Pol ami Israel kayak kiiso kawi kal-bomda aket uluum kemsa kaami sang kaata ko
1 Nili Kraist ami tunum kemin, ibakamin weng kaa bakan-umbi daa; ti faneng tituun-kup tabin weng kaata-kup bakan-umbi kaali, God ami Sinik Tambal ata nami aket fukunin ayo dong dokop-na utami ya, Weng kalawaali ti faneng tituun-kup bokolokomi no kalbi. Kemin, weng san iliwa. 2 Nali ti suunkup nalmi nak-tunum kusal Israel imi aket uluum awak kaata-kup kuluu-bomdila, utam yakyak talan-umbi. 3 Kemin, nalmi aket fukunin dukum kaali ti, God ata taba-lomda nami tunum miit maakup iyo im-taldang almi miit tem tiilak o, kebi no. Kemin, nali utami yi, Liip so kelu dinam, Kraist ami dik-daaliya, nata nam-kan-tiilala yak ban-ilomdi nami win ata disa kelule, ita im-taldang-daala nami abiin kuluu-lom tam abiil tikiin unin o, kalomi. Lale, kaa liip namti kabe disa kemin, kwin, kiiso kawi kala-laabi no! 4 Kemin, God ali Israel kasel imi yim-buu bokoya-lomda: Ibi nami unang tunum ale, nalmi man o, kalale, God ayo titil so, dawang so, ayo kukuyila utamiwa yi, Awu, God ali nuso bombe kala, kalsip. Kemin, God ami weng kutiisa so, ami Lo so, tifan lotu kemin kukup kaaso aa, God ami kanolokomi kayi! kala kuka-daasa so, kii imi kuyilala, ilimi diim kulu bombuu. 5 Kemin, sawaayak kawu, tunum miit kaptoop ami man loop namti kaa-bilip ilmi diim kaptoowu God ami uldaa-dabuula tiltam kamokim ke-lom Kraist ayo tiltam tunum kese.
Kemin, Kraist ali mafek mafek alik kiimi dabom kesa. Kemin, ali tifan ti God kemin, ami tong kaata-kup suunkup nuyo bakamum o, kala-somla kemin, fan ko.
God ami unang tunum kii nalmi no, kala ulela-laamin kaami sang kaata ko
6 La, nuli utamuwa, God ali Israel kayaak iyo alik ulelnala, tiltam almi unang tunum kensip disa yo, kalup namti, nuli ibokoya-lomdup: God ayo Abraham ami bokola-lomda: Kapni man loop kaptoop-ali yaapkan yaapkan ke-lokomip o, kala, weng kutiisa. Lale, alik ulelnin disa kemin, ali kasen-foko kelase no, kalolup ema? Kaali disa yo. 7 Abraham ami man loop kiili, alik God ami man disa; iip maakup maakup kiita-kup kemin, sawaayak kawu God ayo Abraham ami bokola-lomda: Kapni man kaa disa; kemin, kapni man Aisak ami loop kaptoop ata-kup kapni win ayo bokoyilila, kaltapni tunum miit ke-lokomip o, ansa. 8 Kemin, weng kalawaami iipyak tem namti kala bombe: God ami diim kaali, Abraham ami man fokosa kiili ti alik nalmi man o, kalsa disa; nami weng kuka-daali ilom fan tiltam abamnaya, man duubip kaata-kup nalmi man kayi! kala-lomda God ayo kanum bokosa. 9 God ali Abraham ami weng kuka-daa bokola-lomda:
Nali kapni kalel Sara uyo tangbal-kup dong dakaa-um-bili ilu kemin, yak wasital ma ami diim kawu asuk tilila, man tunum ma duulokomu kayi!
kalaya, bombii weng ayo fan tiltam abamnaya, Sera uyo Aisak ayo duusu.
10 Kaa kaata-kup daa; ma namti kala bombe: Rebeka umi man tunum man awaang imi aalap kulaa maakup kemin, ali numi awaalik Aisak. 11 Kemin, God ayo tunum ulamin kaami kukup aket fukun-ilomda, Tunum ami kukup tangbal kanuba kaata, atam-ilom ulduu dabuulokomi disa; ti nalmi aket kaata-kup, Awu kulaata naan-daala-lom ulduuliya, unang tunum iyo nami kukup uyo utamin o, kala-somdala kemin, man awaang alep iyo awak uyo imulula tiltam kukup mafak aye, kukup tangbal aye, ayo ma nuumin disa bom iliwa, 12 kamasi kawu, God ayo almi aket fukunin kaata-kup dap-mafiing daa talokoma niing kaata ulduu-lomda, awak Rebeka umi bokowa-lomda: Dap-mafiing daa talokoma niing kaata, asiik bon tem talokoma alaltap ke atam fik kaa tiin molokoma no, wansa ko. 13 Bom bii-lom man awaang alep imi imulu fasuu-lomdip iyo bii-lom saaksip imi sang kaali, God ayo boko-lomda:
Nali niing Jekop ami aket kaata konsi ale, fik Iso ami aket kaa ma konsi disa yo,
kalala, God ami Sukon Tem uyo dolsip o.
