1 Nitsara amy Mosè t’Iehovà nanao ty hoe, 2 Misaontsia amo ana’ Israeleo, ty hañenga raha amako. Toe ze ondaty manolotse an-tsatri’e ro andrambesañe enga ho amakoy. 3 Zao ty enga ho rambese’o am’iareo : volamena naho volafoty vaho torosìke; 4 le manga naho malòmavo naho mena mañabarà naho leny marerarera vaho volon-ose; 5 le holin’ añondri-lahy linoko mena naho holin-trozofisoitse vaho mendoraveñe; 6 solike ho amy jiroy, emboke ho amy menake fañorizañey naho ho amy fañembohañe mandrifondrifoñey; 7 vato sohàme*Sohame: vato soa bandieñe naho vato soa hapetake ami’ty kitambe naho ami’ty takon’ araña. 8 Le ampandranjio kivoho himoneñako am’ iereo ao, 9 hilahatse amy ze he’e hatoroko azo, le ty sare’ i kivohoy naho ty sare’ o harao’e iabio ty handranjia’o aze.

10 Ho tsenè’ iereo ami’ty mendoraveñe ty vata; kiho roe naho tampa’e ty ho andava’e le kiho raike naho tampa’e ty ho ampohe’e vaho kiho raike naho tampa’e ty haabo’e. 11 Ipakoro volamena ki’e, ao naho eo ty ampipakora’o aze, le ampiarikoboño soñi’e volamena ty andrira’e. 12 Iramerameo ravake volamena efatse, le ampireketo an-kotso’e efatse; ravake roe etia vaho ravake roe atia. 13 Le andranjio baoñe mendoraveñe vaho ipakoro volamena. 14 Atsorofoto amy ravake añ’ ila’ i vatay rey i baoñe rey hitarazoañe i vatay. 15 Hadoñe amo ravakeo avao i baoñe rey le tsy hafahañe. 16 Hajo’o amy vatay i Fañinay, i hatoloko azoy.

17 Itseneo toem-pijebañañe volamena ki’e; kiho roe naho tampa’e ty andava’e vaho kiho raike naho tampa’e ty ampohe’e. 18 Le andranjio kerobe volamena roe, am-pipepehañe añ’ ila roe i toem-pijebañañey; 19 kerobe raike etoañe naho kerobe raike eroañe. Tseneo am-bongam-bolamena raike i toem-pijebañañey naho i kerobe rey. 20 Hamelatse elatse ambone’e i kero­be rey, hanakoñe i toem-pijebañañey an-elatse, sindre hifañatre-daharañe naho hitolike amy toem-pijebañañey ty lahara’ i kerobe rey. 21 Apoho ambone’ i vatay boak’ ambone i toem-pijebañañey, le ajoño amy vatay i Fañinay, i hatoloko azoy, 22 le hihaoñe ama’o iraho ambone’ i toem-pijebañañey, boak’ añivo’ i kerobe roe ambone’ i vatam-pañinay rey naho ho taroneko ze hene ho lilieko amo ana’ Israeleo.

23 Mandranjia rairay ami’ty roy, kiho roe ty andava’e naho kiho raike ty ampohe’e vaho kiho raike naho tampa’e ty haabo’e. 24 Ipakoro volamena ki’e vaho itseneo soñy ty andrira’e hañarikatok’ aze. 25 Le andranjio rira’e mizehe treham-pitàñe hañarikatofa’e fehe, vaho tseneo soñy andrira’e hañariary aze. 26 Itseneo ravake volamena efatse, le areketo an-ko­tso’e efatse, toe an-tombo’e efa­tse i ravake rey, 27 ho marine i rira’ey o ravake fitana’ o bao-pitakonañe i rairaiio. 28 Ranjio ami’ty mendoraveñe i baoñe rey vaho ipakoro volamena ho fitakonañe i rairaiy. 29 Le itseneo fanake volamena ki’e: fioke, endraendra naho fitovy. 30 Le hapoke ambone’ i rairay añatrefako nainai’ey i mofo miatrekey.

31 Tseneo am-bolamena ki’e ty fitàn-jiro; pepeheñe i fitàn-jiroy; ho raik’ ama’e ty foto’e rekets’ i taho’ey, o korobo’eo, o rava-drave’eo vaho o voñe’eo; 32 ho eneñe ty tsampa miakatse amo ila’eo, ty tsampa telo’ i fitàn-jiroy ty hilosìtse ami’ty ila’e raike naho ty tsampa telo’ i fitàn-jiroy ty hilosìtse añ’ila’e ka; 33 korobo telo hoe boti-mahabibo ty an-tsampa’e raike songa aman-drava-draveñe naho ravem-boñe, le korobo telo hoe boti-mahabibo sindre aman-drava-draveñe naho ravem-boñe amy tsampa tandrife azey; sambe hoe izay i tsampa’e eneñe miakatse ami’ty taho’ i fitàn-jiroy rey.

34 Amy taho’ i fitàn-jiroiy ty ho korobo efatse nitsenen-ko sarem-boti-mahabibo rekets’ o rava-drave’eo naho o ravem-boñe’eo. 35 Ami’ty fireketa’ ty tsempa’e ki-roe-roe amy taho’ey ty ho rava-draveñe miray ami’ty tsampa’e roe, ho amy tsampa’e eneñe rey. 36 Ho raik’ amy taho’ey o rava-drave’eo naho o tsampa’eo, aa le ho vongam-bolamena ki’e raike nipepeheñe i fitàn-jiro fonitsey. 37 Itseneo jiro fito, le hatsatoke hipasàk’ aolo’e mb’eo i jiro rey. 38 Ho volamena ki’e o fiharata’eo naho o sadrò’eo. 39 Talènta†talenta raike = 30 kilao volamena ki’e raike ty itseneañe aze naho i harao’e iaby rezay. 40 Henteo arè, le itseneao hambañe amy sare’e natoro azo ambohitsey.

<- Avotse 24Avotse 26 ->