यूहन्ना की पहली चिट्ठी

परिचय

1 यूहन्ना की चिट्ठी प्रेरित यूहन्ना के जरिया मसीह के जनम के 50 से 100 सालन के बीच लिखी गई रहै। यूहन्ना खुदकै लेखक के रूप मैं नाय पहचानथै, लेकिन पहलो अध्याय दिखाथै कि बौ ईसु के जीवन और पुनरुत्थान को एक देखन बारो है1:1-3। 1 यूहन्ना मैं लेखन सैली भी यूहन्ना के अनुसार सुसमाचार मैं मिली लेखन सैली से काफी मिलती-जुलती है। ऐसो मानो जाथै कि यूहन्ना इफिसुस मैं रहत भै यूहन्ना के सुसमाचार के अनुसार जे तीन पत्‌री 1 यूहन्ना, 2 यूहन्ना और 3 यूहन्ना लिखी रहै। यूहन्ना जौ चिट्ठी सबै मसीहियन कै ऐसे समय मैं लिखी रहै जब कलीसिया कै “नोस्टिक्स” नामक लोगन के एक समूह से परेसानी होत रहै। इन लोगन को माननो रहै कि ईसु पूरी तरह से परमेस्वर रहै लेकिन पिरथबी पर रहत भै बौ बास्तव मैं मास और खून के सरीर बारो इंसान नाय रहै। जौ बजह से यूहन्ना ईसु के जीवन कै देखन के बारे मैं लिखथै और जौ कि बाके अपने हात ईसु कै छुइं1:1-3। जौ चिट्ठी कै लिखन मैं यूहन्ना को उद्देस्य बाकी खुसी कै पूरो करनो रहै 1 यूहन्ना 1:4, विस्वासिन कै पाप करन से रोकनो 1 यूहन्ना 2:1, विस्वासिन कै झूठी सिक्छा से बचानो 1 यूहन्ना 2:26, और विस्वासिन कै बतामैं कि बे सच-मुच बचाए गै हैं। 5:13

रूपरेखा:

1. यूहन्ना अपनी चिट्ठी को परिचय देथै और जाकै लिखन को एक उद्देस्य देथै। 1:1-4

2. फिर बौ बताथै कि परमेस्वर कैसे उजीतो है और हमैं ईसु की तरह जीनो चाहिए। 1:5–3:10

3. जाके बाद बौ हमैं एक दूसरे से प्रेम करन की आग्या की याद दिलाथै। 3:11–5:12

4. बौ अपनी चिट्ठी कै खतम करथै। 5:13-21