1 Da su beju siete ángel cuana peje jenetia piada ema peje su pueana. Uja ema atana:

—Pueque. Mebameiti mar queque su yani ejude. Tueda ejude su aniji cuana da epuna chuamadhada nime. Ai madhada cuana atana huecuana putsu, cuaja Diusu ja ematsetayu huecuana yama mi ebame. 2 Mundo su aniji echua puji aida cuana dapia aniji cuana neje jucha aida putana. Pamapa cristiano cuana jucha ametana huecuana.

3 Da su beju tahui su nime tuahueda ema dusutana d'anita yahua su. Dapia da yama bana piada epuna ai senida dherena bia su yani. Ai senida sa equita da Diusu sa puji mimi madhamadha neje derepejiji puina. Tueda siete chuame puina. Piada tunca daname. 4 Beju tueda epuna sa ejud'uji idhiria, dherena puina. Jucuada oro, joya chujeneda, perla cuana neje basetajiji puina. Eme su dusutaina emeji oro jenetia ajiji. Tueda emeji mesa jucha ai madhada cuana neje sejeajiji puina. 5 Mesa emata su derejiji anina nimetiuda mimi cuana. Tueda mimi cuana uja puana: “Babilonia ejude aida. Dapia aniji cuana da epuna chuamadhada nime, pamapa mundo su aniji cuana neje jucha atana huecuana putsu.” 6 Dapia aniji cuana beidaji putana, Cristo tije aji cuana manuametana huecuana putsu. Beju daja ba putsu, ema nimetiunetiana. 7 Da su ángel ja ema uja quisabatana:

—¿Jucuaja su mi enimetiuni? Beju yama mi eshanapame epuna ai senida jepuiti. 8 Beju tueda ai senida equene eid'e anina. Aimue jiahue yani mahue. Daja biame, tueda riji mahue rara jenetia ecuinana. Cuinana putsu, beju Diusu ja tueda cuati castigo su eichanubiaenitayu. Pamapa Diusu sa quirica su ebani mue ani cuana da enimetiutayu, tueda ai cuana ba putsu.

9 ‘Beju upia yani ai cuana eshanapa puji. Jiahue yama mi equisa cuaja tueda ai cuana epu. Tueda siete echua cuana da siete emata cuana pu cua nime. Da bia su tueda epuna yani. 10 Tueda siete echua cuana da siete echua puji huaraji cuana pu cua nime. Pishica tuneda beju dajajatana. Piada hue jiahue ecuatsasia epuani. Pia tije puji cuinaji mahue. Tueda ecuina su, ubu chidi tiempo hue ecuatsasia epu. 11 Tueda ai senida dherena da siete echua puji huaraji jenetia, piada echua puji puina manujiji mahue su. Tueda neicha hue eid'eyu su, ocho puji echua puji epu. Da su beju Diusu ja tueda cuati castigo su ebeituenitayu.

12 ‘Tueda piada tunca edana cuana da piada tunca echua puji huaraji cuana sa pue taji pu cua nime. Beju tuneda bataji epu su, piada hora hue pamapa su ecuatsasia eputa huecuana ai senida dherena neje. 13 Pamapa tueda piada tunca echua puji cuana ja ai senida emebajata pamapa mecuana sa tucheda neje. 14 Huisha Janana Nime neje emajaitita huecuana. Da su Huisha Janana Nime ja epishitiameta huecuana, tueda pamapa pia echua puji huaraji cuana ebia su aida putsu. Tu neje yanita cuana da mesa jadhareti. Tu peje su ebia su enimetucheatitani huecuana. Tuna neje tupupai Huisha Janana Nime ja ai senida madhada epishitiameenitayu.

15 Da su beju ángel ja ema daja hue quisainiame atana uja:

—Miada ai bana cuana jiahue mi yama equisa. Miada epuna chuamadhada bana ena bia su yani. Tueda ena da tsapiapiati yana su mimiji cuana pamapa ejude je nime. 16 Tueda piada tunca echua puji huaraji cuana ja ai senida neje chuamadhada epuna ebia su duininibatana. Pamapa su japaiti putsu, epuna emanuameta huecuana. Jud'uji mahue ejusiaichata huecuana. Tusa yami ediata huecuana. Cuati utsu su etiumeta huecuana. 17 Beju Diusu ja dhitamepetana huecuana mesa ai tsada cuana papeta huecuana puji. Da su ai senida madhada tucheda menajatiatana huecuana tueda ecuatsasia papu puji, pamapa Diusu sa tsada yape teje. 18 Tueda miada bana epuna da tueda ejude aida, tucheda pu cua nime. Dapia tueda ejude su pamapa yahua sa echua puji huaraji cuana jucha ya puji puti bahue putaina.

<- APOCALIPSIS 16APOCALIPSIS 18 ->