Hechos 2

Jesús tjl̈õkwo kjragaga go Sbö Sëya shrono beno kësbang ba tjok

1 Öötong judío dbar shrëzl̈ong dbaryo kowe l̈ok Pentecostés[a] ga Jesús tjl̈õkwo kjragaga töno l̈öng uunkong uyo kjwaraso. 2 Jekdo eshko ga kuya l̈ok ga l̇l̇ëye ter kjok dogo dwayo pjl̈uk träk l̇l̇ëm, pjl̈uk tjwe jong ri ri dbo träk l̇l̇ëm wl̈eni, ga töno beno pjang u l̈i roshko, epga l̈öng l̈ishko. 3 Eni ga l̇l̇ëbo weno kãl̈ã iök pjë jong ri ri wl̈eni, so kjyorkwo kjoyo, ga beno eni kjl̈ara kjl̈ara kjing go. 4 Eshko ga uunkong go Sbö Sëya shrono beno kësbang ba tjok. Eni ga tjl̈ẽ l̈öng kjok shto obl̈ë obl̈ë so tjl̈õkwo go, iara Sbö Sëyarë tjl̈ẽ sorë ga tjl̈ẽ l̈öng eni.

5 E dbaryo ga judíoga l̈öng Jerusalén kjokyo, Sbö poshrëk l̈öng enido wl̈eniyo shrono l̈öng kjok shto obl̈ë obl̈ë uunkong dwayo. 6 Pjl̈uk jong kës l̈i kura l̈okshko ga töno l̈öng eshko. Eshko ga kura l̈ok ga Jesús tjl̈õkwo kjragaga tjl̈ẽ l̈öng kjl̈ara ĩ ĩ ba tjl̈õkwo baĩya l̈ayde. Ga wojeno l̈önge. 7 Eni ga beno l̈öng pol̇l̇äk, yëy l̈e erä. Ga tjl̈ẽ l̈ok ëng kong ga «¿Kjwepga Galilea sopga dö l̇l̇ëmdo? 8 ¿Kuy ga tjl̈ẽ l̈ok bi tjl̈õkwo bishĩya kjl̈ara ĩ ĩ, e sorëro? 9 Jũshko shji nopga tjeng kjone pogo so: Partia so, Media so, Elam so, Mesopotamia so, Judea so, Capadocia so, Ponto so, Asia so, 10 Frigia so, Panfilia so, Egipto so, Libia so shrono l̈öng Cirene kjokyo worbo goshko, Roma so, 11 Creta so, Arabia so bakoe. Shji kjong kjong judíoga weno bukshko. Shji kjong kjong weno judío l̇l̇ëm, gueniyo shji kjl̈opswono beno Sbö tjl̈õkwo kjraga judíoga ĩ dik. Ga kuy l̈öng ga l̇l̇ëye shäryara Sbörë kësbang l̈i l̈e l̈öng bi kong bi tjl̈õkwo om go l̈i go» l̈e. 12 L̈öng yëy l̈e tjë jĩkong, l̇l̇ëbo woyotjl̈ĩya l̈öng miyde l̇l̇ëme. Ga tjl̈ẽ l̈ok ëng kong ga «¿L̇l̇ëbo tjeng kës ëre l̇l̇ë l̈okl̈o?» l̈e l̈ok eni.

13 Ga tjrëko l̈öng kjl̈öbö ba l̈ãywë owa, tjl̈ẽ ga «¡Kjwepga l̈öng nel̈õe!» l̈e.

Pedro tjl̈ẽno nopga ara kong

14 Eni ga Pedro kojono shäng Sbö tjl̈õkwo roy l̈agaga Jesús ãska l̇l̇amo dogl̈o sak kjwara kjingsho kjl̈ara (11) l̈i tjok, nopga l̈i bokshto. Eshko ga tjl̈ẽno ba kong l̈ok dbo go. Tjl̈ẽ ga «Pjãy judíoga, pjãy l̈öng ëreshko Jerusalén so tjë jĩkong, l̇l̇ëye ĩnomi kës ëre pjl̈ol̇l̇gwer bomi kong. L̇l̇ëye l̈ër bomi kong l̈i kuzĩ yõtsoe. 15 Woyotjl̈ĩmi ga domerga l̈öng ëre l̈öng nel̈õe l̈ëmi, miga eni l̇l̇ëme. Eni tjok ga dl̈o wenzong jã. Kjok eni ga ëye shäng nel̈õ l̇l̇ëme. 16 L̇l̇ëye shäryë pjang ëreshko l̈ara Sbö tjl̈õkwo l̈aga tek dënashko so Joeldë ba pjeyoga kong pjir tjän. Tjl̈ẽno beno eni:

17 »“Sbö tjl̈ẽ ga ‘Kjok pjir l̈ëshko ga

pjãy go bor Sëya ichër äär ber kësbang bomi tjok.

Tjl̈õkwo l̈ër bomi wapga domerga, wal̈ëga kong,

ga l̈e l̈ok oba kong eni.

