Matio 5

Fitatañe

Lke 6.20-26

1 Ie tendreke i lahialeñey le nitroatse mb’am-bohitse ey naho niambesatse vaho nimb’ama’e mb’eo o mpiama’eo. 2 Nanoka-palie re, naho nañòke ami’ty hoe:

3 Haha o mirèke an-trok’ aoo, fa a iareo i fifehean-dikerañey*.

4 Haha o miharovetseo fa hohoeñe†,

5 Haha o trentrañeo, fa handova ty tane toy.‡

6 Haha o mivalingoa naho miheahea

mipay havantañañeo,

fa hanjañeñe.§

7 Haha o miferenaiñeo,

fa hiferenaiñañe.*

8 Haha o malio añ’arofoo†, fa ho isa’iereo t’i Andrianañahare.

9 Haha o milozoke fifampilongoañe,‡

fa hatao anan’ Añahare.

10 Haha o samporeraheñe ty ami’ty hatòo§,

fa a iareo i fifehean-dikerañey.

11 Haha nahareo te injèñe naho ampisoañeñe vaho tambaimbaiñeñe, amy ze fonga haloloañe ty amako, am-bolam-bande. 12 Mirebeha naho mandià taroba amy te ra’elahy ty tambe’ areo andindìñe ao, fa hambañ’ amy zay ty nampisoañeñe o mpitoky taoloo.

Sira naho Jiro*

13 Sira’ ty tane toy nahareo. Fe naho nàmoñe i siray, inoñe ty haniràñe aze? Toe tsy vara fa hariañe alafe ao ho lialiàm-pandia. 14 Hazavàñe an-tane atoy nahareo. Tsy lefe aetake ty rova namboareñe am-bohitse ey. 15 Tsy ameloman-jiro hampikopoke aze añ’etake ao tsy hitapasàha’e, f’ie apoke am-pitàn-jiro eo, hañazava ze hene añ’anjomba ao. 16 Aa le atsavavaho amy ze fonga ondaty ty hazavà’ areo, hitoroañe o sata-soa’ areo ho rengeñe naho onjoneñe añatrefan-dRae’ areo andindìñ’aoo.

Hafonirañe o Lilio

17 Ko atao’areo te nimb’ atoy iraho hamaoke Hake, Tsy nimb’atoy handrotsake fa ty hameno aze.† 18 Eka, to t’itaroñako te, ampara’ te mihelañe añe i likerañey naho ty tane toy, tsy ho faopaoheñe amy Hake ndra amo Mpitokio ze ana-tsoritse ndra hirike, amy te kila ho heneke‡. 19 Ndra iaia miota ami’ty raike amy lily rezay vaho ampiohe’e ami’ty ila’e, ro hatao kabeake amy fifehean-dikerañey; fe ndra iaia mañambeñe vaho mañoke irezay, ty hatao jabajaba amy fifehean-dikerañey.

20 Taroñeko ama’ areo, naho tsy mandikoatse ty havañona’ o Fariseoo naho o Androanavio ty havantaña’ areo§Mat 23:28, 15:3-9, Mar 7:7-13, Jao 7:19, Top 7:53, Rom 2:23-27, Gal 6:13 le tsy hizilike am-pifehean-dikerañ’ ao nahareo.

Vono Ndaty

21 Tsy fa jinanji’areo hao ty nisaontsieñe amo ntaoloo ty hoe:

Ko mañoho-doza*, naho:

Mikai-jaka mampihomake ty mpamono†?

22 Aa hoe iraho ama’areo: Hiatre-jaka ty maha-viñetse i mpiama’ey tsy an-dengo’e, naho hampiatrefem-pivory ze manao ty hoe aman-drahalahi’e: Itrotse irehe; vaho mipay afo an-tsikeokeoke ao ze manao aman-drahalahi’e ty hoe: Ty gege tia. 23 Aa ihe mibanabana an-kitrely vaho tiahi’o te anaña’ ty rañe’o kabò vaho itoreova’e, 24 le adono aolo’ i kitreliy eo i enga’oy naho akia, ifampilongo heike, izay vaho hengae’o i banabana’oy.

