यूहन्ना की तीसरी चिट्ठी

परिचय

3 यूहन्ना की चिट्ठी प्रेरित यूहन्ना के जरिया मसीह के जनम के 50 और 100 सालन के बीच लिखी गई रहै। यूहन्ना खुदकै लेखक के रूप मैं नाय मानथै, बल्किन खुदकै बड़ो-बूढ़ो कहथै1:1। बौ 2 यूहन्ना मैं भी ऐसोई करथै 1:1। ऐसो मानो जाथै कि यूहन्ना इफिसुस मैं रहत भै यूहन्ना और तीन किताबन कै 1 यूहन्ना, 2 यूहन्ना और 3 यूहन्ना लिखी रहै।

यूहन्ना जौ चिट्ठी गयुस नाओं के एक विस्वासी कै लिखी रहै। बौ गयुस कै एक दोस्त के रूप मैं संबोधित करथै और बाकै मसीह भईय्यन की तरफदारी करन को निर्देस देथै जो बौ छेत्र से सफर कर रै हैं।

रूपरेखा:

1. यूहन्ना अपनी चिट्ठी को परिचय देथै। 1:1

2. फिर बौ गयुस कै प्रोत्साहित करथै और बाके भईय्यन की तरफदारी करन को निर्देस देथै। 1:2-8

3. जाके बाद, बौ दुई दुसरे लोगन, दियुत्‌रिफेस और दिमेत्‌रियुस की बात करथै। 1:9-12

4. आखरी मैं बौ अपनी चिट्ठी खतम करथै। 1:13-14

1 बड़े-बूढ़ेन से मेरे प्रिय गयुस, जोकै मैं सच्चो प्रेम करथौं।

2 मेरे प्रिय दोस्त, मैं मन से प्रार्थना करथौं कि तेरे संग सब कछु अच्छो होबै और तैं अच्छी सेहत को रहबै, काहैकि मोकै पता है कि तैं आत्मा से अच्छो है। 3 मोकै बड़ा खुसी भइ जब कुछ संग के मसीह भईय्या आए और मोकै गभाई दईं कि तैं सच्चाई के प्रति कितनो वफादार है, जैसे तैं हमेसा से सच्चाई मैं जीथैं। 4 जितनी खुसी मोकै जौ सुनकै होथै कि मेरे बालका सच्चाई मैं जीथैं उतनी खुसी मोकै और कोई बात से ना होथै।