Salmu 2

Liurai nebee Nai Maromak hili

1 [a]Nusaa mak nasaun jentiu sira kombina malu?

Povu sira tau lia ba malu atu manaan saida?

2 Liurai sira iha mundu hamriik hamutuk;

nai ulun sira nee futu lia

kontra NAI Maromak

no kontra liurai nebee mak Nia foti tiha ona.

Ema sira nee dehan,

3 “Mai ita halo ita nia aan livre husi Maromak ho liurai nebee Nia hili nee;

mai ita harahun tiha korenti nebee mak futu metin ita.”

4 Nai Maromak hamnasa fali sira;

Nia tuur iha lalehan hodi goza sira.

5 Depois Nia hasee sira ho hirus;

Nia hatauk sira ho laran nakali dehan,

6 “Hau hatuur tiha ona Hau nia liurai

iha Siaun, Hau nia foho santu.”

7 [b]Liurai dehan, “Hau sei foo sai buat nebee NAI Maromak deklara tiha ona mai hau.

Nia deklara nunee:

‘O nee Hau nia oan.

Agora ba oin, Hau o nia Aman.

8 Husu mai Hau mak Hau sei foo nasaun hotu-hotu ba o;

husi rai ulun too rai ikun sei sai o nia riku-soin.

9 [c]O sei baku tohar sira ho rota besi;

o sei halo rahun sira hanesan ema baku rahun sanan rai.’ ”

10 Nee duni liurai sira, sai matenek ba;

nai ulun mundu nian, aprende di-diak ba.

11-12 Serbi NAI Maromak ho hamtauk,

hakruuk ba Nia[d] ho nakdedar.

Se lae Nia hirus, halo imi mate derepenti iha dalan,

tanba Nia laran nakali lalais.

Ema hotu nebee hamahon aan iha Nia, sira hetan ksolok.