1 Pablo ejude huaraji cuana chama putsu, uja apirutana huecuana:

—Edue cuana, jiahue teje ema Diusu butse su saida, butsepi epuniuneti.

2 Da su sacerdote cuana sa echua puji aida Ananías ja Pablo naja su eneti deja cuana cuatsasiatana Pablo ecuatsa su paicheta huecuana puji. 3 Da su Pablo ja Ananías atana uja:

—¡Mida da bubeta! Cuaja miada ema ya, daja huecha mi Diusu ja yata. Miada ema cuaja ecuana sa jacuatsasiati batame, quisabasaitaja yainia biame, ema ecuatsa su ichemeitia, matseji mahue su. Tueda mu aimue ecuana sa jacuatsasiati batame mahue.

4 Da su Pablo naja su eneti deja cuana ja Pablo quisabatana uja:

—¿Ai puji ni miada sacerdote cuana sa echua puji aida daja aitia?

5 Pablo jeutsutana huecuana:

—Edue cuana, tueda da sacerdote aida cuana sa echua puji ema bue mahue putsu, daja yama jeutsuana. Enei hue, Diusu sa mimi su uja derejiji yani: “Ai mimi madhada pu taji mahue mique huaraji sa puji.” Da su ahua ema aidhe tueda bahue puina su, aimue detse yama daja a cua puina mahue.

6 Beju Pablo jashanapatiana piada piada tuneda saduceo cuana putaina. (Diusu ja manujiji cuana eid'emetayu aimue jei putaina huecuana mahue.) Dajucua cuana fariseo cuana putaina. (Diusu ja manujiji cuana eid'emetayu jei putaina huecuana.) Pamapa tuneda ejude duquinaji putaina. Da su Pablo ja uja atana huecuana:

—Edue judío cuana, ema da fariseo. Quema tata chenu cuana di fariseo cuana putaina. Ema Diusu ja manujiji cuana eid'emetayu enimeid'uatiani putsu, micuaneda ema equisabasaitainia.

7 Beju Pablo daja mimipeana su, fariseo cuana, saduceo cuana neje jacuicuinapirutitana. Aimue mecuana sa daja cama piba putaina mahue. 8 Saduceo cuana uja epibatitani: “Aimue manujiji cuana neicha eid'etayu mahue, cristiano cuana nid'u mahue putsu. Daja huecha aimue ángel cuana yani mahue.” Fariseo cuana ja mu pamapa ye ai cuana su jei eputani. 9 Da putsu, tuneda cama tsiatsia jubida neje jacuicuinatitana. Beju piada piada fariseo cuana netianatana. Tuneda da jacuatsasiati ebuetsuaji cuana putaina. Uja saduceo cuana atana huecuana:

—Ye Pablo jucha mahue ecuanaju ebainia. Ahua cuapuitime Diusu sa ángel ja ahua enid'u ja tueda mitsutana su, da su, ¿ai puji ni ecuaneda Diusu neje eturuca mimi cua?

10 Da su beju soldado cuana sa echua puji iyuame puana, enime cuana iyuda ba putsu. Cuapuitime Pablo nedaneda ata cua huecuana pepe puana. Da su soldado cuana ihuatana Pablo judío cuana duju jenetia jemicuina putsu, cuartel su padusutayu huecuana puji.

11 Dhidha su Pablo peje su Echua Puji Jesús bataji puana. Uja Pablo atana:

—Janimetucheatique. Cuaja mida upia Jerusalén ejude su ema jepuiti jaquisanetiacuinatiana nime, daja huecha mida Roma ejude su epu.

12 Pia huenati apudaya jucuada judío deja cuana jadhitatitana. Diusu bahue putana huecuana uja:

—Aimue ecuanaju ediadia, eid'iti mahue Pablo emanuame teje. Diusu ja ecuanaju pacastigata ahua ecuanaju ediadia, eid'iti su, Pablo manuameji mahue su.

13 Tuneda pushi tunca ejaitiana deja cuana putaina. 14 Da su beju sacerdote aida cuana, tata edhi ehuidusuji cuana peje su putitana huecuana. Uja atana huecuana:

—Ecuanaju Diusu bahue puana Pablo emanuame puji. 15 Da su soldado cuana sa echua puji mebajatique Pablo upia mueta neicha saida neje equisabasaita piba neje padusemeta. Micuana peje su cuinaji mahue su, ecuanaju tueda eid'ua emanuame puji.