25 Ampanintsiño masìka i rafelahi’oy, ie mbe indreza’o fañavelo an-dalañe ey, tsy mone hasese’e ami’ty zizy, le hasese’ i ziziy amy mpitoroñey, hampijoñe azo am-porozò ao. 26 Eka, to t’italiliako, te tsy hiakatse ao ampara’ te avaha’o ty drala honka’e‡Drala-honka’e: kodrantes: drala torisike bory hoe drala roe.

Hakarapiloañe

27 Fa jinanji’ areo i nitsaraeñe am’iereo haehae’ey, ty hoe: Ko mañarapilo.§ 28 Fe hoe iraho ama’ areo: ze mikiroke ampela hilà’e aze, le fa nanao hakarapiloañe an-trok’ ao. 29 Naho mizizy azo ty fihaino’o havana, akatraho vaho ahifiho añe; hasoa ho azo te hianto ty fange’o raike ta te homb’ an-tsikeokeoke ao ty vata’o iaby. 30 Tovo’e: Ie manigìke azo ty fità’o, kitsiho; hasoa ho azo te ho rebake fange raike ta t’ie havokovoko an-tsikeokeoke ao ary vatañe.

Tsey Valy

31 Fa jinanji’ areo ty nitsaraeñe amo taoloo te: Ze mitsey valy ro hanolots’ aze takelam-pifanarahañe*.† 32 Itaroñeko te ze mañary valy, naho tsy t’ie nañarapilo, le tsi-mete tsy itolorañe takelam-pifanarahañe; naho o hakarapiloañeo, mañarapilo i lahilahiy vaho karapilo ty mañenga i nariañey.

Sangy

33 Toe jinanji’ areo ka ty nisaontsieñe amo taoloo,

Ko mifànta vìlañe ami’ty añarako,

le avaho am’ Iehovà o nifantà’oo.‡?

34 Fe hoe iraho ama’ areo: ko manao fanta tsy vente’e aman-dra inoñ’ inoñe,

ke amy likerañey,

fa ie ty fiambesan’ Añahare;

35 he ami’ty tane toy,

amy te ie ty fitongoàm-pandia’e§;

ke am’ Ierosaleme,

fa ie ty rovan’ Añahare*,

36 he ami’ty añambone’o ie tsy mahafoty ndra mahamainte ty maròy raike. 37 Ehe te ho Eka ty hoe Eka, naho ho Aiy ty hoe Tsie, fa hirik’ amy ratiy ze tovo’e.†Its 23:21; Sor 19:12

Valefate

38 Toe jinanji’areo ty nitsaraeñe amy Hake:

Fihaino soloam-pihaino,

naho fihitsike soloam-pihitsike.‡

39 Fe hoe iraho ama’ areo:

ko vale’o raty ty raty.§

Fa ze mandrara-tehake azo am-piambina’o havana, atoliho ama’e ka ty havia. 40 Ty te hanesek’ azo an-jaka, higaoñe i saravi’oy, afofio ama’e ka ty saro’o. 41 Ze manjizy azo hañavelo arivo lia, mindreza ama’e ro’arivo. 42 Anoloro ty mihalaly ama’o, le ko ifoneña’o ty te hisongo ama’o.

Fikokoañe *

43 Fa jinanji’ areo ty nitsaraeñe amo taoloo:

kokò ty marine azo†, vaho

hejeo ty malaiñe azo.‡

44 Fa hoe ka iraho ama’areo: Kokò o rafelahi’oo, tatao ty mamatse azo, le hasoao ty malaiñe, vaho mihalalia ho a o mampisoañe naho mamorekeke azoo, 45 soa t’ie ho anan-dRae’ areo andindìñe ao; fa songa ampanjirihe’e amo ratio naho amo soao i androy, vaho ampahavie’e amo vantañeo naho amo tsy vokatseo i orañey§Lke 6:35, Top 14:16-17:. 46 Aa naho o mikoko anahareoo avao ty kokoa’ areo, inoñe ty ho tambe’ areo? Tsy izay hao ty anoe’ o mijiajiao amo mikoko iareoo? 47 Aa naho o longo’areo avao ro añontanea’areo, ino ty anoe’o mandikoatse o kilakila’ndatio. 48 Aa le mivantaña manahake te vantañe t’i Rae’ areo*Fot 17:1, Mp1 8:61, Sab 119:1, Jn1 2:5, Heb 6:1.

<- Matio 4 Matio 6 ->