Rom 13

Nuli gavman ami minlo tem kulu bomduwa yo, kalin kaami sang kaata ko

Mat 22:15-22, 1Tim 2:1-4, Tat 3:1, 1Pit 2:13-17

1 Kanola God alalta gavman kiili ulela im-tiisa kemin, kiili ilta iip kulu tiltam tabasip disa; gavman alik imi ok kaali, God almi sikil diim kawu tiltam taba-yaabip. Kemin, tunum alik kiili gavman ami weng kaata-kup weng san-kaa-bamdiwa yi! 2 Kemin, tunum kaa kanta gavman ami weng uyo kuyang saak tiiba namti, kaali God ami weng namti kulu kuyang saak tiiba kemin, kaami maan uyo kuluulokoma ko.

3 Kemin, gavman kiili bomdiwa iyo kukuyin-bilipla kawu, kukup tambal kaata-kup kutal-fukulin kiita, suunik o kala-somdipya disa; kukuyin-bilipya, kukup mafak-kup kutal-fukulin kiita, suun-bamdipla, kukup mafak kaata kambolin o kal-bomdipya, kukuyin-bam, sok dina-yin-bam ken-umbip. Kemin, kabi gavman kaami atul kulaa suunin disa kelon o kalbap namti, kuno ti kukup tambal kaata-kup kutal-fukulapla kawu, gavman ita kano kapni win uyo kufup-tam-biliwa yo! 4 Kanola kiili God ami okok kamalin tunum kemin, dong dakaap-tam-bulupya, tambal-kup ilan o takan-kaabip. Katale, kabi kano ban kemin-kup kemap namti, gavman kii sok de-tamulokomip. Ale, asukum kuluu te-mokomip, aa tan-kutiilip taanokomap. Kemin, kabi suun-bamdawa ko. Gavman kiili, God ami ok tabuulin tunum kemin, tunum ayo kukup mafak-kup kema kaali, kanolin isiik maan tiiya-laamin kaami ok fukulin tunum iyo kaa bom-bilip te! 5 Gavman kiili, kanum-yaabip kemin, nuli imi min lo tem un-ilomdupya yo, kala-somya. Kemin, gavman ami weng kutal-fuku-yaamin kaami miit kaali, God ata numi kukup mafak kaami maan tiimin ami atul kaata-kup, suun-daaluwa disa; nuli aket fukun-ilom atamuwa yi, Kiimi weng kaali, atin tituun-kup tabin u, kala-somdupya, kutal-fuku kulii-una-bulupya yo!

6 Kemin, Ata no, kala-somdapya kemin, gavman ami takis moni uyo kukaan-bam kem-tabasap. Kemin, kaa dok kata disa: gavman kiili, God ami okok kemin tunum kemin ale, ok kalawaali titil-fak-daa bomdipya kemin, kutal-fuku kulii-talan-umbip te! 7 Kemin, kanola gavman ayo taba-lomda, Kanuman aa! kalip namti, imi weng kaata-kup weng san-kaa-bom ale, dok kanumin dok kanumin liip takis uyo kuyan o kalip namti, kukaayin-bam ke-mokomap. Ale, gavman imi minlo tem un-ilom ilokomap aa, kapni kamokim ami win uyo kufon-bamdaple, ami tong kaata bakaan-balap, ami fiyaap uyo duu-bam ke-bamdawa yi!

Lo uyo atin ti kutal-fuku-bom ilin kaami sang miit kaata ko

Mat 19:18-19, 22:34-40, Gal 5:13-15

8 Kanola ibi tunum kaami mafek mafek uyo kuluu-lomdip maan kukaalin kaali, abiltap-siik koliwa kawu, atin ti alik disa keluk o. Lale, God ali numi weng kaa dukum-kup bokoya-lomda, Ibi kaptum kusal kiimi aket-kup kukaayin o, kalase kaali, maan tiiyin tap kemin, kuyokomip kaali, atin ti alik disa ke-laamin disa; kuno kuli yakyak ken-unuk o. Kemin, ipkal kaata suunkup kanu-biliwa yo. Kaa dok kata disa: dok kanolin tunum kaata aptum kusal imi aket-kup kuyinba namti, kaata atin tituun-kup tabin lo kaata kutal-fukulin tunum namti kaa bombe ko. 9 Kulaali, nokol utamsup taa, Lo uyo boko-lomdu:

Kabi unang din tunum din iyo sadikimin daa. Aa, kabi tunum kaali, aalap taan-yaamin disa. Kabi yukut kaa inin disa. Kabi kap-tunum kusal ilmi mafek mafek kaami kalan kaa tal-kaayin dinim o

kalsu. Kemin ale, lo kalawuso, lo kusnum malo yaapkan bom-bilip kiiso, alik kiimi miit diildiil kulaali, maakup; kemin ale, diildiil uyo boko-lomdu:

Kabi ti kaltapni angtiil lak kaata duu-bom tiin saanbap ulultap kelawa, kap-tunum kusal kayak kayak imi aket kaata-kup kukaayin-bamdawa yo!

kala kanum bokosu. 10 Kemin, tunum ayo aptum kusal kayak kayak kusnum kiimi aket-kup kukaayila kaali, kukup mafak kuuli ma kanu-mokoma disa; ali atin ti lo kutal-fukulin tunum namti kulu bombe.

Nuli tituun-kup tal-une-bam tiin-bom ilin kaami sang kaata ko

11 Kemin, kipkal am kula daanu kulaali utabip o, kalaliya, bokoya-lomdi: Kanolin kukup kaali, kanolin kayi kalbi kemin, kulaata kipni akan-unsip uyo kulaa-somdip, tam tiin baalin aa! Ti ipkal utamin! Siin kaali, nuli kama tiltam Kristen unang tunum ke-sulup kaa, God ami yim-tama tam almi abip daalama. La, uyo samaan kaptoowu bom-iluya kemin, kemin ale, kamala kulaali tal mepso talsu. 12 Kemin, kutamiip uyo mepso disa kelule, am mafiing uyo mepso daanon o kalbu kemin, kukup mafak kutal-fuku kutamiip tem kabangu bom-bulup kaa, alik kambowa tildang falala-kalin diim tal-bomdupla, numi waasi dinin kaami ilim kuuli, miki-somdupya yo! 13 Nulumi tal-unemin, tiin-yaamin kaali, ti tunum ami kaa fatap diim kulu tal-uneba ulultap kanu-bamdupya, nuli fuut-taben tal-une-bam ok mafak in-bomdup babon-babon kemin disa; aa sadikimin uyo kanu-bam ale, yak kukup mafak mafak fatom tabasu uyo kanumin disa; aa nuli aket atul-kup tabe-bam ale, tunum kusnum imi mafek mafek uyo disa kawu mok in-bom tiin-nenin disa; 14 ibi Kamokim Yesus Kraist ami lak uyo duulip kulaali, ali tal kipni diim ila kaali, ipni waasi dinan-tal-unemin kaami ilim mikimin ulultap kemin, ibi yak iltipni aket fukunin umi taba-lomdu, yak kanumin kanumin kukup mafak kaata kanumin o, kalbu kaali, yang kanum tal-unemin disa kayi!

<- Rom 12 Rom 14 ->