1 Nitsara am’ Iehosoa t’Iehovà ami’ty hoe: 2 Saontsio amo ana’ Israeleo ty hoe: Tendreo o rovam-pitsolohañe nita­roñeko ama’ areo am-pità’ i Mosèo; 3 ie amy zay, i mañoho-doza ama’ ondaty tsy nitsatrie’ey, ty hilay mb’eo, toe ho fitsoloham-pamale-fate. 4 Ie hitriban-day mb’ ami’ty raik’ amy rova rezay, naho hijohañe an-dalambei’ i rovay, naho hitaroñe ty aze an-dravembia’ o androanavi’ i rovaio; le hampihovae’ iareo amy rovay vaho ho tolora’ iareo toetse himoneña’e am’ iareo. 5 Naho mañoridañe aze i mpamale-fatey le tsy hasese’ iereo am-pità’e i namonoy amy te tsy ni-satrie’e ty nanjevoñe i rañe’ey ie tsy niheje’e taolo. 6 Himoneña’e i rovay ampara’ te mijohañe añatrefa’ ty fivory ty hizaka aze; am-para’ ty fihomaha’ ty mpisorom-bey henane zay; himpoly amy zao i mpamonoy mb’ an-drova’e naho mb’añ’akiba’e, mb’ amy rova nihirifa’e an-daiy.

7 Aa le navì’ iareo ty Kedese e Ga­lilà[a] am-bohibohi’ i Naftalý[b] ao naho i Sekeme am-bohibohi’ i Efraime ao, vaho i Kiriate-arbà[c] (i Ke­brone[d] zay), am-bohibohi’ Iehoda ao. 8 Naho alafe’ Iardeney, atiñana’ Ieriko, le tinoro’ iereo i Betsere[e] am-patrambey an-tane pisakey boak’ am-pifokoa’ i Reobene ao, naho i Ramote[f] e Gilade amy fifokoa’ i Gadey, vaho i Golane[g] e Basane amy fifokoa’ i Menasè. 9 Ie o rova natoro amo hene ana’ Israeleo naho amo renetane mañialo am’ iareoo, te eo ty mañoho-doza ama’ ondaty tsy nitsatrie’e le añe ty itribaha’e an-day tsy hivetrake am-pità’ i mpamale-fatey am-para’ ty ijohaña’e añatrefam-pivory.

<- Iehosoa 19Iehosoa 21 ->