Link to home pageLanguagesLink to all Bible versions on this site
15
Chanich junita ju lakatujun mak'alhk'ajnat
1 Chai iclakts'ilh alakatam lhamak'an ju lact'iyan. Chai slivasalh na k'ai lhamak'an ixjunita. Pus iclakts'ilh ixpumatujun'an anquilhnin chai pumatamin ju sia yu'unch ixtach'apata lakatamin mak'alhk'ajnat ju tamacamimputun ju ani lacat'un. Chai ju ani lakatujun mak'alhk'ajnat va yuchach cajuna'. Yuchach ju capumaclaya' ju Dios ju mak'alhk'ajnat ju axtakni ju lapanacni ju ani lacat'un.

2 Pus iclakts'ilh tachi tu'u' atants'in ju na stalank'a ixjunita. Para istasui tachi ju va ixlhiya ju jipi. Chai anch ixtayanalh la'ixquilhtu' ju anu' atants'in ju lapanacni ju jantu ixtanavinita ixk'achat ju anu' maktili' chai ju anu' lapalaxtucanta tachi ju maktili'. Chai vachu' jantu ixtalak'a'ita ni ca'amichicalh laxalhaput'ek'enti ixtapaka'ut ju anu' maktili'. Chai ju yu'unch ixtach'apata ju ix'arpa'an. Yuchi ju ix'axtaknita ju Dios. 3 Chai ixtamilhpaich ixmilhpat ju Moisés junta ists'ok'ulata. Ju Moisés ixlapanac Dios ixjunita. Chai vachu' ixtamilhpai ixmilhpat ju Ask'at'a Borrego. Ixtanajun:

Slivasalh na k'ai lhamak'an ju tuch'i navi ju uxint'i ji ucxtin Dios ju lai navik'o'ui tachi chun ju taxtokni.
Soknic'a ju navi tu'u' chai akts'iya muct'axt'ui ju minchivinti ju uxint'i ju k'ai ix'ucxtin unit'a tachi chun ju amachak'an lacamunutpa'.
4 Tis chavaich ju jantu catalhoniyan chai jantu calak'ayayan ju uxint'i ji ucxtin ni va uxint'i ju salaka'at.
Pus tachi chun ju lapanacni ju tat'ajun ju ani lacamunutpa' catalakminanch chai catalak'ayayan.
Chunch ju a'ulht'uc'ana' ni lakts'inc'ant'a ni na soknic'a ju navi.

5 Chai acsni tapasak'o ju ani taxtokni pus iclakts'ilh ni ilhtek'ai ju k'ai pujitat lact'iyan. Anchach junta vi ju Dios chai anch junta ixmak'acanta ju lht'ak'alh chiux junta ists'okcanta ju lhamap'aksin. 6 Pus lacpujitat tataxtulh ju ixpumatujun'an anquilhnin ju ixtach'apata lakatamin mak'alhk'ajnat ju ixmacamimputun ju lacat'un. Chai ju yu'unch ixtalakch'ita ju k'oxi ixpumpu'an ju slivasalh na xnapapa ixjunita. Chai ix'atanquilhakch'imuc'acanta ju liston ju oro ixjunita. 7 Chai pumatam ju ixlhipumat'at'i'an atapacxat axtaknik'o ju ixpumatujun'an anquilhnin lakatamin ixpumap'un'an si oro. Chai ju anu' pumap'un is'aktsamanta ju mak'alhk'ajnat ju camacamina' ju Dios ju t'onk'alhi. 8 Chai ju anu' pujitat na aktsamalh ju jin chai malacasucalh ni yuchi ju Dios ju tachapun chai yuchi ju xak'ai tucan. Chai jantu lai xamati' ixtanui ju anch lacpujitat tus catapasak'oyach ju anu' lakatujun mak'alhk'ajnat ju ixtach'apata ju ixpumatujun'an anquilhnin.

<- JU AMAVASALACALH 14JU AMAVASALACALH 16 ->