1 Ry Andrianañahare,

Ihe ro Andrianañahareko;

hitsoek’ azo iraho;

miheahea azo ty fiaiko,

misalala azo ty sandriko

hoe an-tane kànkañe vozake

tsy aman-drano,

2 Ho treako amy miavakey ao irehe,

hahaisake ty haozara’o naho ty enge’o.

3 Toe soa te amo haveloñeo

ty fiferenaiña’o,

hisabo Azo o soñikoo.

4 Hañandriañe Azo t’ie mbe veloñe;

i tahina’oy ty hañonjonako tañañe.

5 Anjañe ty fiaiko hoe aman-tso-kena naho solike,

vaho mandrenge Azo

an-tsoñy mifale ty vavako,

6 ie mahatiahy Azo am-pandreañe ao,

naho mitsakore Azo am-pijilovan-kaleñe.

7 Ihe ro mpañolotse ahiko,

naho an-kalon’ela’o ao ty hirebehako.

8 Mipitek’ ama’o ty fiaiko;

manohañe ahy ty fità’o havana.

9 Fe hajoroboñe an-tsikeokeok’ao

ze mipay handrotsake ty fiaiko;

10 Havariñe an-kaozara’ i fibaray iereo

ho tsindrohe’ ty farasy.

11 Andriañahare ty irebeha’ i Mpanjakay,

mirañorañoa ze hene mifanta ama’e;

fe hampidiñeñe ty faliem-pandañitse.

<- Sabo 62Sabo 64 ->