Link to home pageLanguagesLink to all Bible versions on this site

1 Ie niliforeñe amy Arofo Masiñey t’Iesoà le nibalike boak’ am’ Iordaney, vaho niaoloa’ i Arofoy mb’am-baban­goañ’ añe, 2 efapolo andro te nanjizia’ i mpañìnjey ie tsy nikama ndra inoñ’ inoñe amy andro rezay. Modo izay le nisaliko, 3 vaho hoe i mpañìnjey tama’e: Naho toe Anan’ Añahare irehe, ampinjareo mofo o vatoo. 4 Hoe ty natoi’ Iesoà aze: Pinatetse ty hoe:

Tsy mofo avao ty mahaveloñe ondaty[a],

5 Le nendese’ i mpañìnjey niañambone vohitse mitiotiotse eñe vaho natoro’e aze amy zao ze kila fifeheañe an-tane atoy. 6 Le hoe i Ratiy tama’e: Hatoloko Azo o haozarañe iaby zao naho o enge’ iareoo, fa natolots’ ahy, vaho hatoloko amy ze satriko; 7 le kila ho Azo t’ie hiambane amako etoañe. 8 Hoe ty natoi’ Iesoà: Hoe ty pinatetse:

Iehovà Andrianañahare’o ro hitalahoa’o, ie avao ty hitoroña’o.[b]

9 Le nendese’e mb’e Ierosaleme mb’eo naho nampiningire’e an-dengom-pita­lakesan’ abo’ i Anjomban’Añaharey vaho nanoa’e ty hoe: Naho toe Anan’ Añahare irehe, miponaha ambane ey, 10 ty amy pinatetse ty hoe:

Ho lilie’e amo Anjeli’eo irehe,
ty hañaro azo; 11 vaho, Ho tanatanà’ iereo,
tsy ho dasirem-bato o fandia’oo.’[c]

12 Tinoi’ Iesoà ty hoe: Hoe ty tsara:

Asoao tsy ho tsohe’o t’Iehovà
Andrianañahare’o.[d]

13 Ie nagado’ i mpañìnjey i fanjizi­añe iaby zay, le nidisak’aze heike.

To Tsara e Galilia ao Mat 4.12; Mar 1.14
14 Aa le nibalike mb’e Galilia mb’eo t’Iesoà ami’ty haozara’ i Arofoy; le niboele tok’aia tok’aia amy tane nañohokey ty enge’e. 15 Nañoke amo fitontonañeo re le hene nañonjoñ’ aze.
Fañorizañe Iesoà
16 Nimb’e Nazareta mb’eo re, i rova nahabey azey, le ami’ty lili’e, nizilik’ am-pitontonañe ao ami’ty andro Sabotse, vaho niongake hamaky. 17 Natolotse aze ty boke’ Isaia mpitoky; vinela’e i bokey, vaho nioni’e ao ty nisokirañe ty hoe:
18 Amako t’i Arofo’ Iehovà,
Fa noriza’e hitsey i talili-soay amo rarakeo,
Nafanto’e hikoike famotsorañe amo mpirohio,
naho fampaha-isahañe amo feio, vaho fampidadàñe amo dinemokeo,
19 hitsey ty taon-joba’ Iehovà.[e]

20 Napele’ Iesoà amy zao i bokey le nahere’e amy mpamandroñey le niambesatse; vaho hene nitalatse aze ty fihaino o am-pitontonañeo.

21 Le hoe t’Iesoà tam’ iereo: Fa nihenek’ anindroany an-dravembia’ areo i Sokitse Masiñe zay. 22 Aa le sindre nitalily soa aze vaho nidaba amo tsara soa naakam-palie’eo, fe hoe iareo: Tsy ana’ Iosefe v’itoio?

