Salmu 95

Kantiku hahii nian

1 Mai ita hananu haksolok ba NAI Maromak;

mai ita haklalak makaas tanba Nia mak fatuk lolon boot hodi salva ita.

2 Mai ita baa iha Nia oin hodi foo agradese,

no toka muzika hodi hananu hahii Nia.

3 Tanba NAI nee Maromak boot;

Nia mak Liurai boot, Nia aas liu maromak sel-seluk.

4 Rai nee nia klean iha Nia liman laran;

foho aas hotu-hotu Ninian.

5 Tasi nee Ninian, tanba Nia mak kria;

Nia liman mak forma rai maran.

6 Mai ita hakruuk hodi adora Nia;

mai ita hakneak iha NAI Maromak ita nia Kriador nia oin.

7 [a][b]Tanba Nia mak Ita nia Maromak;

ita nee Nia povu nebee Nia tau matan,

bibi nebee Nia kuidadu.

Ohin loron, imi tenki rona Nia liafuan;

8 [c]la bele ulun toos hanesan imi nia bei-ala sira uluk halo iha rai Meriba,

hanesan uluk sira halo iha area Masá iha rai fuik maran.

9 Iha nebaa sira haree Hau nia milagre,

maibee sira koko Hau nafatin;

sira sadik nafatin Hau.

10 Durante tinan haat-nulu Hau hirus sira hodi dehan,

“Sira nee povu ida nebee sempre lao sees husi dalan loos,

no lakohi rona Hau nia liafuan.”

11 [d]Nee mak Hau hirus too Hau jura dehan,

“Ema sira nee sei la tama iha Hau nia fatin deskansa.”