1 Ju Jesús acsni tapasalh ju lacati lakts'ilh pumatam lapanac. Alak'ach'ix ixjunita tus acsni tsuculh. 2 Pus ju ix'amamaka'ui tasacmilh ju Jesús. Tajunich:

―Amamaka'unu' tis chavaich ju alactu'unulh ni laich xalak'ajun ju va alak'ach'ix. Ja yuchi is'akstu u ixpai u ixnati.

3 Chai ak'alhtayanalh ju Jesús:

―Jantu alak'ach'ix xalak'ajun va ixlaca'atalh ni ca'alactu'unulh ju yuchi nin ixpai nin ixnati. Va alak'ach'ix xalak'ajun ni laich caputalacasuya' ju ixlhich'alhcat ju Dios la'is'atsucunti ju yuchi. 4 Tasq'uini ni acnavi ju ixlhich'alhcat ju quimacaminta ni ictit'ajunca' tachi acsni vilhca' ju avilhchan. Cachina' avilhchan acsni acniya'. Ju acsnich tachi ju na va ts'ista cajuna' acsni jantu lai xamati' ch'alhcatnan. 5 Ni ictit'ajunca' ju ani lacamunutpa' pus tachi maclhcu icjunita ni icmapulhcui la'ixtac'atsan'an ju lapanacni.

6 Ju Jesús acsni naulh ju chunch pus akchujlh ju lacat'un. Navilh ju pulhk'om la'ixchu'ut. Pus lhquilin lacpumuc'alh ju la'ixlakchulh ju anu' alak'ach'ix. 7 Junich:

―A'inchich lakp'uch'ak'ana' laxapos ju Siloé.

Ju ixtapaka'ut ju anu' pos nomputun Malakachacanta. Pus ju anu' lapanac alh lakpuch'ak'ana'. Chai acsni tasp'itcha lai ix'alac'avanan. 8 Ju ixt'atolhnin chai ju ali'inch lapanacni akts'iya ixtalakts'intach ni va isq'uin tumin ju anu' lapanac. Pus acsni c'uch'ucalh tanaulich:

―Ja jantiyu' ju ani ju ixtolai lacati chai va isq'uin tumin.

9 Ju ali'in lapanacni ixtanajunch ni yuchi. Ju ali'in ixtanajun:

―Jantiyu'. Va ixt'achunch.

Para ju alak'ach'ix ixjunita ixmavasalai ni yuchi.

10 Tajunich chavai:

―Pus t'as xalhi'alac'avananch.

11 Ju alak'ach'ix ixjunita ak'alhtayanalh. Ajunich:

―Yuchi ju anu' jok'at ju juncan Jesús navilh pulhk'om. Quilacpumuc'alh laquilakchulh chai quijunilh: “Ap'inchich lakp'uch'ak'ana' ju lacaSiloé”. Pus ic'alh. Iclakpuch'ak'alh. Chai ic'alac'avanalh.

12 Chai ju alak'ach'ix ixjunita talhisacmichokopa ju Jesús. Tajunich:

―Tas anchach ju xa'an ju anu' lapanac.

Chai ju alak'ach'ix ixjunita lhak'alhtayanalh. Ajunich:

―Jantu icc'atsai.

13 Chai alhi'anicalh ju fariseonin ju anu' alak'ach'ix ixjunita. 14 Pus avilhchan pa'astacni ixjunita acsni tavanan navilh ju pulhk'om ju Jesús chai acsni amalac'avanilh ju alak'ach'ix. 15 Pus ju fariseonin aktam tasacmichokopa ju alak'ach'ix ixjunita. Tajunich:

―T'as xalhi'alac'avananch.

Ju anu' alak'ach'ix ixjunita chani ajuni:

―Va quimuc'anilh pulhk'om ju laquilakchulh chai iclakpuch'ak'alh. Chai ic'alac'avanalhch.

16 Pus ju acsnich ju ali'in fariseonin tanaulh:

―Ju ani lapanac jantu la'ixmacni Dios ju xaminacha ni jantu maklaca'ani ju avilhchan pa'astacni.

Ju ali'in ixtanajunch:

―Para tas calhinavilhch ju ani lhamak'an ju va alactu'unu lapanac.

Pus ju fariseonin jantu va lakatam ixtanavi ixchivinti'an. 17 Tasacmichokopa aktam ju anu' alak'ach'ix ixjunita. Tajunich:

―Ju uxint'i tis chavaich lhiulai ju xalakpulak'oxiyan lamilakchulh.

Pus ju anu' alak'ach'ix ixjunita naulh:

―Yuchi ju lapanac ju najun ixchivinti Dios.

18 Pus ju xalack'ajin israelitanin jantuch ixtalaca'i ni yuchi cava ju alak'ach'ix ixjunita. Chai jantu ixtalaca'i ni va calak'oxinicalh ju ixlakchulh. Tus acsni ju talaca'i acsni at'asanicalh ju ixpai ixnati ju anu' alak'ach'ix ixjunita. 19 Chai asacmicalh ju xapai xanati. Ajuncanch:

―Ju ani ja yuchi ju mints'alh'an ju nonat'it ni va alak'ach'ix ixjunita acsni lak'aulh. Pus ju chavai tas xalhi'alac'avananch.

20 Ta'ak'alhtayanalh ju ixpai chai ixnati. Tanaulh:

―Icc'atsayau ni yuchi ju ani ju quints'alh quinc'an. Yuchi ju alak'ach'ix ixjunita acsni tavanan tsuculh. 21 Para jantu icc'atsayau ta xalhi'alac'avananch ju chavai. Chai jantu icc'atsayau tichi chavaich ju xalakpulak'oxi. Pus ju yuchi k'aich. Yuchi ju asacmit'itch. Is'akstuch canona'.

