Hibru 8

Jisas nuŋ God Ap Höjöpal Ur Nölɨb Nöbö Dib Ödöriö an

1 Mönö yadmɨdɨl kɨ il aku aliö mɨda: God Ap Höjöpal Ur Nölɨb Nöbö Dib Ödöriö an aku duön God adöx yöd röul adö kau sö mila alɨg mɨd Nöbö aku imag mɨrɨx adö römɨd gɨ mɨda. 2 God Ap Höjöpal Ur Nölɨb Nöbö Dib Ödöriö an aku, nuŋ God höjöpalɨb ram yöraku mabö rɨmɨda. Jisas nuŋ mabö rɨmɨd höjöpalɨb ram aku, nöbö mö ur nɨgölim; God höjöpalɨb ram mɨ aku, God Nöbö Diba nuŋ keir ur nɨgöŋa.

3 God ap höjöpal ur nölɨb nöbö dib ödöriö mögörɨb döul il kɨ piaku magalɨg, nöbö mö ap kib mag gwogwo rɨmɨdöi bla ñɨŋ hön meme mönö hön sipsip ap bla rag hö, God ap höjöpal ur nölɨb nöbö dib ödöriö nölmɨn, ñɨŋ piöŋö bli pal God nugwo ri ablaŋe rön höjöpal ur nölmɨdöia; bli pal ap kib mag gwogwo rön pɨxa alɨg mɨdöi aku God nugwön röböxaŋ, me rön, rɨgpɨd rol aku pal urön God höjöpal ur nölmɨdöia. Mag akuyöbö, God Ap Höjöpal Ur Nölɨb Nöbö Dib Ödöriö ana ap bli God nugwo nölɨba röŋa. 4 Jisas mögörɨb adöx yöd röul adö kau sö mɨd aku mɨ, nuŋ God Ap Höjöpal Ur Nölɨb Nöbö Dib Ödöriö mɨda. Jɨ nuŋ mögörɨb il kɨ mɨdöx aku, God ap höjöpal ur nölɨb nöbö i mɨdölöx. Aku agapɨm: God rɨg yadöŋ akuyöbö, nöbö Lipai ila yöx pön höi nöbö piakwör, God ap höjöpal ur nölɨb mabö rɨ gɨrön, Mosɨs lo mönö kai kɨtöŋ aku nugwön, ap pal God höjöpal ur nölmɨdöia. 5 Eks 25:40; Kol 2:17; Hib 9:23Mögörɨb döul il kɨ God ap höjöpal ur nölɨb mabö rɨmɨdöi aku, anau röxg nugwön rɨmɨdöi mag akuyöbö rɨmɨdöia; ap yöbö aku mögörɨb adöx yöd röul adö kau sö mɨda. Ada akwör, Mosɨs nuŋ God ap höjöpal ur nölɨb ap uñ ram aku urɨba röŋ aku, God nugwo yadöŋa, “Naŋ önöŋ ajmag piaku mɨdön, nɨ nagö yabumön nugumö akuyöbö magalɨg paŋ aliar ranö,” röŋa.

6 Hib 7:22God Ap Höjöpal Ur Nölɨb Nöbö Dib Ödöriö ana Jisas, God ap höjöpal ur nölɨb nöbö dib ödöriö hödyöbö piaku rɨg rɨmɨdöi mag akuyöbö rɨmɨdöl; nuŋ mabö dib ödöriö rɨmɨda. God Ap Höjöpal Ur Nölɨb Nöbö Dib Ödöriö ana Jisas raŋ, God nöbö mö nuŋwa pön mönö aku, Mosɨs kai kɨtöŋ mönö aku algör mɨdöl. God nöbö mö nuŋwa pön mönö aku yadɨba, nuŋ mönö ölɨsö ma yad nɨgön yadöŋa, “Nɨ ñɨgö mönö mi yadmɨdla, nöbö mö na ñɨgö ap wä ödöriö nöinö,” röŋa.

7 God mönö ölɨsö ma hödyöbö yad nɨgöŋ aku, God rɨba rɨmɨd mag akuyöbö röx aku, nuŋ mönö ölɨsö yoŋyöbö aku pön hölöx. 8 Jer 31:31-34Nöbö mö bla mɨd ri abmɨdölöi aku, God ñɨgö yadɨba, mönö yadɨb nöbö nuŋ i rɨba nölmɨn, God Mönö kai kɨtön yadöŋa,

“Nɨ Nöbö Diba ñɨgö yadmɨdla,

mai nɨ Isrel nöbö mö akuyöbö aipam

Juda nöbö mö akuyöbö aipam

ñɨgö mönö ölɨsö ma yoŋyöbö i yajɨna.

9 Nɨ nöhönɨŋ apɨnɨŋ maduebö bla imag rol na nɨgön,

Ijip yöbö pön höma aku,

jɨ mönö ölɨsö ma yadön yad nɨgɨm aku yöxölim aku mɨ,

nɨ ñɨgö röböxma.

Makwam, nɨ mönö aliö akuyöbö

ñɨgö iswob yadöin.

10 Nɨ Nöbö Dib ñɨgö yadmɨdla,

mai nɨ Isrel nöbö mö piaku

ñɨgö mönö ölɨsö ma yad nɨgön,

lo na aku rɨb madmag yuörɨb ñɨŋ kwo nɨg nölmön,

ñɨŋ nugw ri abön rɨbyöx nugu gɨrön mɨjöña.

Makwam, nɨ God ñɨŋa mɨjɨna;

ñɨŋ nöbö mö na mɨjöña.

11 Wop aku, nöbö mö nɨ bla,

haul hödpɨg nöbö mö bli ñɨgö,

‘Nöbö Diba nuŋ God mɨd aku nugw pö,’ rön, yadeñ.

Aku agapɨm: nöbö mö ulul aipam, nöbö mö dib aipam,

ñɨŋ magalɨg nɨ nugwöña.

12 Ap kib mag gwogwo rɨmɨdöi aku,

ñɨgö uliöxön röböxna.

Ap kib mag gwogwo rɨmɨdöi aku,

rɨbyöx nugu gör mɨdön ñɨgö mönö diba yadöinö,” röŋa.

13 God nuŋ mönö ölɨsö ma yoŋyöbö kɨ yad nɨgön, “mönö ölɨsö ma yoŋyöbö” yadöŋ aku mɨ, an nugwöla nuŋ mönö hödyöbö aku weik ram mɨ lɨdu lɨl rɨ pɨn akuyöbö mabö mɨdöl, röŋa; ap lɨdu lɨl rɨ pɨn akuyöbö igöp aŋadö hölögɨpɨba rɨmɨda.

<- Hibru 7 Hibru 9 ->