14 Kanum bokosa kemin, kaa kanimin o, kalokomup i? Nuli boko-lom: God kaami unang tunum ulamin kaali ti yaap ma ulan-umba disa yo, kalokomup ema? Daa te! 15 God ali Moses ami bokola-lomda:
Kanola nali ban kemin unang tunum kii ma olen-daayon o, kali namti, nali olen-daaya-lom kukup tambal kaata-kup kuyokomi aa, unang tunum mokopso kebip iyo ma olen-daayon o, kali namti, olen-daaya dong dokoyokomi no,
kalsa. 16 Kemin, God ami unang tunum ulamin kaami kukup kaa kanumin kemin, unang tunum ili boko-lomdip: Kapni unang tunum kelum o, kalbup kemin, kabi numi uldaa-yim-buulan o, kebip aye, kukup tambal kaata dukum-kup fukulupla, God ayo numi fiyaap-kup duu-bam uldaa-yim-buulak o, kebip aye, kii disa; God almi aket fukunin kaata-kup unang tunum iyo ulela-lomda, olen-daaya-laaba. 17 Kemin, God ami Sukon Tem kabak-ali boko-lomdu:
God ayo Isip kayaak imi king ami bokola-lomda: Nali kapso din-bomdup nami titil kaata, unang tunum alik imi kukuyilila, am bokon kala dik-daa kulaasu iyo utam-ilomdip nami win kaata, kufup-nin o, kala-lomdila, kabi uldaa-tam-buuliya king kelawa, kanolin kukup kalawaata kup-tiya alik iyo utabip o,
kalsu. 18 Kanolin kemin, nokol kaa ti utamum, God ali tunum ma olen-daalalon o, kala kaa, tunum kaami ban kemin ayo telakin. La, kela-lom olen-daala-lomda kukup tangbal ata-kup kukaalokoma le, kuno tunum ma ami aket kufoliya, fuut-tabemak o, kala, kaa God ali sawaayak Isip kasel imi king ami aket kufolaya, ayo fuut-tabemsa tap ke kano kufolaya, ayo fuut-tabe-mokoma no, kalsa.
God ata numi aket atul kuyale aa, olen-daayila kemin kaami sang kaata ko
Rom 2:3-5, 3:25-26, 2Pit 3:15
19 Kemin, kabi bokop-na-lom: Kanta ti God kaa dil molala, ami fanang saanin kanuba ayo asuk kelama disa; God ata tunum ami aket kufolaya fuut-taben-umba. Kemin, God ata tunum ami bokola-lomda: Ee, yak kanubap kaali, ban kebap o, ken-umba kaa faleluya kanum-laaba disa yo, kebap ema? Kaa disa yo! 20 Kabi tifan tunum kemin ale, dok kano-lomdawa God ami titil tabin weng kaa bokolalap i? Faldak-tiimin weng ma kalawa utamum. Tawaal fuk-duu ima fuumin ket talalmin kaali, tunum almi sikiltup talalmin kemin, ket kaali, asuk tunum dotuba almi bokola-lomda: Kabi kanimin o, kala nali kalanola nam-talalubap yoko? akokoma nema? 21 Tunum tawaal fuk-duu-lom ima fuumin ket talalmin ayo tawaal ma fuk-duu-lomda talalulokoma kaali, ma kaptoop-ata ima tini-bam inin ket, suunkup fukumin disale; ket malo kiita ma kaptoop-ata almi ima suunkup fuu-bam inin ket. Yale, ami kanolin kukup kaa kanolokoma kaa tituun-kup tabin disa yo, kebap ema?
