1 Beju Huisha Janana Nime ja siete puji huini sello jemitana su, cielo su edusete hora puji pamapa mitanapeana. 2 Da su beju edusete hora jaitianana su, siete ángel cuana Diusu butse su enetita yama bana. Diusu ja siete pututu cuana tiatana huecuana. 3 Pia ángel altar butse su mesa oro jenetia incensario metse putiana. Piada ja tueda incienso tiatana Diusu sa dharejiji cuana sa jabajati cuana neje ehuaru puji. Tueda huarujiji ángel ja Diusu butse su yani oro jenetia ajiji altar bia su d'uichatana. 4 Incienso judu jabajati cuana neje tsuatiana altar jenetia Diusu butse su. 5 Da su ángel ja incensario altar sa etid'e cuana neje sejeatana. Tueda etid'e cuana mundo su siajusiautetana. Da su beju pupirutana tiri, etsui, tserutseru cuana. Yahua beju rirebapirutana.

6 Tueda siete ángel pututuji cuana beju jabasetatitana eturu puji.

7 Equene puji ángel ja mesa pututu turutana su, iyaru, cuati utsu cuana ami neje huarujiji mundo su siajusiautetana. Beju jajudipetiana mundo sa quimisha parte. Jajudipetiana aqui, nutsa cuana sa quimisha parte.

8 Da su beju beta puji ángel ja mesa pututu turutana sa, emata aida nime jajuditinetina siajusiautetana mar su. 9 Mar sa quimisha parte ami nime puana. Mar su aniji eid'e cuana sa quimisha parte beju manuametana. Mar queque su saji barco cuana sa quimisha parte taitanapetana.

10 Da su beju quimisha puji ángel ja mesa pututu turutana su, piada atujai aida tea nime utsu neje dajajana cielo jenetia. Ena, ena putiputi cuana sa quimisha parte su dajajana. 11 Tueda atujai da Patseda banime puina. Da su ena sa quimisha parte patseda puana. Ebia su cristiano cuana manutana, yahui patseda id'i putsu.

12 Da su beju pushi puji ángel ja mesa pututu turutana su, id'eti, badi, atujai cuana sa quimisha parte apunana. Mecuana sa quimisha parte hueda taitanana.

13 Da su beju yama piada ángel huipa nime buepa su ecuabetsaniuneti bana. Tueda jubida tsiatsiana uja:

—¡Aba, mundo su aniji cuana! Ebia su micuaneda sufri epu, pia tije quimisha ángel cuana ja mecuana sa pututu cuana eturuta su.

<- APOCALIPSIS 7APOCALIPSIS 9 ->