Dwl̈asga,

era kong l̇l̇ëbo botoya ichër wen ĩya l̈ok yoshko wl̈o.

Tjl̈apga domerga këkboga,

era kong yo l̇l̇ë botoya ichër ĩya l̈ok wl̈o bakoe.

18 Eshko dbaryo ga bor parkagaga domerga, wal̈ëga,

era go bor Sëya ichër äär ber kësbang ba tjok,

e irgo ga l̇l̇ëye l̈ara ba kong l̈i l̈e l̈ok oba kong.

19 Kjopkwo go ga

l̇l̇ëbo ĩydëba l̇l̇ëm wl̈eniyo shäryër ara kësbang eshko.

Kl̈ung kjing go ga

ĩmi ga nopga ëng zrök ara, iök ara, yõ sho ara bakoe.

E ber tja tjwe döröe l̈okl̈o.

20 Tjl̈apga tjwe dbaryo,

e tjwl̈õ kësbang, e pjl̈ú, owa l̇l̇ëme.

Tjwayde l̇l̇ëm obishko ga

dl̈o, e kjl̈opswë ber kjok ro yẽt,

mok, e kjl̈opswë ber srëzrë́n, srëng wl̈eni.

21 Eshko ga ëye, tja rokara ba kjimtë ga

era döktonge’ l̈e Sbörë eni.”[b]

22 »Israel tjëyoga, l̇l̇ëye l̈ër l̈i kuzĩa. Jesús, Nazaret so l̈i l̇l̇ëbo ĩydëba l̇l̇ëm wl̈eniyo shäryono obl̈ë obl̈ë bomi tjrëko. E miydoromi pjire. Shäryono eni, e ichaga Sbörë miydëmi e go wl̈o. 23 Eni gueniyo ga e twaraba shäng bomi kongshko ga sharomi, ga l̈öromi pjang kjl̈ös go, zrömi wl̈o, ga pjãy kjimtaga nopga owa wl̈eniyorë. Tek dënashko ga e miydara, l̈ara Sbörë eni. 24 Gueniyo ga woshrara Sbörë iröng obi. Bäm go ga wol̈ono. E irgo ga döra eshko dwayo. Wol̈ono beno buk eshko, ber buk shinmo ĩyado wl̈o l̇l̇ëme. 25 Dënashko ga Pjl̈u David tjl̈ẽno Jesús kjĩshko. Tjl̈ẽno beno eni:

»“Tja Tjl̈apga ĩk enido bor bokshto.

Shäng bor zl̈ong bäng orkwo kël̈ëkong,

eni kuzong ga l̇l̇ëye bangkjrër l̇l̇ëme.

26-27 E kjĩshko ga tja wopjl̈ú,

tja të bor kjamo go woowa l̇l̇ëme.

Miydër ga bor doyo woshrëp iröng obi ber shäng së.

Tjl̈apga, tja iëp ber buk sakshko l̇l̇ëme.

Tja bop parkaga iak beno shäng dboy bop kong,

ga bor doyo iëp an ber buk eshko l̇l̇ëm bakoe.

Pja koshër shäng wopjl̈ú ĩyado e kjĩshko.

28 Tja woshrë iröng obi wl̈o ga irboyo pinop bor kong,

tja iorop beno sök bop bokshto ga tja ber wopjl̈ú, woowa l̇l̇ëme.”[c]

29 »Pjeyoga, tja tjl̈ẽ bomi kong jl̈õkoyo ga kuzĩ sira. Bi tjl̈apga tek dënashko so tjwl̈õ ara David, e wol̈ono, ga jnenaba buke. Ga ba sak l̈i buk bi tjrëko obi. 30 Gueniyo ga e Sbö tjl̈õkwo l̈aga. Miydara ga Sbö tjl̈ẽno ba kong jl̈õkoyo l̈i shäryë eni kjl̈uwe. Sbö tjl̈ẽno ba kong ga “L̇l̇ono ga bop tjëyo tek ber bop irgo l̈i tjrëko pjl̈u wen kjl̈ara ber no pjl̈uyo pja dik bakoe” l̈ara Sböre eni. 31 Eni ga pjl̈u l̈i weno ĩna shäng tjän wl̈eni, ga ĩna ga shinmotkono, gueniyo woshrono iröng obi. E kjĩshko ga tjl̈ẽno ga pjl̈u l̈i, e ie Sbörë ber buk sakshko l̇l̇ëm, doyo ie an ber buk eshko l̇l̇ëm, woshre iröng obi kjl̈uwe l̈e. 32 Pjl̈u l̈e l̈i, e Jesús l̈ayde. Era woshrara Sbörë iröng obi, ga tjawa tjë jĩkong beno l̈öng e ĩnorwa jl̈õe l̈aga. 33 E söra Sbörë to jem öötong sirkeno beno sök ba tjok ba orkwo kël̈ëkong, ga iara beno tjwl̈õ kësbange. Ga “Sbö Sëya, e twër ber bop kong” l̈ara Data Sbörë ba kong jl̈õkoyo l̈i, e twara beno ba kong. Ga borwa go Sbö Sëya ichara ba Warë ber kësbang borwa tjok. L̇l̇ëbo tjeng kës ĩnomi, kuromi l̈i e. 34-35 Dënashko ga David tjl̈ẽ ga

