1 Beju bana yama Huisha Janana Nime ja equene puji huini sello jemitana su, equene puji ai eid'e jubida tiri nime puana uja:

—Pueque. Chamaque.

2 Daja equene puji epuani cama, caballo pasane bataji puana yama bana. Tu bia su piada anina. Pisa etsue dusutaina. Mesa echua bia su corona ichatana huecuana. Tueda putiana tusa majai neje jaicheti putsu, epishitiame epu puji yama bana.

3 Beju Huisha Janana Nime ja beta puji huini sello jemitana su, beta puji ai eid'e uja puana:

—Pueque. Chamaque.

4 Daja beta puji epuani cama, caballo dherena bataji puana yama bana. Tu bia su piada anina. Espada bauda inatsutana. Tueda yahua su puniunetiana cristiano cuana huamahuama emanuameme puji.

5 Beju Huisha Janana Nime ja quimisha puji huini sello jemitana su, quimisha puji ai eid'e uja puana:

—Pueque. Chamaque.

Daja quimisha puji epuani cama, caballo dhehuena bataji puana yama bana. Tu bia su piada anina. Etupuaji metse anina. 6 Pushi ai eid'e cuana duju su yama etsui id'abana. Uja puana:

—Piada kilo arusu da piada mudu tsine chuje tupu. Quimisha kilo d'ije piada mudu tsine chuje tupu. Aceite, vino mu be pachujetsua.

7 Beju Huisha Janana Nime ja pushi puji huini sello jemitana su, pushi puji ai eid'e uja puana:

—Pueque. Chamaque.

8 Daja pushi puji epuani cama, caballo tid'itid'i bataji puana yama bana. Tu bia su piada anina. Tueda Emanu banime puina. Tu tije epusiu piada bana. Tueda da Manujiji Cuana sa Eti Jude banime puina. D'eji tiatana mundo su pamapa pushi cristiano cuana jenetia piada pamanuameta puji. Espada, mid'e, chiqui cuana neje, animalo d'aida cuana neje di cristiano cuana pamanuameta puji d'eji tiatana.

9 Beju Huisha Janana Nime ja pishica puji huini sello jemitana su, da hora su Diusu sa quisa saida su jei eputani manuametana cuana altar ema su yanita bana. Cristiano cuana ja manuametana huecuana yahua su anitaina su, Diusu sa quisa saida cuana tuna quisaquisa putaina putsu. 10 Da su tsiatsia neje Diusu uja bajatana huecuana:

—Echua Puji, mida da aida, butsepi, ene quita. ¿Quetsunu jia miada ecuanaju manuameji cristiano cuana ecastiga?

11 Da su tiatana huecuana metse su hue ejud'uji pasane. Diusu ja uja atana huecuana:

—Mejanahuaque tsuhu. Meid'uaque tsuhu yahua su yanita pia edue cuana emanuameta huecuana teje, cuaja micuana manuametana huecuana nime. Da su emanuamepeta huecuana su, yama tuna manuameji cuana ecastigayu.

12 Beju Huisha Janana Nime ja sucuta puji huini sello jemitana su, da hora su yahua rirebatana jubida. Id'eti apunana. Badi ami nime jutidame puana. 13 Atujai cuana dajajatana beni ja equi cuana ejujutani su, ejaja cuana edajajatani nime. 14 Buepa japidudiati putsu, beju taitanapeana pamapa. Pamapa emata, edhapupu cuana beju puderapetana. 15 Mundo su huaraji aida, deja aida, soldado cuana sa echua puji, chipiluji, deja tucheda, esclavo, d'eji su deja cuana ebia su iyuame putana. Iyuame pu putsu, emata epa rara su nubitana huecuana erubuti puji. Emata cuana sa tumu aida cuana duju su jarubutitana huecuana. 16 Emata, tumu aida cuana uja bajatana huecuana:

—Medajajaque ecuanaju bia su ecuanaju erubua puji Diusu sa castigo peje jenetia. Merubuaque ecuanaju, Huisha Janana Nime, ecuanaju neje eduininiani putsu.

17 Beju tuna sa castigo tsine ecuina su, aimue aiya biame tucheata cua mahue.

<- APOCALIPSIS 5APOCALIPSIS 7 ->