Kristus Klosan Lian

Naꞌi Maromak nameno atu solok Niakaan Kmalar Lulik mai

1-3 Ama Teofilus* mak diꞌak. Tabe nosi haꞌu Lukas.

Uluk, haꞌu kakerek tiꞌan kosi lia hotu-hotu mak Yesus nalo no nanorin, nahuu nosi uluk fohon toꞌo Nia namaan aan saꞌe nikar baa laleꞌan. Nia nahuu Niakaan serwisu nodi boi nola Niakaan klosan sia. Nosi ikus, ema nasusar Nia toꞌo noꞌo Nia, mais Naꞌi Maromak nalo Nia moris nikar. Baa oras Nia moris nikar tiꞌan, Nia natadu aan bei-beik baa Niakaan klosan sia iha loron haat nulu laran. Nia moos nalore baa sia oin nunabee Naꞌi Maromak sori ema nebee sia bele tama dadi baa Niakaan ema. Hotu, Yesus solok Niakaan klosan sia nodi Maromak Kmalar Lulik beran.

Lia neꞌe sia, haꞌu kakerek tiꞌan baa ama iha haꞌukaan hakerek uluk.

4-5 Hotu, baa dala ida, Yesus tuur namutuk no Niakaan klosan sia iha Foho Saitun. Nia katak baa sia naꞌak,

“Rona! Uluk Yohanis sarani ema nodi wee. Mais kalo emi hein loron hira tenik, Naꞌi Maromak atu nalo lia boot liu tenik bodik emi. Tan Nia atu naruka Niakaan Kmalar Lulik tuun baa emi. Tan baa nia, emi keta laꞌo hela kota Yerusalem neꞌe lai. Hein iha neꞌe toꞌo Haꞌukaan Ama naruka Niakaan Kmalar Lulik tuun baa emi. Haꞌu katak kedan lia neꞌe baa emi, tan Haꞌukaan Ama nameno nunia tiꞌan.”[b]

Yesus namaan aan saꞌe baa laleꞌan

6 Baa loron ida, Yesus namutuk tenik no klosan sia. Sia nusu baa Nia naꞌak, “Ama! Oras neꞌe Ama atu sori ita nosi funu nebee itakaan rai Israꞌel ukun duꞌuk aan ka, ita sei hein tenik?”

7 Yesus nataa naꞌak, “Emi lalika hatene niakaan oras! Haꞌukaan Ama mesan mak babilan oras nia. 8 Mais kalo Niakaan Kmalar Lulik tuun baa emi tiꞌan, emi atu hetan beran. Hotu emi musti baa katak lia nosi Haꞌu baa ema hotu-hotu iha kota Yerusalem, no leo hotu-hotu iha rai Yudea no rai Samaria, liu toꞌo raiklaran sikun sia.”[c] 9 Dale notu nunia, Yesus namaan aan saꞌe baa laleꞌan iha siakaan oin. Hotu kaloꞌan taka nola Nia, toꞌo sia la naree Nia tenik.[d]

10 Sia sei titu baa laleꞌan, teki-tekis ema naꞌin rua nariik iha siakaan klaran. Sia rua tau faru mutin moos. 11 Hotu sia dale baa klosan sia naꞌak, “Hei! Ema Galilea sia! Tan saa emi hakaka mana baa laleꞌan? Yesus namaan aan saꞌe baa laleꞌan tiꞌan. Nosi ikus, Nia moos namaan aan mai nikar oin nunia.”

Kristus klosan sia boi ema ida atu seluk Yudas

12 Nunia hotu, klosan sia tuun nikar nosi Foho Saitun, fila baa kota Yerusalem. Foho nia dook nosi kota, takseer kilo ida.[e]

13 Toꞌo kota, sia tama baa uma mak sia nein, hotu saꞌe baa keꞌan tetu. Kristus klosan sia naran, mak neꞌe:

Petrus,

Yohanis

Yakobus,

Andreas,

Filipus,

Tomas,

Bartolomeus,

Mateus,

Yakobus (Alfeus oan),

Simon (ema partee Selot),[f]

no Yudas (Yakobus oan).[g]

14 Sia hotu-hotu namulak nodi neon ida. Sia namulak namutuk no Yesus inan Maria, no ina seluk sia, no feto nurak sia, no tenik Yesus alin sia.

15 Baa loron ida, sia namutuk tenik, takseer ema naꞌin atus ida rua nulu. Hotu Petrus nariik dale naꞌak, 16 “Mamaluk sia! Emi nanis sei hanoin Yudas mak uluk nodi ema baa kohi Yesus. Lia hotu-hotu kona baa Yudas nia, natoꞌo saa mak Maromak Kmalar Lulik naruka Naꞌi Daud nakerek kedan hori uluk iha Hakerek Moon. 17 Yudas nia, itakaan ema mak serwisu namutuk no ita.”

18 (Baa oras Yudas faꞌan Yesus tiꞌan, nia nola osan kadoor nia, nodi sosa rai rohan ida. Hotu, rai nia dadi baa Yudas mate fatin, tan nia monu tabarakat iha rai nia, toꞌo kabun taba no teen nakbudi sai. 19 Ema dale lia nia nosi ibun baa ibun, toꞌo ema hotu-hotu iha kota Yerusalem, rona nola Yudas mamaten nia. Tan lia nia, sia nanaran rai nia nodi siakaan lia Aram naꞌak, ‘Akeldama’. Lia fuan neꞌe naꞌak ‘Rai Raa’).[h]

20 Hotu Petrus dale liu tenik naꞌak, “Hori uluk, Naꞌi Daud nakerek kedan nunia iha Hakerek Kananuk naꞌak,

‘Habusik niakaan hein fatin dadi fuik,

tan ema la nein tenik iha nia ona.’

Naꞌi Daud moos nakerek naꞌak,

‘Habusik niakaan serwisu nia, latan baa ema seluk.’[i]

21-22 Tan lia nia, ita musti buka ema nebee seluk Yudas. Ita buka ema mak namutuk no ita kleur tiꞌan. Nia musti tuir kre-reꞌis no Naꞌi Yesus baa fatin hotu-hotu, nahuu nosi Yohanis sarani Nia. Nia moos musti naree duꞌuk Naꞌi Yesus moris nikar nosi mate, toꞌo namaan aan saꞌe nikar baa laleꞌan.”[j]

23 Petrus dale notu nunia, sia natama naran rua. Ida naran Matias, ida tenik naran Yusuf (nosi Yustus ema uma laran. Ema moos bolu nia, Barsabas). 24-25 Hotu sia namulak naꞌak, “Ama iha laleꞌan! Ita Boot hatene tebe-tebes ema hotu-hotu neon. Yudas monu mate nela niakaan serwisu. Tan nunia, ami husu Ita Boot hatudu baa ami nosi ema naꞌin rua neꞌe, see ida mak Ita Boot boi hola hodi seluk Yudas, nebee ami foti nia dadi baa Kristus klosan.” 26 Namulak notu, sia suut liman. Suut liman nia kona baa Matias. Hotu sia foti Matias dadi klosan namutuk no sia naꞌin sanulu resin ida nia.

Kristus Klosan Lian 2 ->