1 Andriaño t’Iehovà amy te Ie ro soa!

nainai’e ty fiferenaiña’e.

2 Anò ty hoe ry Israele :

nainai’e ty fiferenaiña’e.

3 Anò ty hoe ry anjomba’ i Aharoneo :

nainai’e ty fiferenaiña’e.

4 Anò ty hoe ry mpañeveñe am’ Iehovà :

nainai’e ty fiferenaiña’e.

5 Nalovilovy iraho, le nitoreo am’ Ià;

nanoiñe ahiko t’Ià,

le navotra’e an-gadagadañe eo.

6 Amako t’Iehovà, tsy ho hemban-draho,

ino ty hanoa’ondatio?

7 Amako t’Iehovà, ­mpañolotse ahiko,

le ho sambaeko o malaiñ’ ahio.

8 Hamake t’ie mipalitse am’ Iehovà,

ta te misazok’ am’ ondatio.

9 Kitra’e mitsolok’ am’ Iehovà,

ta te mirampy amo roandriañeo.

10 Hene miarikoboñe ahy o fifeheañeo

fe iatoako ty tahina’ Iehovà.

11 Miarikatok’ ahy iereo,

eka, toe misambory amako,

fe iatoko ty tahina’ Iehovà.

12 Niropak’ amako hoe rene-tantele iereo,

f’ie hakipike hoe fatike mirehetse;

toe iatoako ty tahina’Iehovà.

13 Nanafasiotse ahy iereo[a] hikorovohako,

fe nañimb’ ahy t’Iehovà.

14 Iehovà ro haozarako naho saboko,

ie ro ­fandrombahañe[b] ahy henane zao.

15 Inao ty feom-pirebehañe naho

fandrombahañe an-kivoho’ o vañoñeo ao: mavitrike ty fitoloñam-pitàn-kavana’ Iehovà. 16 Mizonjoñe ty fitàn-kavana’ Iehovà;

mahimbañe ty fitàn-kavana’ Iehovà.

17 Tsy hikenkan-draho fa ho veloñe,

hataliliko o sata’ Iehovào.

18 Nanilofe’ Ià am-pandilovan-draho,

fe tsy natolo’e an-kavilasy.

19 Sokafo ho ahy

o lalam-bein-kavantañañeo,

hizilihako, hañandriañako Iehovà.

20 Intoy ty lalam-bei’ Iehovà, hiziliha’o vañoñeo.

21 Andriañekoo amy te tinoi’o,

fa Ihe ro fandrombahañe ahy.

22 I vato nado’ o mpandrafitseoy le fa talèm-batolahy[c].

23 Sata’ Iehovà izay,

le fiain-tane am-pihainon-tikañe.

24 Itoy ty andro tsinene’ Iehovà,

antao hirebeke naho hifale ama’e.

25 Ry Iehovà,

Ehe, rombaho zahay henaneo!

ry Iehovà,

Ehe, ampiraoraò henane zao!

26 Andriañeñe ty mitotsak’ ami’ty tahina’ Iehovà![d]

mañandriañe azo zahay

boak’añ’anjomba’Iehovà ao.

27 Andrianañahare t’Iehovà,

Ie ty nanolotse hazavàñe amantika;

mireketa reke-tsampañe

amo mpamonje sabadidakeo[e], mivovotse

mb’ an-tsifa’ i kitreliy mb’eo.

28 Ihe ro Andrianañahareko,

le andriañekoo;

Andrianañahareko irehe, ho zonjoñeko.

29 Andriaño t’Iehovà amy te ie ro soa!

nainai’e ty fiferenaiña’e.

<- Sabo 117Sabo 119 ->