Hosèa

1 Niheo amy Hosea[a] ana’ i Bierý[b] ty tsara’ Iehovà faha’ i Ozià naho Iotame naho i Akhaze[c] naho Khizkiia[d] mpanjaka Iehodà, vaho Iarobàme[e] ana’ Ioàse[f], mpanjaka’ Israele[g].

2 Ie namotsotse nitsara amy Hosea t’Iehovà, le hoe t’Iehovà amy Hosea, Akia mañengà karapilo ho vali’o, ty anak’ ampela boak’ an-kàrapiloañe ao; fa toe mpanao hakarapiloan-kalalijake naho miamboho am’ Iehovà o taneo. 3 Aa le nimb’eo re nañenga i Gomere[h], ana’ i Diblaime[i], le niaren-dre vaho nisamaha’e anadahy. 4 Le hoe t’Iehovà ama’e, Toñono ty hoe Iezreèle[j] ty añara’e; fa tsy ho ela te havaleko ami’ty anjomba’ Iehò[k] ty lio’ Iezreèle, vaho hagàdoko ty fifehean’ anjomba’ Israele. 5 Ie amy andro zay, ho pozaheko ty fale’ Israele am-bavatane’ Iezreèle ao. 6 Niareñe indraike re nahatoly anak’ ampela, le hoe re tama’e, Toñono ty hoe Lorokamà[l] ty añara’e: fa tsy ho ferenaiñako ka ty anjomba’ Israele, toe tsy iheveako. 7 Fe ho tretrezeko ty anjomba’ Iehodà le ho rombaheko añam’ Iehovà Andrianañahare’ iareoy, fa tsy ho rombaheko am-pale ndra fibara ndra hotakotake ndra soavala ndra mpiningi-tsoavala.

8 Aa ie notañe’e t’i Lorokamà, le niareñe indraike nisamak’ anadahy. 9 Le hoe re, Toñono ty hoe Loamý[m] fa tsy ondatiko nahareo vaho tsy ho Andrianañahare’ areo iraho.