»“Tjl̈apga tjl̈ẽno bor Tjl̈apgayo kong ga

‘Pja tek wl̈ar ber sök bor orkwo kël̈ëkong,

äär jong bop moskwoga zanor pjir guing,

eshko ga iër ber tjeng bop wl̈oshko, ichëp wl̈o’ l̈e Tjl̈apgarë”[d] l̈e Daviddë eni, to jem kjok dogo l̇l̇ëm gueniyo.

36 »Israel tjëyoga tjë jĩkong, tjl̈õkwo l̈ër l̈i kuzĩ yõtsoe. E jl̈õe. Jesús zröromi pjang kjl̈ös go. Gueniyo ga iara Sbörë beno shäng bi Tjl̈apgayo. No pjl̈uyo iche tjwe l̈ara l̈i e» l̈e.

37 Kuya l̈ok ga woydono ara, wosonkono ara erä. Ga tjl̈ẽ l̈ok Pedro kong, Sbö tjl̈õkwo roy l̈agaga Jesús ãska l̇l̇amo l̈i kong ga «Pjeyoga, ¿l̇l̇ëye shäryërwa?» l̈e.

38 Kuya Pedrorë ga tjl̈ẽ ba kong ga «L̇l̇ëbo owa shäryëmi l̈öng l̈i, e owa jl̈õe l̈ozĩ, ga rayozĩ, ga pjãy nom kjl̈arashko kjl̈arashko, pjãy wëba jer di roshko Jesucristo ko go, owa pjang bomi go l̈i l̈ö̃ya Sbörë ber dret wl̈o. Eshko ga ba Sëya twe Sbörë bomi kong jl̈õkoyo. 39 Tjl̈õkwo ëre, e ber ëye rokara Sbörë ber ba nopga wl̈o l̈i kong uunkong, bomi kong, bomi wapga kong, ëye l̈öng pjola l̈i kong bakoe» l̈e.

40 Pedro tjl̈ẽno ara obi, nopga l̈i poshduna tjl̈õkwo obl̈ë obl̈ë go. Tjl̈ẽ ga «Nopga l̈öng eerishko wotjl̈ĩk owa l̈i shdũya Sbörë. E kjĩshko ga pjãy wotjl̈ĩk baĩya dik l̇l̇ëm, pjãy opkjos nopga owa l̈öng l̈ishko dwayo» l̈e.

41 Eni ga ëye ba tjl̈õkwo kjrono ga wara l̈ok jer di roshko tjë jĩkong. E dbaryo ga tjl̈õkwo kjragaga beno dogl̈o sak dbäw dbäw pjl̈ogl̈o mya (3,000) dik obi, ga töno l̈öng bäm go l̈i tjok. 42 Eshko jek l̈ëkong ga beno l̈öng tjl̈õkwo l̈e Sbö tjl̈õkwo roy l̈agaga Jesús ãskarë l̈i kuk, ga tön l̈ok ëng tjok ara ië wl̈o, syõshtë Sbö kong wl̈o bakoe.

Jesús tjl̈õkwo kjragaga, e l̈öng ëng tjok sorë

43 Sbö tjl̈õkwo roy l̈agaga Jesús ãska l̇l̇ëbo ĩydëba l̇l̇ëm wl̈eniyo shäryono obl̈ë obl̈ë nopga l̈i bokshto ara. E kjĩshko ga ĩna Jerusalén sopgarë ga yëy l̈e l̈ok tjë jĩkong. 44 Ga Jesús tjl̈õkwo kjragaga tön tjeng ëng tjok ĩyado, ga ba l̇l̇ëbo kës l̈i shdöya l̈ok ëng kong. 45 Kjong kjong kjok tjok ga soyneya, kjong kjong l̇l̇ëbo obl̈ë tjok ga soyneya, ga dburyo shdöya ëng kong, kjone ĩ l̇l̇ëm ga twe l̈ok ba kong opkjimtë wl̈o. 46 Dbar kjwobi go ga tön l̈öng Sbö u zl̈ong bäng. L̈öng ushko ga ië l̈ok ëng tjok, ga ba dl̈i shdöya ëng kong enido. Eshko ga l̈öng wopjl̈ú, wotöy kjl̈ara kjl̈ara kong. 47 Sbö, e poshrëya l̈ok ara. Ga nopga obl̈ë beno wopjl̈ú ba tjok uunkong. Dbar kjwobi go ga nopga döya Sbörë obi ber ba nopga wl̈o. Ga Jesús tjl̈õkwo kjragaga tön jek këgong këgong.

<- Hechos 1 Hechos 3 ->