1-2 Pjeyoga, Tjl̈apga Jesucristo tjwe iröng obi, shji tö̃ya ber l̈öng ba tjok wl̈o. Gueniyo kjone kjone tjl̈ẽ ga «Tjl̈apga l̈i shrono iröng tjän» l̈e. L̈aga Sbö Sëyarë l̈e bomi kong, l̈aga tjawarë l̈e bomi kong, kjibokwo ichaga tjawarë l̈e bomi kong bakoe. Gueniyo jl̈õ l̈ëmi l̇l̇ëm, pjãy opshgawë e go l̇l̇ëm bakoe. 3 Pjãy jyãpgwëba l̇l̇ë kjĩy l̇l̇ëme. Bäm go ga nopga opyë ber Sbö wl̈oyo. E irgo ga Jesús tjwe iröng obi dbaryo l̈i äätë l̇l̇ëm obishko ga l̇l̇ëbo owa sogo l̈i wen tjwe eshko. Weno shäng jer wl̈o l̈i e. 4 E opyë ber Sbö wl̈oyo, l̇l̇ëbo poshrëkoba Sbö wl̈eni l̈i moskwo bakoe. Woyde ga e poshrëydëba döe. Eshko ga opzrëk jek äär ber sök Sbö u jong Jerusalén kjokyo l̈i roshko, ga tjl̈ẽ oba kong ga «Sbö l̈i tja» l̈e.

5 Tja shäng bomi tjok obishko ga l̇l̇ëbo ëre l̈oror bomi kong. ¿E woyo bomi kong l̇l̇ëmdo? 6 Dbar iara Sbörë, l̇l̇ëbo owa sogo l̈i wen wl̈o. Gueniyo shaga shäng kjl̈ara, ba dbar l̈i äätë l̇l̇ëm obi wopro ga tjwe l̇l̇ëm wl̈o. Ba shaga l̈i ë miydëmi tjän. 7 Sbö moskwoga l̈öng parkë ara tjän, gueniyo ga l̇l̇ëbo owa sogo l̈i wen tjwe l̇l̇ëm, ba shaga l̈i kjara Sbörë guing. 8 Eni ga l̇l̇ëbo owa sogo l̈i wen eshko jã. Gueniyo Tjl̈apga Jesús tjwe iröng obishko ga ba kjamo pjl̈ukyo go dö ga e pjiya ber drete. Ĩkoba e goshko ga ba dbo l̈i kësbang anmoyõ.

9 L̇l̇ëbo owa sogo l̈i tjweshko ga kong dbo twaga Ärë. L̇l̇ëbo ĩydëba l̇l̇ëm wl̈eniyo shärye obl̈ë obl̈ë. Ga oba jyãpgwe e go. 10-12 Owa shärye l̇l̇ë pogo, nopga pjir tjeng l̈i jyãpgwe e go wl̈o. Nopga l̈i pjir, tjl̈õkwo bek l̈i woydara l̇l̇ëm kjĩshko. Tjl̈õkwo l̈i kjrara kjwe ga döktong e go. Gueniyo tjl̈õkwo bek l̈i kjrara l̇l̇ëme. L̇l̇ëbo owa shäryara l̈öng wopjl̈úe. E kjĩshko ga raye Sbörë ga jyãpgwe l̇l̇ëbo owa l̈irë, tjl̈õkwo bek l̇l̇ëm l̈i kjre l̈ok wl̈o, epga ber shdungko wl̈o.

13-14 Pjeyoga, pjãy woyde Sbörë ara. Pjãy kjrara tek dämärshko, pjãy döya wl̈o. Ga Jesús tjl̈õkwo roy pjl̈ú l̈ororwa bomi kong. E go ga pjãy rokara Sbörë, ga tjl̈õkwo bek l̈i kjroromi, ga pjãy iara Sbö Sëyarë jëk l̈öng pjl̈o bek Sbö bokso. Pjãy döra eni, bi Tjl̈apga Jesucristo tjwl̈õ ara l̈i ber bomi kong bako wl̈o. E kjĩshko ga bëy wl̈o ga tjawa wopjl̈ú Sbö tjok ĩyado. 15 Eni ga pjeyoga, pjãy l̈öng wokjang ĩyado. Tjl̈õkwo l̈ororwa bomi kong l̈i, tjl̈õkwo tororwa, ichororwa jek bomi kong l̈i, e woyojemi l̇l̇ëme.

16 Bi Tjl̈apga Jesucristo, bi Data Sbö, shji woyde l̈ok ara. Ba wopjl̈ú l̈i kjĩshko ga shji ie l̈ok dbokjrë ĩyado, shji wosonkë l̇l̇ëm wl̈o, shji ie ber l̈öng ba koshë wopjl̈ú wl̈o bakoe. 17 Eni ga woydërwa ga pjãy ie l̈ok dbokjrë, pjãy wosonkë l̇l̇ëm wl̈o, ba tjl̈õkwo roy pjl̈ú l̈ëmi ĩyado wl̈o, l̇l̇ëbo pjl̈ú l̈i shäryëmi ĩyado wl̈o bakoe.

<- 2 Tesalonicenses 12 Tesalonicenses 3 ->