Filipenses 2

1 Eni ga pjãy töno tjeng Cristo tjok kuzong ga pjãy kong dbo twe ĩyado. Pjãy woyde ara kjĩshko ga pjãy woydë l̇l̇ëme. Sbö Sëya tjeng bomi tjok ĩyado. Pjãy songe l̈e Sbörë bakoe. 2 Eni kuzong ga l̇l̇ëye l̈ër bomi kong l̈i shäryozĩa. Pjãy wotjl̈ĩs jong kjrinaso, l̇l̇ëye woyotjl̈ĩmi kës l̈i shäryëmi ga pjl̈ú wl̈o. Pjãy ëng woydos ara kar kar, pjãy ber l̈öng ëng tjok wopjl̈ú wl̈o. Shäryoromi eni ga tja ber wopjl̈ú kësbang eshko. 3 Pjãy l̇l̇ëbo shäryë, pjãy äär ber tjwl̈õ ara wl̈o l̈ëmi l̇l̇ëme. Pjãy opyë tjwl̈õ ara obl̈ë kjinmo l̇l̇ëme. Obl̈ë iozĩ ber tjwl̈õ ara bomi kjinmo dey. Pjãy ber wotöshko. 4 Pjãy l̇l̇ëbo wl̈ẽk pjl̈ú bomi kong dö l̇l̇ëme. Wl̈ẽzĩ ber pjl̈ú obl̈ë kong bakoe. 5 Cristo Jesús, e wotjl̈ĩk sorë ga pjãy wotjl̈ĩk eni bakoe.

6 Kjok shäryayde Sbörë l̇l̇ëm obishko ga e Sbö jl̈õkoyo, tjwl̈õ baĩya dik bakoe.

Gueniyo ga «Tja ber sök jũshko tjwl̈õ ara ĩyado wl̈o» l̈ara l̇l̇ëme.

7 Opyono beno shäng tjwl̈õ l̇l̇ëm,

parkaga tjwl̈ẽk shäng pjir wl̈eniyo dik,

weno no, so shji kjoyoe.

8 Eshko ga opyono beno shäng wotöshko anmoyõ.

Ba Data kol̈ara kjĩshko ga

opyono beno wol̈on pjang kjl̈ös go, nopga owa wl̈eni.

9 E kjĩshko ga iara Sbörë beno tjwl̈õ ara anmoyõ,

obl̈ëga kës l̈i kjinmo.

10 Shäryara eni, uunkong kjök tok ba kong wl̈o,

ëye l̈öng kjok dogo, ëye l̈öng kjok ëre kjing go, ëye l̈öng kl̈ung ëre dorko bakoe.

11 Eshko ga «Jesucristo, e bi pjl̈uyo jl̈õe» l̈e l̈ok uunkong.

Eni ga Data Sbö ber tjwl̈õ ara bakoe.

Shji l̇l̇ëbo shäryë pjl̈úe

12-13 Pjeyoga, Sbö, e drön ëë bomi tjok, l̇l̇ëye l̈e l̈i shäryëmi eni wl̈o. Tja shäng bomi tjokshko ga tja kol̈oromi pjl̈úe. Era eerishko ga tja shäng pjola ga woyde ga pjãy drön ëë, Sbö kol̈ë, bangkjrë ĩyado wl̈o. Pjãy döra l̇l̇ëbo pjl̈ú ëre kong wl̈o.

