Repelesin 12

Mö aipam kas kaglö diba aipam

1 Makwam rɨb nugup duön nugumön, ap hör yoŋyöbö dib i adöx bli yörsak röŋa. Mö i naiö wölɨj röxg yömön, yamsö nuŋwa röun rola röb gɨ mɨdöŋa. Gupö akuyöbö möl sö piaku, kwin röbmɨdöi usaŋ akuyöbö mei yöcmac nuŋ sö nɨgmɨn mɨdöŋa. 2 Nuŋ ha yöxɨba ha nɨmɨm nugugɨrön, wöj wöj nölmɨdöŋa.

3 Dan 7:7Nɨ nugumön, ap hör yoŋyöbö i kwo adöx bli yörsak wöxnö nɨgöŋa. Kas kaglö paskwolö dib keiryöbö mɨŋi mɨdöŋa. Yöcmac nuŋ akuyöbö mɨj sö mɨdɨm, aj nuŋwa akuyöbö ragpɨd sö mɨdɨm, kiŋ röbmɨdöi usaŋ akuyöbö me bla yöcmac nuŋ bla hörɨrör nɨgmɨn mɨdöŋa. 4 Dan 8:10Kas kaglö dib aku, ŋöpö nuŋ aku adöx sö gupö bla palmɨn, mabuö kap kɨtu il kɨ pɨnöŋa. Gupö magalɨg mɨdim bla rɨb mös paŋ akuyöbö nuöm nɨgön, rɨb mös mɨdɨm, rɨb paŋyöbö i pɨn mölöd aböŋa. Makwam, nuŋ mö ha yöx pön höba rɨmɨdöŋ aku, yöx pön haŋ ha aböx nɨmnö, rön, hön pöx mɨdöŋa. 5 Sam 2:9; Ais 7:14; 66:7; Rep 19:15Makwam mö aku ha i yöx pön höŋa. Ha aku nuŋ ain yöd mɨxɨla pön, nöbö mö mögörɨb akuyöbö magalɨg nugwidɨx mɨjöna. Jɨ mö aku ha nuŋ aku yöx pön höm, ejol i nuŋ ha aku um pɨn pön wölu, God nuŋ hogw rol kiŋ nuŋwa adöx yöd rol adö kau sö mɨd yöraku pön wöluöŋa. 6 God mö aku nugwo kau i rɨ nɨgmɨn, bör mögörɨb rɨg kap mibɨl piaku duön, piakwör mɨdaŋ nugugɨrön, God nugwo ap mag nöl gɨrön nugwidɨx mɨdaŋ nugugɨrön, wop akuyöbö wan tausan tu hadred sikisti (1260) diöna.

7 Jud 9Makwam adöx yöd rol adö kau sö yöraku, ejol dib Maikel ejol nuŋ bla pön duön, kas kaglö dib aku yam nuŋ bla pɨsaŋ nuö nuö pɨlön pɨlɨp duön, 8-9 Jen 3:1,14; Luk 10:18; 22:31; Rep 20:2kas kaglö dib aku yam nuŋ bla magalɨg, adöx yöd rol adö kau sebö aŋadö pɨl rɨbɨx mögörɨb il kɨ abmä. Kasa maduar ib hör i mɨdöŋ kas aku kɨjaki mönö Seten, me rɨmɨdöi aku, nuŋwör nöbö mö mögörɨb piaku piaku magalɨg mönö inakmönö hörmɨn, inakmönö nuŋ aku nugumä.

10 Job 1:9-11; Sek 3:1Makwam mönö dib i adöx yöd rol adö kau sö yadön yadöŋa,

“Weik God nuŋ nöbö mö bla kömö pöna.

Weik God nuŋ ölɨsö nuŋwa pön, nöbö mö mögörɨb piaku piaku magalɨg

Kiŋ dib keiryöbö ödöriö mɨjöna.

Weik God Krais nuŋwa

nuŋ Nöbö Dib ölɨsö keiryöbö ödöriö mɨdön,

nöbö mö mögörɨb piaku piaku magalɨg nugwidɨx mɨjöna.

Aku agapɨm: Seten nuŋ God mämäg il yöra mɨdön,

mil pɨxmag yuö

haul nöbö mölöu nöbö an bla ap kib mag gwogwo agap apɨm rɨmɨdim akuyöbö yadmɨdöŋa,

jɨ weik nugwo pɨ mögörɨb il bö abmä.

11 Haul nöbö mölöu nöbö an bla,

Sipsip Ha hañ nuŋwa aipam,

Krais mönö mɨ nuŋwa wöxnö yad nölmɨdöi aku aipam rɨmɨn,

Seten nugwo pɨ mo ñɨŋa nɨgmä.

Nöbö mö nuŋwör mɨdölɨŋö, rön, ipöxölöi;

anɨŋ pɨl pal nɨgnöb pɨl pal nɨgɨŋ, rön, rɨb aku yöx nugumä.

12 Makwam, ñɨŋ adöx yöd rol adö kau sö mɨdöi aku,

wahax pɨ gɨr mɨjöña.

Jɨ ñɨŋ mɨgrö kɨ aipam, ban yuö diba aipam mɨdöi akuyöbö

ñɨgö ögwö yöxmɨdla.

Aku agapɨm: kɨjakia nugwo pɨ ñɨŋ mɨdöi yörbö abɨm,

wop nuŋ mɨga mɨdöl aku nugwön nuŋ mɨ ölɨsö diba rödmɨjönɨŋö,” röŋa.

13 Kas kaglö dib aku, nɨ mögörɨb il kɨ pɨ aböiŋö, rön, rɨb aku yöx nugwön, mö ha yöx pön höŋ aku nugwo rɨbɨx abmɨdöŋa. 14 Dan 7:25; 12:7Jɨ God nuŋ mö aku nugwo yöur du diba upɨc dib hogwa nɨg nölmɨn, nuŋ öbɨl bɨbɨ rɨp mögörɨb rɨg kap mibɨl yöraku God kau nuŋwa rɨ nɨgöŋ yöra duön mɨdöŋa. God nuŋ nugwo ap mag rɨ gɨrön nugwidɨx mɨdaŋ, kɨm mös paŋ rogwul akuyöbö iŋösu sö diöna. Kas kaglö aku mö aku nugwo ap gwogwo i rɨb maga nɨgen.

15 Kas kaglö aku, röbö diba höjöx abmön mö aku nugwo mag duaŋ, me rön, höjöx aböŋa. 16 Jɨ mögörɨb aku mö aku nugwo rɨ nölmɨn, kas kaglö röbö diba höjöx aböŋ aku mögörɨb möl bla pal gɨlɨxɨp duön, hölö hölögɨpɨm duöŋa. 17 Rep 11:7Almɨn, kas kaglö aku mö aku ölɨsö diba wölɨm, mö aku halöu ha nuŋ bla, ñɨŋ God Mönö rɨg yadmɨd mag akuyöbö akwör rön, Jisas mönö mɨ nuŋwa nugw pön mai duön, nöbö mö bli ñɨgö yad nölmɨdöi piaku pɨsaŋ nuö pɨlɨba duöŋa. 18 Kas kaglö aku duön ban yuö diba halai rola öbɨl gɨ mɨdöŋa.

<- Repelesin 11 Repelesin 13 ->