Salmu 82

Nai Maromak mak Juis boot

Salmu Asaf nian.

1 Maromak tuur iha Nia fatin iha tribunal lalehan nian

hodi foo justisa ba maromak sel-seluk.[a]

2 Nia dehan, “Too bainhira mak imi tesi lia la loos

hodi defende fali ema aat?

3 Imi tenki foo justisa lo-loos ba ema kiik ho oan kiak sira;

defende ema kbiit-laek ho ema mukit sira nia direitu.

4 Salva ema kiik ho kiak sira;

hasai sira husi ema aat sira nia liman laran.

5 Maromak sel-seluk nee la hatene buat ida, sira la kompriende;

sira lao iha nakukun laran;

nunee mundu rai klaran nakdoko tiha.

6 [b]Hau dehan, ‘Imi sira nee maromak;

imi hotu Maromak Aas Liu nia oan.’

7 Maski nunee too tempu ida imi sei mate hanesan ema hotu mate;

imi nia vida sei remata hanesan ukun nain sira seluk.”

8 Maromak, hamriik ba hodi foo justisa mai mundu,

tanba nasaun hotu-hotu Ita Boot nian.