1 मेरे भईय्यौ और बहेनियौ हम तुमकै परमेस्वर के बौ अनुग्रह की खबर देथैं जो मकिदुनिया की कलीसियन मैं भौ। 2 बड़ा खतरनाक परेसानी मैं उनकी बड़ा खुसी और भारी कंगाली मैं एक हुईकै उनकी बड़ी दया छलक पड़ी है। 3 उनके बारे मैं मेरी जौ गभाई है कि बे ना खाली उतनोई दईं, जितनी उनकी सामर्थ्य रहै पर कहूँ अगरो दईं हैं, जौ बे अपने मन से दईं हैं। अपनी इच्छा से 4 बे तौ हमसे खूबै नहोरे करत भइ आनो चाँहीं कि उनकै पवित्र लोगन के अनुग्रह की मदत मैं यहूदिया की सेवकाई की संगती मैं आन को मौका मिल जाबै। 5 और जैसी हम आस रखे रहैं! बैसिये नाय; और बे प्रभु कै, फिर परमेस्वर की मरजी से हमकै भी अपने आपकै दै दईं। 6 जहे ताहीं हम तीतुस कै समझाए कि जैसो बौ अग्गु सुरु करी रहै, जाकै जारी रखन और प्यार की जौ खास सेवा अनुग्रह के जरिया पूरो करन मैं तुमरी मदत करन के ताहीं। 7 जहे ताहीं जैसो तुम हर बात मैं मतलब बिस्वास, बचन, ग्यान, और हर तरहन की परेसानी मैं, और प्यार मैं जो तुम हमसे करथौ, बढ़त जाथौ, बैसिये जहो अनुग्रह और दान के काम मैं उत्सुकता से बढ़त जाबौ।

8 मैं कोई आग्या नाय बनाए रौ हौं। पर जौ दिखान ताहीं कि दुसरेन कि मदत करन के ताहीं कितनो खुस हौं, मैं जौ परखन की कोसिस कर रहो हौं, कि तुमरो खुद को प्यार कितनो सच्चो है। 9 तुम हमरे प्रभु ईसु मसीह के अनुग्रह और किरपा कै जानथौ; बौ जितनो सेठ रहै, बौ तुमरी खातिरदारी के ताहीं खुदकै कंगाल बनाए दई, ताकी तुम बाकी गरीबी की बजह से सेठ बन सकौ।

10 जौ बात मैं मेरी राय जहे है, जामैं तुमरो भलो है पिछले साल तुम दान दै भी और दान देन की इच्छा मैं तुम अग्गु रहो। 11 जहे ताहीं, जो काम तुम सुरु करे रहो, बाकै पूरो करौ, जौ काम कै खतम करन ताहीं बैसिये तेजी दिखात रहाबौ, जैसे जाकी तैयारी करन दफे रहो। जाकै खतम करन दफे अपनी बेईं पूँजी और हिम्मत से करौ, जो जौ समय तुमरे पास है। 12 अगर कोई की दान देन की इच्छा है, तौ जो कछु बाके झोने है, बहे के हिसाब से बाको दान अपनाओ जागो, ना कि बाके हिसाब से, जोके झोने नाय है।

13 हमरो मतलब जौ नाय है कि दुसरेन की भलाई करन के चक्कर मैं तुम खुद दुख झेलौ, हमरो लक्छ खाली फैसला करनो है। 14 जौ समय तौ तुमरी बढ़ोतरी उनकी जरूरत पूरी करन ताहीं काफी है, कहु जहो हुई सकथै कि तुम्हऊँ कै जरूरत पड़ै, और बे अपनी बढ़ोतरी मैं से तुमरी मदत करैं, तौ दोनों पक्छ बराबर हुई जांगे। 15 सास्त्र मैं जैसो लिखो है, “जो गजब जोरी है, बौ कछुए अगरो नाय पाई, और जो कम जोरी है, बौ कछु कमी महसूस नाय करी।”

16 तीतुस के मन की उत्सुकता से मैं तुमरे ताहीं ऐसी खुसी जगान ताहीं मैं परमेस्वर को धन्यवाद देथौं! 17 बौ हमरो प्रोत्साहित करनो मान लई और गजब खुस हुईकै बौ अपनी मरजी से तुमरे झोने गौ है। 18 हम बाके संग बहो भईय्या कै भेजे हैं, जोको नाओं सुसमाचार के बारे मैं सब कलीसियन मैं फैलो पड़ो है। 19 इतनोईं नाय, और बौ कलीसिया के जरिये ठहराओ भी गौ है, कि जौ दान के काम ताहीं हमरे संग जाबै। हम जौ सेवा जौ ताहीं करथैं, कि प्रभु की महिमा और हमरे मन की तैयारी दिखाए जाबै।

20 हम जौ बात मैं चौकन्ने रहथैं, कि जे भले काम के बारे मैं, जोकी सेवा हम करथैं, कोई हमरे ऊपर उँगरिया नाय उठाए पाबै। 21 हमरो लक्छ खाली बहे है, जो ना खाली प्रभु की नजर मैं, बल्किन दुसरेन की नजरौं मैं सई है।[a]

22 जहे ताहीं हम अपने भईय्या कै उनके संग भेज रै हैं; हम तमान बार बाकै परखे, और देखे कि बौ हमेसा मदत के ताहीं बड़ा बेचैन रहै, और सब जब बाकै अपने आप मैं इतनो भरोसा है, तौ बौ मदत के ताहीं औरौ भौत बेचैन है। 23 अगर कोई तीतुस के बारे मैं पूँछै, तौ बौ मेरो संग को और तुमरी मदत करन ताहीं मेरे संग काम करथै; और अगर हमरे भईय्यन के बारे मैं पूँछै, तौ बे कलीसियन के भेजे भै और मसीह की महिमा हैं। 24 और अपनो प्यार और हमरो घमंड जो तुमरे बारे मैं है, कलीसियन के अग्गु पूरो करकै उनकै दिखाबौ।

<- 2 कुरिन्थियों 72 कुरिन्थियों 9 ->