23 Aa le hoe re tam’iereo: Va’e hatao’ areo amako ze oha-drehake zao : O mpanaha, afaho ty vata’o, vaho anò an-tane’o etoan-ka o raha jinanji’ay te nanoe’o e Kapernaomy añeo. 24 Le tinovo’e ty hoe: Eka! to t’Itaroñako te tsy eo ty mpitoky to-saontsy an-tane’e ao; 25 To ty volako ama’areo te: Maro ty vantotse e Israele ao tañandro’ i Elia, ie nagabeñe telo taoñe tsy enem-bolañe i likerañey vaho nandrambañe i Taney ty kerè; 26 fe leo raik’ ama’e tsy nañirahañe i Elia naho tsy i rakemba vantotse nte Zarefata e Sidona añey. 27 Maro ka ty niazo’ ty angamàe e Israele ao tañandro’ i Elisa mpitoky, fe tsy ama’e ty nafahañe naho tsy i Namana nte-Sore.

28 Ie nahajanjiñe izay o am-pitontonañeo, le fonga nilifo-kabosehañe, 29 naho niongake nanafasiotse aze mb’ alafe’ i rovay añe, vaho nendese’ iereo mb’an-tevam-bohi’ i rovay mb’eo hampitsirikoàk’ aze an-kere­retsak’ ao, 30 f’ie nienga, niranga iareo mb’eo.

Mañakatse Kokolampa Mat 4.13-14; Mar 1.21-23
31 Nizotso mb’e Kapernaomy, rova e Galilia añe re naho nañanatse amo Sabotseo. 32 Le nidaba iereo amy fañòha’ey amy te ninday lily o tsara’eo.

33 Teo ty lahilahy am-pitontonañe ao nangara’ ty kokolampa, nitazataza 34 ty hoe: Hete! Ino ty itraofan-tikañe, ry Iesoà nte Nazareta? Niavy hanjamañ’ anay v’ Iheo? Fantako irehe; Ihe i Masin’Añaharey. 35 Trinevo’ Iesoà ami’ty hoe: Mamantsy, iakaro! Aa le nafetsa’ i koko­lampay añivo eo re, vaho nifaok’ añe fe tsy nijoia’e. 36 Fonga nilatsa, le hoe ty vesoveso’ iareo: Aa vaho akore i tsara zay t’ie aman-dily naho hao­zarañe ro mañendake koko­lampa hifaoke. 37 Le niboele nanitsike i fariparitsey ty enge’e.

ty Rafoza’ i Simona Mat 8.14-17; Mar 1.29-34
38 Ie nienga i fitontonañey t’Iesoà, le nizilik’ añ’anjomba’ i Simona ao. Niremboremboe’ ty hamae-sandriñe ty rene’ i vali’ i Simonay le nihalalia’ iareo ty ama’e. 39 Aa le nijohañe ambone’e eo re nitrevoke i hasilokey, vaho nisitak’amy rekambay zay; tsipaepae’e nitroatse re niatrake iareo.
Nanitsike i Galilia Mat 4.23-25; 8.16, 17; Mar 1.32-39
40 Ie nimotak’àndro, le nen­deseñe ze nanañe marare nisilofe’ndra inoñ’ inoñe mb’ ama’e mb’eo, naho songa nanampeza’e fitàñe vaho nampi­jangañe’e. 41 Niakatse ami’ty maro ka o kokolampao nikoiake ty hoe: Ihe i Norizañe, Anan’Añaharey! Le nendaha’e vaho nafanto’e tsy hivolañe amy te napota’ iareo t’ie i Norizañey.

42 Ie manjirik’ andro le nienga mb’ an-tane bangìñe mb’eo fe ni­tsoeha’ i lahialeñey, ie nomb’ ama’e mb’eo vaho ho nanjitse aze tsy hienga; 43 fe hoe re am’iereo: Tsy mahay tsy mitaroñe i Talili-soam-Pifehean’Añaharey an-drova ila’e ka iraho fa izay ty nañirahañ’ ahy. 44 Le nita­roñe amo fitontonañe e Galiliao re.

Vokatse Fiañe Mat 4.18-22; Mar 1.16-20