22 God akal ti kanose. Kemin, ami aket kaali, Nami aket atul ayo kutaltam-daaliya, unang tunum alik iyo nami titil kaata, atamik o, kalalala, unang tunum nami aket atul tabemin ayo yak imi diim abamnu keyokomi yakal yam-mafak-daa kelon o, kalase. Yale, aket atul ayo abiltap-siik kuyin disa bomda fen-tabasa. 23 Kemin, ami aket kaali, Unang tunum iyo God nami abip atin ti falala-kup kalsu so, umi kiit kon so, kiita kukuyila utamin o, kala-lomda God almi kukup tambal kaata, unang tunum iip maakup maakup imi kuyokoma. Kemin, nuyo olen-daaya-lomda weng umuuya dotuya kesa. 24 Kemin, naan-daayase kaa unang tunum kiili, Kristen nuta kemin Juda kayaak nuta-kup daa; yak tunum miit kusnum iso naan-daayase. 25 Kemin, Hosea ami sukon ma dolsa kabak akal ti God ayo bokoya-lomda:
Unang tunum kiili, nami unang tunum disa; lale, am ma daanuya kawu, nalmi unang tunum ke-lokomip o, yokokomi. Ale, nali kiimi aket kuyinsi disa; kata ilom kawu imi aket ma kuyokomi no, kalokoma kayi!
kala-lom God kaa kanum bokosa. 26 Aa, Hosea ayo weng ma boko-lomda:
God kaa kipni im-taldang-daa bokoya-lomda: Ibi nami tunum unang disa yo, kalsa ulmi baan diim kabaaku, kayak kayak iyo bokoya-lomdip: Kii suunkup ilin God ami man o, kalokomip kayi!
kalsa.
27-28 Aisaya akal, Israel kayaak imi sang ma bokoya-lomda:
Dukum ayo am bokon alik kalawaali, unang tunum alik kiili yam-kuku-bamda im-bak-saanokoma kabaku abiltap ilmi kukup mafak nun-umbip kaami sisol ayo tituun-kup tiiyokoma. Kemin, Israel imi man loop dip-tiilokomip kaptoop-ali ti yol ok balang diim kaami ok dinin alaltap ke-lokomip. La, God ali atin iip maakup maakup kiita-kup, dotu-yimulala iyo yaap-nokomip o,
kalsa. 29 Aisaya ayo kaami sang almi kaal-kemin weng ma bokoya-lomda:
Kanola God kaa titil-kup tabasa ayo numi tunum malo ma keyokoma iyo disa dinam, nuli Sodom so, Gomora so, ili God ata anula disa kesip tap kelakin. Yale, malo ma iip maakup maakup nuyo keyila ilokomup o,
kalsa ko.
Israel iyo kukup tambal kaata kutal-fukulipla, God ayo bokoya-lomda: Ibi tituun-kup tabin unang tunum kelip o, yakan-kaa-bisa disa kaami sang kaata ko
30 Kanum bokosip kemin ale, kaali kanimin o kalokomup? Numi weng bokolokomup namti kala bombe. Yak unang tunum miit ma ma ili kukup tangbal kaata tabuuluwa, God ayo bokoya-lomda: Ibi tituun-kup tabin unang tunum o, yakak o, kala-lomdip dukum-kup kutal-fuku-biisip disa; ili God nami lak kaata duulip o, kalale, ayo bokoya ko: Kipni ban kemin kaami uluum ayo disa keyilula, tituun-kup tabin unang tunum kelip o, kalase. 31 Kemin ale, Israel kasel ili ti lo kaata kutal-fukulupla, God ata bokoya-lomda: Ibi ti tituun-kup tabin unang tunum kayi! yakak o, kal-bomdiwa lo kuuta-kup fuku-bom biisip. Lale, atin talalu soko kutal-fukulin disa biisip. 32 Kemin, ili kanimin o, kalaliwa, lo kaa kutal-fukulin disa biisip i? Kabak-ali numi Yesus lak dakaamin kaami liip kaata kayi! kalaliwa disa; kemin, numi kukup tambal kaali, dukum-kup fuku-laamin kaami liip kabangu God kaa bokoya-lomda: Ibi tituun-kup tabin unang tunum o, yakak o, kalalipla iyo titil-fak-daa bom ilsip. Kemin, imi kanu-bam ilsip kaali, imi liip tal-une-bamdip yaan dabom kuyak tuum diim mo bangbaang daa daak aba-lom aket atul taben-umbip tap ke, Yesus ami lak kaa duulup disa yo, ke-bisip. 33 Kemin, God ami Sukon Tem kabak-ali Yesus ami sang faldak-tiimin weng ma ayo boko-lomda:
Weng selin! Abip Saiyon o, kala Jerusalam kawu, tuum ma tunum yaan dabom kuyak mo daak aba-lom aket atul tabemin o, kala tuum maman ma tunum yam-mafak-dakamin uyo kutiili. Lale, tuum o kala faldak tunum kalaami diim tiili kalawaali, dok kanolin unang tunum iyo ma ami lak duuliwa kawu, ali imi daang ukuyilala, fatom duk-duulokomip disa yo, kala
