इब्रानियों की चिट्ठी

परिचय

इब्रानियों की किताब एक बढ़ावा देन बारी चिट्ठी है जो दर्साथै कि कैसे ईसु पुराने नियम की तमान भविस्यवाँड़ियन कै पूरो करी। जौ एक उपदेस के जैसे लिखी गई रहै। इब्रानियों मैं पुराने नियम के 60 से जाधे संदर्भ हैं जो सपा रूप से दिखाथै कि कैसे ईसु भविस्यवाँड़ी और यहूदि बड़े पुजारी के कर्तव्य कै पूरो करी। जौ बजह से जौ किताब यहूदि मसीहियन कै बढ़ावा देन बारी रहै। इब्रानी दिखाईं कि कैसे ईसु नियम कै पूरो करी ताकी पुजारिन कै फिर कहु कुरबानी ना देने पड़ै। ईसु सबै पापन के ताहीं एक बार और हमेसा के ताहीं कुरबानी दई।

इब्रानियों कै कौन लिखो, जौ कोई नाय जानथै, लेकिन विद्वान, प्रेरित पौलुस, लूका या बरनबास जैसे सुझाव दईं हैं। लिखन की तारीक भी पता नाय है लेकिन भौतन को माननो है कि जौ ईसु के जनम के 70 साल पहले लिखी गई रहै। यरूसलेम सहर कै सन 70 मैं नास कर दौ गौ रहै, लेकिन जौ चिट्ठी के लेखक यरूसलेम के बारे मैं बात करथैं जैसे कि जौ हबऊ ले नास नाय भौ रहै। इब्रानियों की किताब कै रोम सहर मैं लिखो गौ रहै और हुई सकथै निरी कलीसियन मैं प्रसारित करो गौ रहै। 13:24

रूपरेखा

1. लेखक दिखाथै कि ईसु परमेस्वर के भविस्यवक्तन और स्वर्गदूतन से स्रेस्ठ है। 1:1–4:13

2. फिर बौ दिखाथै कि ईसु बे पुजारिन से स्रेस्ठ है जो यरूसलेम मैं परमेस्वर के मंदिर मैं सेवा करथैं। 4:14–7:28

3. संगै ईसु की सेवकाई बौ पुरानी वाचा से भी स्रेस्ठ है जो परमेस्वर अपने लोगन के संग बौ नियम के जरिया करी जो बौ मूसा कै दई रहै। 8:1–10:31

4. जौ समझान के बाद कि ईसु हर तरहन से स्रेस्ठ है, लेखक कई व्यवहारिक निर्देस देथै। 10:32–13:17

5. अंत मैं लेखक कुछ बढ़ावा और अभिवादन के संग चिट्ठी कै खतम करथै। 13:18-25