sime ika majaroka”, ãrĩᵽuᵽajoawãrũraᵽarã imarĩ, samija ã'mitiriᵽẽatiyaraᵽe. Suᵽabatirãoka mija ᵽõ'irã yija imaraᵽaka ᵽoto jia yija baaroyiraᵽaka ĩaraᵽarã imarĩ, “Jia maimaokaro'si maᵽõ'irã netaraᵽe. Ritaitaka oka namajaroka ma'mitiriroyi mirãkiyu”, ãrĩwãrũraᵽarã mija ime. I'suᵽaka ᵽuᵽajoaraᵽarã mija imamaka, “Tuᵽarãte wã'maekarã nime”, mijareka yija ãrĩᵽuᵽajoayu.

6 Tuᵽarãrika bojariroka mija yi'ᵽakã'ã ĩawa'ri, aᵽerãte ba'iaja mijare baako'omakaja, Esᵽíritu Santore jeyobaaraᵽakaᵽi ãrĩwa'ri jĩjimakaᵽi samija ã'mitiraᵽe. “Ᵽablorãkaro'si, Jesúro'sioka i'suᵽakaja simaeka”, ãrĩwãrũwa'ri, jĩjimakaᵽi sã'mitiritirã samija yi'raᵽe mijaro'sioka. 7 I'suᵽaka mijaro'si simaraᵽaka simamaka Macedonia*Provincia (o departamento) romana en Grecia. Tesalónica se encontró en Macedonia en el norte de Grecia. Acaya fue el departamento al sur de Macedonia. ka'iareka imarã suᵽabatirã Acaya ka'iarãoka jia mija imaroyiraᵽaka ĩaji'araᵽarã imarĩ, mija uᵽakajaoka tokarã Jesucristore ã'mitiriᵽẽarijayurãte baaroyiraᵽe naro'si. 8 Suᵽa imarĩ Maiᵽamakirika bojariroka Macedonia ka'iakarã, Acaya ka'iakarã takajamarĩa imaraᵽarã sã'mitiraᵽarã. Suᵽabatirã “Jesúrika bojariroka jia yi'yurã nime”, mijareka narĩᵽuᵽajoarijayu. I'suᵽaka simamaka, aᵽerãte dirokaᵽi ãrĩwa'ri rĩkimaitakaja yija bojaberijĩka sime, koᵽakaja ritaja sana'mitiriwãrũtiika simamaka. 9-10 I'suᵽaka simamaka, “Jesucristorika bojariroka nare mija wãrõeka jia Tesalónicakarãre yi'yu”, ãrĩwa'ri yijare nabojayu. “ ‘Waᵽuju imaja jẽrãka jiyiᵽuᵽaka norĩkoᵽeroyiraᵽaka ja'ataraᵽarã nime, Tuᵽarã õñia imakite takaja jiyiᵽuᵽayeewa'ri. Suᵽabatirãoka Tuᵽarã Maki, Jesús mabo'ikakurirã maekaka imaki õ'õrã etarũkika kime. Ikiji imaki ᵽo'imajare kire jããeka simakoᵽeko'omakaja õñia Tuᵽarãte kire jarirũjeka. Suᵽa imarĩ ba'iaja wẽkomakareka maimarũkia imakoᵽeikareka Jesúre mare tããeka. I'suᵽaka simamaka jia Tuᵽarãka imarã imarĩ, Jesúre etarũkia jĩjimakaᵽi ta'abaraka maimaerã’, ãᵽaraka ᵽo'imajare bojabaraka nimarijayu”, ãrĩwa'ri yijare nabojayu.

1 Tesalonicenses 2 ->