1 Ty bekoeñe i Moabe:

Amy haleñe androtsahañe i Arey,

mongotse ty Moabe;

amy haleñe androtsahañe i Kirey,

mongotse ty Moabe.

2 Nionjoñe mb’amy Baite[a] mb’eo re,

mb’amy Dibone[b],

naho o haboañeo hirovetse;

mb’amy Nebò[c] naho i Medeba[d],

mañaolo t’i Moabe;

sola peake ze hene añambone,

hinitsike ze fonga somatse.

3 Misikin-gony an-dalañe eo;

songa mangololoike,

mangoihoy ty rovetse

o an-tafon’ anjomba

naho an-tameañeo.

4 Mikaikaike ka ty Kesbone[e]

naho i Elalè[f];

tsanoñeñe pak’e Iatsà[g] ty feo’ iareo;

mikointsañe o lahin-defo’ i Moabeo;

mitoirañe an-tro’e ao ty fiai’e.

5 Tolihe’ ty troko t’i Moabe,

ie mitriban-day mb’e Tsoare[h] mb’eo o sehanga’eo,

i kiloa telo taoñey;

fa amy fitroara’ i Lotitey[i] eo ty

angololoiha’ iareo am-panganihañe,

amy lala’ i Koronaimey[j]

ty ikoiha’ iareo hazolava.

6 Koake o rano’ i Nimrimeo[k];

hene niforejeje ty ahetse,

niheatse o bokao,

tsy aman’ antsetra.

7 Aa le hasese’ iareo

mb’an-Torahan-Tsohihy mb’eo

ty vara nivokare’ iereo,

ty vokatse nahaja’ iareo an-driha ao.

8 Nanitsike i Moabe pak’añ’efe-tane’e añe i koikey,

i fañaoloa’ey pak’ Eglaime[l],

i fangololoiha’ey pake Birelime[m].

9 Atse-dio ty rano’ i Dimone[n];

fe mbe ho tompeako ty Dimone,

ty liona, amo ­hivoratsake boake Moabeo,

naho amo sehanga’ i taneio.

<- Iesaià 14Iesaià 16 ->