Amose

1 Ty enta’ i Amose[a], mpiamo mpiarake e Tekoao[b], ty nioni’e am’ Israele faha-i Ozià[c] mpanjaka’ Iehoda naho faha Iarobame[d] ana’ Ioase[e] mpanjaka’ Israele, taoñe roe taolo’ i fanginikinihan-taney. 2 Hoe re:

Mitroñe boake Tsione ao t’Iehovà;

naho mipoña-piarañanañañe

hirike Ierosalaime añe;

naho hangoihoy ty fiandraza’

o mpiarakeo,

vaho hiheatse ty andingo’ i Karmele[f]. 3 Hoe ty nafè’ Iehovà:

Ty ami’ty fiolàñe telo’ i Damesèke[g]

naho i fah’efa’ey,

le tsy hapoko ty fandilovañe aze,

ami’ty namofoha’ iareo i Gilade[h]

am-pamofohañe viñe. 4 F’ie hañitrifako afo mb’añ’anjomba’

i Kazaele[i]

ze hamorototo o anjomba’

i Benhadadeo[j]. 5 Ho pozaheko ty sikada’ i Damesèke,

le haitoako o mpimoneñe

am-bavatane’ i Avene[k] eio,

naho i mpitan-kobaiñe añ’anjomba’

i Edene aoy;

vaho hasese an-drohy mb’e Kire[l]

mb’eo o nte-Arameo,

hoe ty nafè’ Iehovà. 6 Hoe ty nafè’ Iehovà:

Ty ami’ty fiolàñe telo’ i Azà[m],

naho i fah’efa’ey,

le tsy hapoko ty fandilovañe aze,

fa nasese’ iereo an-drohy ze hene mpimoneñe,

vaho naonjo’iereo mb’e Edome mb’eo, 7 Aa le hañitrifako afo ty kijoli’ i Azà,

ze hampangotomomoke o anjomba’eo. 8 Haitoako amy Asdode[n] o mpimone’eo

naho i mitan-kobaiñe e Askelone aoy

naho hampitoliheko hiatreke

i Ekrone ty tañako;

vaho hihomake ty sehanga’ o nte-Pilistio,

hoe t’Iehovà, Talè. 9 Hoe ty nafè’ Iehovà:

Ty ami’ty fiolàñe telo’ i Tsore,

naho i fah’efa’ey,

le tsy hapoko ty fandilovañe aze,

amy te fonga nasese’ iareo mb’ Edome

o an-drohio, vaho tsy

nitiahi’ iareo i fañinam-piroahalahiy; 10 Aa le hañitrifako afo ty kijoli’ i Tsore,

ze hampibotseke o anjomba’eo. 11 Hoe ty nafè’ Iehovà:

Ty ami’ty fiolàñe telo’ i Edome,

naho i fah’efa’ey,

le tsy hapoko ty fandilovañe aze,

amy te hinorida’e am-pibara

i rahalahi’ey naho nifoneña’e tsy hitretre;

le nainai’e nandriatse i fifomboa’ey

vaho nitolom-piloroloro avao. 12 Aa le hañirahako afo t’i Temane[o],

hamorototo o anjomba’ i Botsrào[p]. 13 Hoe ty nafè’ Iehovà:

Ty ami’ty fiolàñe telo’ i Amone,

naho i fah’efa’ey

le tsy hapoko ty fandilovañe aze,

amy te nirimite’ iareo o rakemba’

i Gilade nivesatseo,

hampientatse ty efe-tane’ iareo. 14 Aa le hamiañako afo ty kijoli’ i Rabà[q] hampangotomomoke o anjomba’eo,

hitraofa’e fikoiakoiahañe

amy andron-kotakotakey,

naho tio-bey añ’andro’ i tangololahiy; 15 le hisese mb’am-pandrohizañe añe

i mpanjaka’ey, ie naho o roandria’eo,

hoe t’Iehovà.

Amose 2 ->