16 Beju Pablo sa dudu sa ebacua chidi bahue puana. Cuartel su tipeida Pablo equisa puji putiana. 17 Da su Pablo capitán ihua putsu, uja atana:

—Dusuque ye edeje chidi echua puji peje su tu ai cuana paquisatita puji.

18 Da su capitán ja edeje chidi dusutana. Uja atana echua puji:

—Hue upia duseitia edeje chidi. Pablo ja ema bajataitia mi peje su paduse puji, mi ai cuana quisataque puji.

19 Da su echua puji ja edeje chidi sa eme ina putsu, chuadera pad'i dusutana. Dusu putsu, uja atana:

—¿Ai ni miada ema quisaja?

20 Edeje chidi ja uja jeutsutana:

—Pablo manuameja putsu, judío huaraji cuana ja mi ebajameta Pablo tuna peje su mueta beituque puji, ai cuana neicha tu equisaba puji. 21 Be jei aji huecuana. Be Pablo tuna peje su beituji. Pushi tunca ejaitiana deja cuana ja edid'i su eid'uata Pablo emanuame puji. Diusu bahue putana huecuana Pablo emanuame puji. Pablo manuameji mahue tupu, aimue ediadia, eid'itita mahue huecuana. Ahua mue tuna daja a su, Diusu ja pacastigata huecuana. Daja Diusu bahue putana huecuana. Beju jiahue quita mique jajeutsuti bahui eid'uatani huecuana.

22 Da su beju echua puji ja edeje chidi beitutaibana. Uja cuatsasiatana:

—Be aidhe biame quisaji ema miada ye ai cuana quisaitia.

23 Beju echua puji ja mesa capitán detse ihua putsu, uja cuatsasiatana tse:

—Mebasetatique pushi cien soldado cuana. Beta cien espadaji, pia beta cien lanzaji, siete tunca caballo bia je soldado cuana di mebasetatique. 24 Ed'eji su, mebasetatique piada caballo Pablo ja pabianita puji. Jiahue dhidha su metseda Pablo Cesarea ejude su huaraji aida Felix peje su saida edusu.

25 Da su echua puji ja capitán detse quirica tiatana huaraji Felix peje su padusuta tse puji. Uja quirica su deretana: 26 “Ema da Claudio Lisías. Huaraji aida Felix peje su ye quirica ebeituinia. Yama mi ye quirica neje emitsuameinia. 27 Beju ye deja Pablo banime judío cuana ja inatana yama mi peje su ebeituinia. Manuameja adhaatana huecuana biame, yama, soldado cuana neje d'eji su ameana, tueda da romano deja nime huecha putsu. 28 Da su yama judío cuana sa dhitajiji huaraji aida cuana peje su tueda dusuana judío cuana ja tu etuaquisatani cuana eshanapa puji. 29 Da su ema bahue puana tueda tuaquisatana huecuana mecuana sa ai puiti cuana jepuiti. Daja biame, tueda da jucha mahue emanuame puji, daja huecha eteriame puji. 30 Beju ema bahue puana judío cuana ja tueda manuameja yatani. Da putsu, yama tueda tipeida ebeituinia mi peje su. Judío huaraji cuana yama ecuatsasiainia mi peje su paputita huecuana puji, Pablo etuaquisatani ai cuana quisapetaque huecuana puji. Da teje hue.”

31 Da su tueda dhidha su soldado cuana ja Pablo Antípatris ejude teje dusutana huecuana. Dapia tahuitana huecuana. 32 Pia huenati ehuatsi je putitana soldado cuana jasiapatitaibana cuartel su. Pia caballo bia je putitana soldado cuana ja Pablo dusujaitianatana Cesarea ejude su. 33 Dapia cuinati putsu, Pablo, quirica neje huaraji aida Felix menajatiatana huecuana. 34 Felix ja quirica mimiame putsu, Pablo quisabatana uja:

—¿Quebata yahua jenetia mida?

Pablo jeutsutana:

—Ema da Cilicia yahua jenetia.

35 Felix ja uja Pablo atana:

—Jade, mi tuaquisaji cuana ecuinata su, yama mi eid'aba.

Da su Felix ja cuatsasiatana soldado cuana Pablo paquinata huecuana puji Herodes sa ete aida su.

<- HECHOS 22HECHOS 24 ->