Apokalipse 12

Samea ulun hitu ameasa senhora ida ho nia Oan

1 Hotu tiha, iha sinal ida oin seluk liu mosu iha lalehan. Iha senhora ida, nia isin falun ho loro matan, nia ain sama fulan. Iha nia ulun tau koroa liurai nian, koroa nee iha fitun sanulu resin rua. 2 Senhora nee isin rua hela, besik atu tuur ahi, i nia tanis hakilar tanba nia kanotak moras loos.

3 Iha tan sinal ida mosu iha lalehan. Iha samea mean boot ida, nia ulun hitu, dikur sanulu. Iha nia ulun hitu nee tau koroa liurai nian ida-ida.✡Daniel 7:7 4 Samea ulun hitu nee uza nia ikun hodi baku makaas fitun parte ida husi parte tolu tuun ba mundu. Depois nia baa hamriik iha senhora isin rua nee nia oin para nia oan moris mai tolan kedas.✡Daniel 8:10 5 Senhora nee tuur ahi, Oan mane ida, Nia mak sei ukun nasaun hotu-hotu ho kroat. Depois anju ida mai hadau tiha Labarik nee husi nia inan, i lori ba iha Maromak, iha Nia kadeira ukun.✡Isaias 66:7; Salmus (Mazmur) 2:9 6 Senhora nee halai kedas ba iha rai fuik maran, iha fatin ida nebee mak Maromak prepara tiha ona ba nia. Maromak sei tau matan ba nia iha fatin nee too tinan tolu ho balu, nee hamutuk loron rihun ida atus rua neen-nulu.

7 Depois funu boot mosu iha lalehan. Maromak nia anju boot ida naran Miguel ho anju sira nebee mak tuir nia, halo funu hasoru samea ulun hitu nee. Samea ulun hitu nee mos iha nia anju, nunee sira funu hasoru Miguel ho nia anju sira.✡Daniel 10:13,21, 12:1; Judas 9 8 Too ikus samea nee lakon, nunee nia ho nia anju sira la bele hela tan iha lalehan. 9 Miguel ho nia anju sira soe sai tiha samea ulun hitu nee husi lalehan. Sira soe tiha samea mai mundu hamutuk ho nia anju sira hotu. Samea ulun hitu nee mak ema bolu “diabu nia boot” ka “Satanás”. Hori uluk kedas samea nee lohi ema hotu iha mundu para lao sala dalan.✡Jénesis (Kejadian) 3:1; Lucas 10:18

10 Depois hau rona lian makaas ida husi lalehan dehan nunee:

“Agora tempu too ona atu Maromak salva ema.

Ita nia Maromak hatudu ona Nia kbiit hodi ukun nudar Liurai.

Mesias, Salvador nebee mak Nia foti hori uluk kedas mos hatudu ona Nia kbiit.

Tanba uluk samea ulun hitu nee loron-kalan hamriik iha Maromak nia oin

hodi foo sala ba ita nia maluk sarani sira,

maibee agora samea nee soe sai tiha ona husi lalehan.✡

11 Ita nia maluk sarani sira manaan tiha ona samea ulun hitu nee,

tanba Bibi Oan nia raan fakar hodi salva sira,

i tanba sira foo sai nafatin Maromak nia liafuan.

Maski ema atu oho sira mos sira la hakiduk.

12 Nunee lalehan ho buat hotu-hotu iha lalehan haksolok ba!

Maibee buat hotu-hotu nebee moris iha rai ho tasi sei terus,

tanba Satanás tuun ona baa iha imi.

Nia laran nakali ona tanba nia hatene katak,

nia tempu atu halo buat aat besik hotu ona.”

13 Bainhira samea ulun hitu nee hatene katak, sira soe tuun tiha ona nia iha mundu, nia baa buka tuir senhora nebee mak tuur ahi Oan mane nee, atu halo terus nia. 14 Maibee senhora nee simu liras rua hanesan manu makikit boot ida nia liras para semo ba fatin nebee prepara tiha ona ba nia iha rai fuik maran. Iha nebaa Maromak sei hamahon nia durante tinan tolu ho balu*Iha nee hakerek dehan, “tempu ida, tempu rua, ho tempu sorin balu”. Nee dehan katak tinan tolu ho balu. para samea ulun hitu nee la bele halo buat aat ba nia. 15 Haree nunee, samea ulun hitu nee fakar sai bee barak hanesan mota boot husi nia ibun para mota bele lori senhora nee. 16 Maibee rai mak ajuda senhora nee hodi tolan tiha bee nebee mak sai husi samea nia ibun. 17 Nunee samea ulun hitu nee hirus teb-tebes senhora nee, too nia baa buka senhora nee nia oan sira seluk. Sira nee mak ema nebee halo tuir Maromak nia ukun fuan i foo sasin kona ba Jesus. 18 Depois samea nee baa hamriik iha tasi ibun.†Kopia livru Apokalipse husi tempu antigu barak. Balu dehan “Nia hamriik”, nunee refere ba samea ulun hitu. Balu tan dehan “Hau hamriik” hodi refere ba João.

<- Apokalipse 11 Apokalipse 13 ->