Galate 4

1 Hoe ty hatovoko: Tsy mifañòva ami’ty ondevo ty mpandova mbe ajaja, ndra t’ie ty tompo’ ze he’e; 2 amy t’ie fehè’ o mpañabeio naho o mpañokeo ampara’ ty andro tinendren-drae’e. 3 Itikañe ka, naho mbe ni-ajaja ro nondevoze’ o fañè’ ty voatse toio. 4 Fa naho nitsatoke ty fañenefañe i saay, le nahitrin’ Añahare t’i Ana’e, sinama’ ty Rakemba, toly ambane’ Hake, 5 hijebañe o ambane’ Hake aoo, hameloñe an-tika ho anake. 6 Aa kanao anake, le fa nahitrin’ Añahare añ’arofo’ areo ao t’i Arofo’ i Ana’ey, mikoike: Aba, Rae. 7 Aa le tsy ondevo ka irehe, fa anake; aa kanao anake, le mpandova aman’ Añahare, añamy Norizañey.

Endaha’ i Paoly

8 Ie taolo, mbe tsy nahafohiñe an’Andrianañahare, naho niondevo’ o toe tsy ndrañahareo; 9 f’ie mahafohiñe an’ Andrianañahare henaneo—toe i Andrianañahare ty maharofoanañe anahareo—aa mañino te tolihe’ areo indraike o fañè maleme naho votroo*? Te hiheren-ko ondevo’ irezay indraike v’inahareo? 10 hañorik’ andro naho volañe naho sa vaho taoñe? 11 Imarimarihako he kafoake ty nifanehafako ama’ areo.

12 O ry longo, mihalaly ama’ areo, misoloa ahy, manahake ty nisoloako anahareo—ie tsy nanao raty ahy. 13 Fohi’ areo te an-kasilofan-tsandriñe ty nitaroñako i talili-soay tam-baloha’e. 14 Le tsy nisirikaeñe naho tsy nampangorì’ areo, i nañembetse ahy amy hasilofan-tsandrikoy, fe nampihovae’ areo hoe t’ie ni-anjelin’ Añahare, toe nanahake Iesoà Norizañey. 15 Aia i fañanintsiñe tama’ areoy? Mahavolan-draho naho nimete, te ho napoliti’ areo o fihaino’ areoo vaho natolots’ ahiko. 16 Aa vaho rafelahi’ areo hao iraho kanao ivolañako ty hatò?

17 Malisa mipay anahareo iereo, tsy te hañasoa, fa ty hampiria an-tikañe, hipiteha’ areo ama’e. 18 Soa avao te paiañe t’ie hahimbañe nainai’e ho ami’ty hasoa, fa tsy t’ie miatreke avao. 19 Ry anake, hoe mitsongo te hiterake indraike iraho ampara’ te miforoñe ama’ areo ao i Norizañey. 20 Sinda te ho ama’ areo iraho henaneo hiovà’ ty feoko fa mahasekatse ahy.

I Hagara naho i Saraha

21 Mitalilia, ie te ho fehè’ i Hake, ke tsy janji’ areo t’i Hake? 22 Toe pinatetse te nanañ’ anake roe t’i Abraàme, teo ty a i ondevo ampelay, teo ty a i rakemba hahay. 23 Naterake amo haondatio i anak’ ondevoy, fe amy nampitamañey i anan-drakemba hahay; 24 fandrazañañe ami’ty fañina roe iereo: ty raike hirike am-bohi-Sinaiy miterake fañondevozañe, i Hagara zay. 25 Vohi-Sinay e Arabia añey t’i Hagara, ie manoiñe ho Ierosaleme henaneo, amy t’ie mitoroñe hoe ondevo miharo amo ana’eo. 26 Fe haha t’Ierosaleme ambone ao, ie ty renen-tikañe. 27 Hoe ty pinatetse:

Mirebeha ry betsiterake tsy mahatoly!

Mipoñafa an-koiake, ry tsy mitsongoo!

Fa maro ty ana’ i bangiy,

te amy amam-baliy.†

28 Le manahak’ Isaka, ana’ i fampitamañey, tika ry longo. 29 F’ie henane zay, nampisoañe’ i naterake amy nofotseiy i amy Arofoy, le ie ka henaneo. 30 Aa vaho ino ty pinatetse amy Sokitse Masiñey ao?

Aitò i ondevo ampelay naho i ana’ey,

fa tsy hitrao-dova amy ana’ i rakembaiy ty ana’ i ondevoy.‡

31 Ie amy zao ry longo, tsy ana’ i ondevo ampelay tika, fa amy hahay.

<- Galate 3 Galate 5 ->