22 Chunchach ju talhak'alhtayanalh ju ixpai chai ixnati ni va ixtatalhonich ju xalack'ajin ist'a'israelitanin. Ju yu'unch ixtanajuntach ni xamati' canona' ni yuchi ju Cristo ju Jesús ju anu' noncanch camalakachatachilh ju Dios pus jantu calacasq'uinicana' ni lai catanu ju la'ixpujitat'an ju israelitanin. 23 Pus yuchach talhinaulh chunch ju ixpai chai ixnati acsni tavanan tanaulh ni k'aich ju ists'alh'an. Yuchach ju casacmicalh.

24 Pus lhinonchokocalh ist'asanica ju anu' lapanac ju va alak'ach'ix ixjunita. Tajunich:

―Anauch ni va yuchi ju xak'ai ju Dios. Ju quijnan icc'atsayau ni va alactu'unu' ju anu' lapanac ju xalakpulak'oxiyan.

25 Ju acsnich ju anu' alak'ach'ix ixjunita ak'alhtayanalh. Najunch:

―Ni alactu'unu' u jantu ju quit'in jantu icc'atsai. Va lakatam taxtokni ju icc'atsai. Va alak'ach'ix xacjunita. Para ju chavai laich ic'alac'avanan.

26 Chai tasacmichokopa ju anu' alak'ach'ix ixjunita. Tajunich:

―Tas xanaviyanch. Tas xalhimalac'avaniyanch.

27 Chai ak'alhtayanalh ju anu' alak'ach'ix ixjunita. Ajuni:

―Ni iclajumpalauch chai jantu xaquilak'asmatnipalau. Tajuch ni va k'asmatch'ok'op'ut'unat'itch aktam. Ja vachu' va ump'ut'unat'it ju uxijnan ixtamamaka'unti.

28 Pus talhitalhk'amalh ju xalack'ajin israelitanin. Tajunich ju anu' alak'ach'ix ixjunita:

―Ju uxint'i ixtamamaka'unch'at. Para ju quijnan ixtamamaka'unti Moisés icjuntau. 29 Ju quijnan icc'atsayau ni Dios ju xak'ala ju Moisés. Para ju ani lapanac jantu icc'atsayau ta anchach ju xaminacha.

30 Chai ak'alhtayanalh ju anu' alak'ach'ix ixjunita. Ajunich ju xalack'ajin ist'a'israelitanin:

―Slivasalh k'ai lhamak'an ju ani. Ju uxijnan jantu c'ats'ayat'it ta anchach ju mintacha ju yuchi para ju quit'in quimalac'avanilh. 31 C'atsayauch ni jantu k'asmatni ju va alactu'unu' ju Dios. Para ni alin xamati' ju talhoni ju Dios chai navini ju ixk'achat pus yuchi ju k'asmatni. 32 Tus la'ixputai'ulacan ju lacamunutpa' jantu tavanan k'asmatcanta ni ca'alilh xamati' ju lai camalac'avani ju va alak'ach'ix lak'ajunta. 33 Pus ju anu' lapanac ni jantu cava la'ixmacni Dios ju minta ca jantu lai tu'u' catinavi.

34 Chai ta'ak'alhtayanalh ju xalack'ajin israelitanin. Tajunich ju anu' alak'ach'ix ixjunita:

―Ju uxint'i ists'alh'at ju va alactu'unu lapanacni. Ja va quilamalaniputunauch ju quijnan.

Pus lana xcoxtucalh junta ixtanun.

35 Chai k'asmatlh ju Jesús ni tixcoxtucalh ju anu' alak'ach'ix ixjunita. Chai acsni pakxtokchokolh junich:

―Ju uxint'i ja lhilaksi ju ists'alh Dios. ―Juncanch ju alak'ach'ix ixjunita.

36 Chai ju alak'ach'ix ixjunita k'alhtailh ju Jesús. Junich:

―Tis chavaich ju anu' lhich'ivinin ji qui'amigo. Aq'ui'unch ni laich aclhilaksi ju yuchi.

37 Chai ju Jesús acsni k'alhtailh ju anu' alak'ach'ix ixjunita junich:

―Lakts'int'ach. Chai yuchach ju t'onan t'achivinin.

38 Chai ju anu' alak'ach'ix ixjunita junich ju Jesús:

―Iclhilaksiyanch ji qui'ucxtin.

Chai lana ta'aktsokotanilh. Tsuculh nona' ni yuchach ju Dios.

39 Chai naulh ju Jesús:

―Ju quit'in iclhiminta ju ani lacamunutpa' ni laich caputasuya' ixtalak'alhin'an ju lapanacni. Ju chunch ju tachi ju va alak'ach'ixnin tajunita ni va jantu amachakxanan catamachakxaya' ju stavasalanti. Chai ju tanajun ni tamachakxai ju stavasalanti pus tachi alak'ach'ixnin catajuna' ni jantu cata'amachakxanana'.

40 Ju ali'in fariseonin ju ixtamakvilanalh junta ixvi ju Jesús acsni tak'asmatnilh ju ani chivinti tajunich ju Jesús:

―Ja vachu'as tachi ju va alak'ach'ixnin icjuntau ni jantu lai ic'amachakxananau.

41 Pus ju Jesús ajunich ju fariseonin:

―Ni tachi ju va alak'ach'ixnin cava unt'at'it ni va jantu amach'akxananat'it cava pus jantu ix'ulanic'ant'at'it ju mi'alactu'unti'an. Para ni nonat'it ni mach'akxayat'it ju stavasalanti pus yuchi na lhi'alin ju mi'alactu'unti'an ni jantu naviyat'it.

<- XIVAN 8XIVAN 10 ->