Paulus nakerek
bodik ema makfiar sia iha kota
Kolose
1
Paulus nahuu nakerek
1 Tabe nosi haꞌu, Paulus. Naꞌi Maromak duꞌuk mak boi haꞌu dadi baa Yesus Kristus klosan. Itakaan maluk Timotius iha neꞌe moos solok tabe.
2 Haꞌu kakerek bodik emi mak Naꞌi Maromak eman sia iha kota Kolose. Emi neꞌe, amikaan mamaluk mak fiar metin baa Yesus Kristus tiꞌan.
Ami hakroꞌan nebee Ama Maromak natudu laran diꞌak baa emi, nebee bele moris manek no dame.
Paulus namulak bodik ema makfiar sia iha Kolose
3 Sura oras ami hamulak bodik emi, ami sera dodan baa Naꞌi Maromak, itakaan Naꞌin Yesus Kristus Aman,
4 tan ami rona lia waꞌin tiꞌan nosi emikaan fiar baa Yesus Kristus, no emikaan dadomin baa ema makfiar sia hotu-hotu.
5 Emi halo nunia, tan emi hatene tiꞌan Naꞌi Maromak rai nein lia diꞌak sia bodik emi iha laleꞌan. Emi hatene lia nia, tan emi rona hosi Maromak Manfatin Diꞌak. Manfatin nia, tebes no loos.
6 Manfatin nia keke lema tiꞌan iha raiklaran neꞌe, toꞌo netan folin boot. Manfatin nia bele filas ema neon, dadi diꞌak. Emikaan neon nahuu nakfilas diꞌak nunia, baa oras emi foin rona Manfatin Diꞌak no baa oras emi foin hatene Naꞌi Maromak laran diꞌak.
7 Mau Epafras mak nanorin lia neꞌe sia baa emi. Nia, amikaan maluk serwisu mak ami hadomi. Nia madinas nalaꞌo Kristus Niakaan serwisu iha emikaan klaran.✡ 8 Nia mak katak baa ami iha neꞌe, nosi emikaan dadomin mak Maromak Kmalar Lulik natuun baa emi tiꞌan.
9 Tan baa nia, ami la hanawa hamulak bodik emi. Nahuu baa oras ami foin rona hosi emi, ami hakroꞌan nebee emi bele hatene tebe-tebes Naꞌi Maromak hakaran, no emi bele hatene lia hotu-hotu mak Niakaan Kmalar Lulik beer nanorin baa emi. 10 Hodi nunia, emi bele moris fatan nuꞌu Naꞌi Maromak eman, no bele halo diꞌak Niakaan neon iha lia hotu-hotu. Kalo emi halaꞌok serwisu nunia, Naꞌi Maromak foo folin boot baa emi. Emi moos hetak hatene Nia.
11-14 Ami moos hamulak hodi hakroꞌan nebee Naꞌi Maromak natuun Niakaan beran makaꞌas, nebee emi bele hatiu lia hotu-hotu hodi heti neon. Nebee emikaan neon diꞌak bei-beik, toꞌo emi sera dodan baa Ama Maromak, tan Nia loke dalan atu sori emi nosi beran aat mak moris iha kukun laran. Nia latan Oan Yesus Kristus nebee selu nola emi, no kasu mohu emikaan salan. Hotu, Nia foti Oan dadobe nia, dadi baa emikaan Naꞌin, nebee emi bele simu fafaꞌek hosi sasoin iha laleꞌan. Sasoin nia, Naꞌi Maromak atu foo baa ema mak natene Yesus Kristus no ema mak moris iha kroman laran.✡
Kristus aas liu hotu-hotu
15 Masik ita ema raiklaran la bele titu-haree Naꞌi Maromak,
mais ita titu-haree tiꞌan Kristus mak ilas ida no Naꞌi Maromak.
Laleꞌan no raiklaran la iha dauk, Kristus iha kedan tiꞌan.
Nia, Ulun nosi hotu-hotu mak Naꞌi Maromak naseꞌi.
16 Naꞌi Maromak nodi Nia
naseꞌi sasoin hotu-hotu iha laleꞌan no raiklaran.
Naseꞌi hotu-hotu mak ema raiklaran bele titu-naree,
no hotu-hotu mak ema raiklaran la bele titu-naree.
Makaer ukun sia ka, makaer beran sia ka,
naꞌi sia ka, ulun sia ka, Nia mak naseꞌi hotu-hotu.
