Mikà

1 Ty tsara’ Iehovà niheo amy Mikà[a] nte-Moresete[b] tañ’andro’ Iotame[c] naho i Akhaze[d] vaho Iekezkia[e] mpanjaka’ Iehoda; i nioni’e ty amy Somerone[f] naho Ierosalaimey[g]. 2 Kila mijanjiña ry ondatio; mañaoña ry tane, naho ze hene ama’e ao;

fa hanesek’ anahareo t’Iehovà Talè,

i Talè boak’añ’Anjomba’e Masiñe. 3 Heheke te miavotse i toe’ey t’Iehovà,

hizotso mb’etoa,

handialia o haboa’ ty tane toio[h]. 4 Hitranak’ ambane’e eo[i] o vohitseo,

naho ho vaky o vavataneo,

manahake ty takafotse añatrefa’ ty afo eo,

naho rano nadoandoañe am-piroroñañe. 5 Fonga ty amo fiolà’ Iakobeo[j],

naho o tahi’ i anjomba’ Israeleio[k];

Ino i hakeo’ Iakobey?

Tsy i Somerone hao?

Aia o ankaboa’ Iehodao?

Tsy e Ierosalaime hao? 6 Aa le hanoeko fivotrim-porompotse

an-tetek’ ao ty Somerone,

ho tanem-bahe; naho

haparatsiako am-bavatane ao o vato’eo,

vaho haboako o mananta’eo. 7 Ho demodemoheñe iaby o samposampo’eo,

le ho forototoeñe añ’afo ao

o nibanabanaeñe ama’eo;

ho rotsaheko iaby o saren-drahare’eo,

fa natonto’e an-tamben-karapilo,

le hibalike ho tamben-tsimirirañe. 8 Aa le hangoihoy naho hikoiakoiake iraho,

hihalo naho hibongy te handeha;

hanao fitrèn-drimo vaho

fandalàm-boron-tsatrañe. 9 Tsy lefe hahàñe o fere’eo,

fa nandakake mb’e Iehoda ao;

fa nahatakatse ty lalambei’ ondatikoo;

Eka, pak’ e Ierosalaime ao. 10 Ko taroñe’o e Gate añe,

ko mirovetse;

mivarimbariña an-davenok’ ao

ty amy anjomba’ i Ofrày[l]. 11 Mihelaña mb’eo ry mpimoneñe e Safire ao[m];

ami’ty hameñaram-piboridaña’o;

tsy lefe ty fivoratsaha’ o

mpimone’ i Tsa’ananeo[n];

mangololoike ty Bete’haetsele[o]

hasinta’e ama’o ty fijohaña’o. 12 Mifeak’ am-pitamàñe hasoa

o mpimone’ i Maròteo[p]

fe nivotrak’ an-dalambei’

Ierosalaime eo boak’ am’ Iehovà

ty hankàñe. 13 Feheo amo sareteo o soavalao,

ry mpimone’ i Lakìse[q],

ihe namototse ty hakeo’

i anak’ ampela’ i Tsioney[r],

vaho nizoeñe ama’o

o fiolà’ Israeleo. 14 Aa le ho banabanae’o ravoravom-piavotañe ty Moresete-Gate;

ho famañahiañe amo mpanjaka’

Israeleo o anjomba’ i Akzìbeo[s]. 15 Mbore haseseko ama’o ty mpitavañe,

ry mpimone’ i Maresà;

himoak’ Adolame[t] ao ty enge’ Israele. 16 Mipeaha irehe, miharata

ty amo anake mahafale azoo;

indrao ty hasola’o hifanahak’ ami’ty koáke, ie hieng’azo mb’an-drohy mb’eo.

Mikà 2 ->