Roma 10

1 O ry longo, ty salalan-troko naho ty halaliko aman’ Añahare ty am’ Israele, le t’ie ho rombaheñe. 2 Ataliliko t’ie maringatse ho aman’ Añahare, fe tsy an-kilala; 3 ie tsy nahafoniñe ty hamarentanen’ Añahare, te mone nipay ty hañoreñañe ty a’ iareo, ie tsy niambane ami’ty havantañan’ Añahare. 4 I Norizañey ro firefea’ i Hake, hañavantañe ze hene mpiato.

5 Nabeja’ i Mosè ty havañonañe mifototse amy Hake, te:

Hitakatse haveloñe ama’e t’indaty mañorike aze.[a]

6 Mbore manao ty hoe ty havantañañe mifototse am-patokisañe:

Ko manao ty hoe añ’arofo ao:

Ia ty hionjoñe mb’ andindìm-b’eo[b]

(hampizotso i Norizañey). 7 ke: Ia ty hizotso mb’an-tsikeokeok’ao? (hampitroatse i Norizañey an-kavilasy). 8 Aa inom-barè ty enta’e?

Marine azo i tsaray, am-palie’o ao vaho añ’arofo’o ao,[c]

Ie i tsaram-patokisañe taroñe’aiy, 9 t’ie mitaroñe i Talè Iesoà am-palie, vaho iatoa’o an-troke ao te vinañon’ Añahare amo havilasio, le ho rombahen-drehe. 10 Toe añ’arofo ao ty atokisa’ ondaty hanjoa’e havantañañe, vaho am-palie ty hitaroña’e, hitendreha’e rombake. 11 Hoe i Sokitse Masiñey,

Tsy ho salatse ze miato ama’e.[d]

12 Tsy eo ty mampiambake ty Jiosy ami’ty Grika; raike ty Talè’ iabikey; matarike amo hene mikanjy azeo. 13 fa

Hene ho rombaheñe

ze mikanjy ty tahina’ i Talè. [e]

14 Akore ty hahakanjia’ iareo ty tsy natokisa’ iareo? akore ty hahatokisa’ iareo ty tsy nijanjiñañe? vaho akore ty hahajanjiña’ iareo te tsy amam-pitaroñe? 15 Akore ty hitaroña’ iareo te tsy niraheñe? Pinatetse ao ty hoe:

Hoke! ty hafanjàka o fandiam-pinday

talili-soan-draha soao![f]

16 Fe tsy hene nañaoñe i talili-soay, fa hoe t’Isaia:

O Talè, ia ty niantoke i entam-bola’aiy?[g]

17 Aa le am-pijanjiñañe ty fatokisañe, le an-tsaontsi’ i Norizañeiy ty fijanjiñañe. 18 Fa hoe iraho: ke t’ie tsy nahajanjiñe? Hete!

Fa nanitsike ty tane toy

ty fiarañanaña’ iareo,

naho pak’añ’olo’ ty voatse toy

ty saontsi’ iareo.[h]

19 Le hoe iraho: Hera tsy nifohi’ Israele? Hoe heike t’i Mosè:

Hampikirañeko anahareo

ty tsy fifelehañe,

ty fifeheañe tsy mahilala

ro hampibosehako anahareo[i]

20 Hoe t’Isaia am-pahavaniañe:

Nizoe’ o tsy nipay ahio iraho,

Naho nitojo am’ondaty tsy nañontane ahio.[j]

21 Fe hoe re ty am’ Israele:

Lomoñandro iraho nañitsi-tañañe am’ ondaty manjehatse naho mitangingiñeo.[k]

<- Roma 9 Roma 11 ->