Hotu-hotu mak Naꞌi Maromak naseꞌi nia,
naseꞌi nodi Yesus Kristus,
no naseꞌi bodik Yesus Kristus.
17 Hotu-hotu sei la iha dauk,
Kristus iha kedan tiꞌan.
Hotu-hotu mak iha,
Nia mak babilan.
18 Nia mak Ulun bodik ita ema sarani,
no ita dadi baa Niakaan isin.
Nia mak moris huun.
Nia mak uluk fohon mate no moris nikar.
19 Naꞌi Maromak Niakaan makaꞌas hotu-hotu moos,
iha Yesus Kristus.
Tan lia nia, Naꞌi Maromak neon diꞌak.
20 Naꞌi Maromak nodi Yesus Kristus,
nalo dame no hotu-hotu mak Nia naseꞌi tiꞌan.
Nia latan Niakaan Oan,
dadi baa sera, nodi naduar raan,
toꞌo mate iha ai karuus,
nebee hotu-hotu iha laleꞌan no raiklaran,
bele dame nikar no Naꞌi Maromak.
✡21 Uluk, emi duꞌuk moris salin aan hosi Naꞌi Maromak. Emi funu Nia hodi emikaan neon dois no emikaan hahalok aat. 22 Masik nunia moos, oras neꞌe Nia loke dalan tiꞌan nebee emi bele dame hikar ho Nia. Nia solok Niakaan Oan Yesus Kristus, dadi ema raiklaran. Nia moos latan Oan nia, dadi baa sera toꞌo mate iha ai karuus. Yesus Kristus simu mate nunia, nebee Nia bele nodi emi baa hariik iha Naꞌi Maromak oin, tan emi dadi ema moos tiꞌan, no ema neon loos mak la hoo sala. 23 Surak emi haterus aan ho emikaan fiar. Kaer metis fiar nia, nebee keta nawae. Keta hakiduk hosi Manfatin Diꞌak mak emi simu tiꞌan nia. Ema nalore tiꞌan Manfatin Diꞌak nia iha raiklaran tomak. Naꞌi Maromak moos solok haꞌu, Paulus neꞌe, nebee haꞌu moos baa kalore Manfatin Diꞌak nia.
Paulus serwisu nodi naliku Naꞌi Maromak eman sia
24 Baa oras Kristus moris iha raiklaran, nia netan susar waꞌin. Oras neꞌe haꞌu moos katiu susar oi-oik. Masik nunia moos, haꞌukaan neon diꞌak bei-beik, tan haꞌu katiu susar nia bodik emi, hanesan Kristus natiu susar bodik ema sarani sia mak dadi baa Niakaan isin. 25 Naꞌi Maromak latan serwisu baa haꞌu, nebee kaliku Niakaan ema sia. Nia moos naruka haꞌu atu kanorin Niakaan Manfatin toꞌo lotu-lotuk baa emi mak lahoos ema Yahudi. 26-27 Hori uluk fohon, ema rona tiꞌan Maromak Manfatin, mais sia la natene malorek dauk Manfatin nia isin, tan Manfatin isin sei lia subar. Mais oras neꞌe, Naꞌi Maromak nakotu tiꞌan atu loke fore Manfatin nia isin bodik Niakaan ema. Manfatin nia, folin boot kaliuk bodik ema klubun hotu-hotu iha raiklaran neꞌe. Manfatin nia, mak neꞌe:
Naꞌi Maromak nakara nebee, Kristus moris iha emikaan neon.
Lia nia mak nalo emi fiar nohuun haꞌak,
Nia atu nalo lia diꞌak bodik emi iha laleꞌan.
Lia neꞌe mak ita ema raiklaran hein hori uluk aan.
28 Tan baa nia, ami katak lia Kristus baa ema hotu-hotu. Ami moos hanorin ema hotu-hotu no foo hatene baa ema hotu-hotu tuir matenek hotu-hotu mak Naꞌi Maromak foo baa ami. Hodi nunia, ami bele hakbiit tuꞌan ema hotu-hotu mak tuir Kristus, toꞌo sia la moe iha Niakaan oin, tan sia moris loos nohuun. 29 Haꞌu kserwisu susi ruin kalaꞌo lia nia sia. Haꞌu kbele katerus aan, tan Kristus beran makaꞌas mak nakbiit haꞌu.
Kolose 2 ->