14-16 L̇l̇ëye shäryëmi dö ga shäryozĩ l̈öng wopjl̈úe. Shji kjl̈oshtë l̇l̇ëm, shji ëng dboryë kar kar l̇l̇ëm bakoe. Eni ga pjãy l̈öng pjl̈o bek, pogo l̇l̇ëye dret Sbö bokso. Pjãy Sbö wapga tjän, pjãy l̈öng nopga owa jëk l̈öng pjl̈o bek l̇l̇ëm l̈i tjrëko gueniyo. E kjĩshko ga pjãy l̇l̇ëbo owa shäryë l̇l̇ëme. Eni ga shji ber l̈öng së jl̈õkoyo sorë tjl̈õkwoyo l̈i l̈ëmi nopga kongshko ga pjãy ĩya l̈ok ga obl̈ë, dbala l̈ok shjiy kjok ro sĩ roshko wl̈eni. Eni ga Cristo tjwe iröng obishko ga tja wopjl̈ú bomi kjĩshko, pak shäryoror l̈i beno tjwl̈õ ara kjĩshko. 17 Pjãy mär l̈öng Jesús go kjĩshko ga pjãy shdungoba l̈öng songe. Ga miydër ga tja kjwe zrökoba, tjl̈õkwo l̈oror bomi kong kjĩshko. Eni ëmdë ga tja wopjl̈úe. Tja wopjl̈ú bomi kjĩshko bakoe. 18 Pjl̈ú wl̈o ga l̇l̇ëye wen bomi kongshko ga pjãy l̈öng wopjl̈úe. Ga pjãy ber wopjl̈ú bor kjĩshko bakoe.

Timoteo, Epafrodito

19 Pjãy roy miydër woydë, tja ber wopjl̈ú wl̈o. E kjĩshko ga tja kjimte Tjl̈apga Jesúsdë ga Timoteo, e ichër jek mal̈ing bomi ĩk, pjãy roy söya bor kong wl̈o l̈ër. 20 L̇l̇ëbo ber pjl̈ú bomi kong sorë l̈i woyotjl̈ĩya shäng jl̈õkoyo ĩyado botoya dik. Ëye obl̈ë, pjãy woyotjl̈ĩya eni l̇l̇ëme. 21 L̇l̇amo l̈öng ëreshkora, l̇l̇ëbo baĩya woyotjl̈ĩyde. L̇l̇ëbo Jesucristo ĩ, e woyotjl̈ĩya l̈öng l̇l̇ëme. 22 Gueniyo Timoteora parkë shäng bor tjok Jesús roy pjl̈ú l̈ë oba kong, wapga parkë l̈öng ba data tjok sorë ga eni. E miydoromi tjän. 23 Eni ga ichër woydë jek bomi ĩk, tja därde, de tja där l̇l̇ëm, e miydoror guing. 24 Ga miydër ga tja kjimte Tjl̈apgarë wop ä ga jek bomi ĩk bakoe l̈ër.

25 Bi kjl̈ara Epafrodito, e ichoromi tek bor kong, tja kjimte bomi ãska wl̈o. E parkono shäng bor tjok pjl̈ú, dröno ara bor kjimtë Cristo roy l̈ë. Gueniyo pjl̈ú wl̈o ga ichër jek woydë bomi shwoy iröng obi. 26 Pjãy ĩya woydë arae. Miyde ga swl̈o ara roy kuromi, ga woydë ara e kjĩshko. 27 Öör buk swl̈o ara jl̈õe. Wol̈ono seke. Gueniyo songe l̈ara Sbörë, ga kjimtara. L̇l̇ëye shäryara ba kong l̈i beno bor kong pjl̈ú bakoe. Tja song ĩyado. E wol̈ono kjwe ga tja beno sök woydë ara eshko. 28 E kjĩshko ga ichër jek woydë bomi shwoy mal̈ing, ĩnomishko ga pjãy ber l̈öng wopjl̈ú obi wl̈o, tja sök woydë ba kjĩshko ame wl̈o. 29-30 Tja kjimtëmi om go ga ä kjĩshko ga shrono shäng na bor kjimtë bomi ãska. Parkë shäng Cristo kong ëreshkoshko ga wol̈ono seke. E kjĩshko ga jek öötong shäng bomi shwoyshko ga wl̈okjrozĩ l̈öng wopjl̈ú, bomi kjl̈ara wl̈eni. Ëye parkë baĩya dik ga bangkjrozĩ bakoe.

<- Filipenses 1 Filipenses 3 ->