Mateus 4

Satanás koko Nai Jesus

(Lucas 4:1-13; Marcos 1:12-13)

1 Hotu tiha, Maromak nia Espiritu domina Jesus i lori Nia ba iha rai fuik maran atu Satanás bele koko Nia.✡Ebreu 2:18, 4:15 2 Iha nebaa Jesus jejun durante loron haat-nulu, kalan haat-nulu, too Nia hamlaha. 3 Depois diabu tentador mai koko Jesus. Diabu nee dehan, “Se O Maromak nia Oan duni, haruka fatuk sira nee sai paun.”

4 Maibee Jesus hataan, “Iha Livru Sagradu hakerek,

‘Ema kriatura laos moris husi hahaan deit,

maibee presiza mos Maromak nia liafuan hotu-hotu.’ ”✡

5 Depois Satanás lori Jesus ba iha Jerusalém, Maromak nia sidade. Satanás lori Nia baa hamriik iha uma kreda boot nia tutun, 6 i dehan, “Se O Maromak nia Oan duni, soe aan tuun ba rai. Tanba iha Livru Sagradu hakerek dehan,

‘Maromak sei haruka Nia anju sira mai kuidadu O.’

‘Sira sei lolo liman hodi tane O, atu O nia ain la bele kona fatuk.’ ”✡

7 Maibee Jesus hataan dehan, “Iha Livru Sagradu mos bandu ema dehan,

‘La bele koko Maromak, o nia Nai.’ ”✡

8 Depois Satanás lori tan Jesus ba iha foho ida aas teb-tebes nia tutun, i hatudu ba Jesus nasaun hotu-hotu iha mundu tomak ho sira nia riku-soin hotu. 9 Satanás dehan ba Jesus, “Buat sira nee hotu hau sei foo ba O, naran katak O hakneak hodi adora hau.”

10 Maibee Jesus hataan fali dehan, “Satanás, sai tiha husi nee! Tanba iha Livru Sagradu haruka ema hotu-hotu nunee:

‘O tenki adora Maromak, o nia Nai,

i serbi mak Nia deit.’ ”✡

11 Hotu tiha Satanás husik tiha Jesus, i anju sira mai serbi Nia.

Nai Jesus komesa foo sai Liafuan Diak

(Marcos 1:14-15; Lucas 4:14-15)

12 Iha loron ida, Jesus rona katak ema kaer tiha João Sarani Nain hodi baa dadur iha komarka. Nunee Jesus husik tiha provinsia Judeia baa fali iha provinsia Galileia.✡Mateus 14:3; Marcos 6:17; Lucas 3:19-20 13 Too iha nebaa, Nia baa uluk iha Nia aldeia Nazaré, depois baa hela fali iha sidade Kafarnaum. Sidade nee iha tasi Galileia nia sorin, iha rai Zebulón ho Naftali.✡João 2:12 14 Nunee Jesus halo tuir saida mak Maromak nia profeta Isaias hakerek nanis ona dehan,

15 “Rai Zebulón ho rai Naftali,

besik tasi Galileia, iha mota Jordaun nia sorin ba,

rai Galileia, ema nebee laos Judeu nia hela fatin.

16 Iha rai nee, ema uluk moris iha nakukun laran,

maibee agora sira hetan ona naroman boot.

Iha sira nia rain, uluk nakukun atu lori sira ba mate haketak aan husi Maromak,

maibee agora naroman mosu ona hodi leno sira.”✡

17 Iha tempu nebaa Jesus komesa foo sai ba ema dehan, “Hakribi ona imi nia sala, tanba tempu besik ona atu Maromak ukun imi.”✡Mateus 3:2

Nai Jesus bolu peskador nain haat atu tuir Nia

(Marcos 1:16-20; Lucas 5:1-11)

18 Iha loron ida Jesus lao hela iha tasi ibun Galileia. Nia haree peskador nain rua soe hela dai iha tasi. Sira nain rua nee maun-alin, maun naran Simão, ema mos bolu nia Pedro. Alin naran André. 19 Jesus dehan ba sira, “Mai tuir Hau! Imi nee peskador ikan nian, maibee agora Hau sei hanorin imi atu sai peskador ba ema.” 20 Sira mos husik kedas sira nia dai hodi tuir Jesus.

21 Jesus lao nafatin, Nia haree tan ema nain rua, Tiago ho nia alin João. Sira nain rua hadia hela redi iha roo laran hamutuk ho sira nia aman Zebedeu. Jesus bolu tan sira nain rua atu tuir Nia. 22 Tiago ho João mos husik kedas sira nia aman ho sira nia roo hodi tuir Jesus.

Nai Jesus hanorin ema barak i kura sira nia moras

(Lucas 6:17-19)

23 Jesus lao iha provinsia Galileia tomak hodi hanorin iha ema Judeu sira nia uma kreda. Nia foo sai Liafuan Diak kona ba oinsaa Maromak ukun nudar Liurai. I ema nia moras oi-oin deit, Nia kura hotu kedas.✡Mateus 9:35; Marcos 1:39 24 Buat nebee Jesus halo, ema konta iha nebee-nebee too iha provinsia Síria tomak. Ema barak mai lori sira nia maluk nebee moras oi-oin, balu diabu tama iha laran, balu moras bibi maten, liman-ain mate ho moras sel-seluk tan. I Jesus kura moras sira nee hotu. 25 Ema barak teb-tebes mak tuir Jesus. Iha ema husi Galileia, husi rai Dekápolis, husi sidade Jerusalém ho provinsia Judeia, balu tan mai husi mota Jordaun nia sorin ba.

<- Mateus 3 Mateus 5 ->