13
1 Qiyğa millet Xatserotğançe qığeç'u Paranne sahreeqa qadayle.
Kana'anne cigabışeeqa casusar g'uxoole
2 Rəbbee Mısayk'le eyhen:
3 – İzrailybışis helesde Kana'anne cigabışeeqa alycaaxvas insanar g'axuvle. Yıts'ıq'vəne (12) nasılıken ç'ak'ınbı g'axuvle.
4 Rəbbe uvhuyn xhinne Mısee manbı Paranne sahreençe g'ıxolenbı. G'axuvuyn gırgınbı İzrailybışde nasılbışin ç'ak'ınbı vuxha. 5 Haane manbışin dobı:
Ruvenne nasıleençene Şammuayna dix Zakkur;
6 Şimonne nasıleençene Xoriyna dix Şafat;
7 Yahudne nasıleençene Yefunna dix Kalev;
8 İssaxarne nasıleençene Yusufna dix İgal;
9 Efrayimne nasıleençene Nunna dix Hoşia;
10 Benyaminne nasıleençene Rafuyna dix Palti;
11 Zevulunne nasıleençene Sodiyna dix Gaddiel;
12 Yusufna dix Menaşşeyne nasıleençene Susiyna dix Gaddi;
13 Daniyne nasıleençene Gemalliyna dix Ammiel;
14 Aşerne nasıleençene Mikaelyna dix Setur;
15 Naftaliyne nasıleençene Vofsiyna dix Naxbi;
16 Qadne nasıleençene Makiyna dix Geuel.
17 Mısee cigayqa ilyaakasva g'axuvuynbışin dobı manbıniy vod. Mısee Nunne duxays Hoşiays (
g'attipxhıniy) Yeşua (
YAHVE g'attivxhan haa'a) do giyxhe.
18 Kana'anıqa ilyaakas g'uxolemee, Mısee manbışik'le eyhen:
– Negevne sahrayle k'ena suvabışeeqa hudoora. 19 İlyaake, nəxdıniy man ciga, nen milletiy maa eyxhe, geebbıye k'ılbabiye manbı, gucukaye dişe? 20 Manbı vooxhen ciga yugune pisine? Nəxdıne şaharbışeeyiy manbı aaxva: çabırbı vodee, hiqiy-allan cigabı it'um hı'ıye? 21 Maana nyaq'v nəxübiy, kar ələəye dişee? Yivar vodee? Yik'eka, itt'umba vuxhe, qöömee mane cigayn meyvabı alle.
(Manke yicıd t'ımılybı hiyxharna gah vuxha.)
22 Manbı Tsinne sahraysse Levo-Xamatne k'anene Rexovusqa hapk'ın maane gırgıne cigabışiqa ilyaakanbı. 23 Manbı Negevıle k'ena qavaylenbı Xevronqa. Mane cigabışee Anaqıke g'abıynbı: Aximan, Şeşay, Talmay vooxhe vuxha. (Xevron Misireene Tsoan şaharıle yighılle senna ögiyl alyav'u vuxha.) 24 Eşkolne q'adaalilqa hipxhırmee, manbışe sa ts'ets'nan t'ımılen bıtağ gyatxı tübəəlqa givayxan. Mana tübəəyib q'öng'ee avqaaqqa. Manbışe mançile ğayrı coka narariy incilerıd alyaat'anbı. 25 İzrailybışe mançe t'ımılena ts'ets' qopxuva mane q'adaalin do Eşkol (ts'ets') giyxhe. 26 Yoq'ts'al (40) yiğna manbı mane cigabışee alycaxu siviyk'alanbı.
Alycaaxvas hapk'ıninbışee yuşan hı'iynbı
27 Manbı Paranne sahreene Qadişeeqa Mısa, Harun, İzrailybışin gırgınbı vooxhene cigeeqa siviyk'al. Maa'ad manbışe Mısays, Harunus, milletıkene gırgıng'us co hapk'ınne cigabışee g'acuynbı yuşan ha'a, co mane cigabışeençe adiyn meyvabı hagva.
28 Manbışe Mısayk'le eyhen:
– Şi ğu g'axuvuyne cigabışeeqa hapk'ın hipxhırinbı. Maa'ad hək'edad nyakiy itv gyodatse vod. Haane mane cigabışin meyvabıd.
29 Saccu maa'ad eyxhen millet gucuka vod, manbışin şaharbıd ç'ak'ıda vod, hiqiy-allad yugda it'umı'ı vod. Mançile ğayrı, şak'le maa'ab Anaqıke g'abıynbıb g'avcuynbı.
30 Negevee Amalekbı, suvabınane cigee Q'etbı, Yevusbı, Emorbı, deryahneyiy İordanne damayne mıglekıb Kana'anbı vooxhe vuxha.
31 Kalevee Mısayne k'ane milletıs yik'bı huvu eyhen:
– Hapk'ın man ciga xılelqa alğahas, yişda mançilqa guc hivxharasda.
32 Mang'uka hapk'ıninbışemee eyhen:
– Şasse şene milletıka saç'uvkas vəəxəs deş, manbı şale gucuka vob.
33 Conemee milletıs, manbışe co hapk'ınne cigabışde hək'ee pisda xabar abı eyhen:
– Şi hapk'ın alycaxuyn cigabı yugunbı deşiy, maabın insanarıb zarabacab habat'ayiy. Gırgın şak'le maa'ab g'avcuyn insanar geeb ç'ak'ın karbıyiy.
34 Şak'le ma'ab Anakıke g'abıyn geeb ç'ak'ın kuşdukurarıb g'avcuynbı. Şi manbışde k'ane şasqacab ts'irtyar xhinneyiy qöö. Manbışde ulesqab şi həməxüb qabı.
<- Raq'ambı 12Raq'ambı 14 ->
