Evanjelhu

Lucas

Tanba saa mak Lucas hakerek istoria nee

1 Senhor Teófilo* mak hau respeita.

Iha ema barak hakerek ona kona ba buat nebee mak Maromak halo ona iha ami nia leet. 2 Sira hakerek tuir lo-loos istoria nebee mak ami rona husi ema sira nebee akompanha Jesus nia moris husi primeiru kedas. Nia ema sira nee mak foo tutan Nia hanorin mai ami. 3 Hau rasik mos estuda di-diak ona istoria nee tomak husi huun too rohan. Nee duni hau desidi atu hakerek ba senhor, saida loos mak akontese, 4 para senhor mos bele hatene katak, buat nebee mak ema hanorin ona ba senhor kona ba Jesus, loos duni.

Anju foo hatene João Sarani Nain nia moris

5 Istoria nee hahuu bainhira liurai Herodes sei ukun iha provinsia Judeia. Iha tempu nebaa iha nai lulik relijiaun Judeu ida naran Zacarias. Nia tama iha grupu nai lulik Abias nian. Zacarias nia kaben naran Isabel, sira nain rua husi nai lulik Arão nia jerasaun.[b] 6 Sira nee ema nebee moris loos tuir Maromak haree, sira halo tuir hotu Nai Maromak nia lei. 7 Zacarias ho Isabel katuas ho ferik liu ona, maibee la iha oan, tanba hori uluk kedas Isabel la bele hetan oan.

8 Iha loron ida, Zacarias nia grupu mak baa halao servisu iha Nai Maromak nia uma kreda boot. Nunee Zacarias mos halao nia servisu hanesan nai lulik iha Maromak nia oin. 9 Tuir nai lulik sira nia kostumi, sira dada rifa hodi hatene see mak bele tama ba iha uma kreda boot nia laran hodi sunu ai morin iha Maromak nia oin. Iha loron nee, rifa monu ba Zacarias. 10 Entaun Zacarias tama ba laran. Bainhira nia sunu ai morin, ema barak halo hela orasaun iha liur.

11 Derepenti deit Nai Maromak nia anju ida mosu mai, hamriik iha altar sunu ai morin nian, iha sorin loos. 12 Haree nunee, Zacarias hakfodak i tauk teb-tebes. 13 Maibee anju nee hatete, “Zacarias, la bele tauk! Tanba Maromak rona ona o nia orasaun. O nia kaben Isabel sei tuur ahi, oan mane ida. O tenki tau nia naran João. 14 Nia sei halo imi nia laran haksolok teb-tebes. Bainhira nia moris mai, ema barak sei haksolok hamutuk ho imi. 15 Nai Maromak sei konsidera nia hanesan ema boot ida. Durante nia vida tomak, imi nia oan nee la bele hemu tua. I Espiritu Santu sei domina nia dezde iha nia inan nia kabun laran.[c] 16 Nia sei lori ema Israel barak fila fali ba Maromak, sira nia Nai. 17 João nia espiritu ho kbiit sei hanesan Maromak nia profeta Elias. João sei mai uluk hodi prepara povu atu simu ita nia Nai. Depois mak foin ita nia Nai mai. João sei halo aman sira nia laran hadomi fila fali sira nia oan. I ema sira nebee fila kotuk ba Maromak, nia sei halo sira tuir fali Maromak nia hakarak.”[d]

18 Zacarias husu ba anju nee, “Hau katuas liu ona, i hau nia kaben mos ferik liu ona. Oinsaa mak hau bele hatene katak buat nee loos?”

19 Anju hataan, “Hau Gabriel. Hau sempre hamriik iha Maromak nia futar oin. I Nia rasik mak haruka hau mai hatoo lia menon nee ba o.[e] 20 Maibee o la fiar hau nia liafuan. Nee duni komesa agora o sei la koalia tan too labarik nee moris. Tanba too tempu nebee Maromak desidi, buat sira nee sei sai duni.”

21 Ema barak nebee halo hela orasaun iha liur, hein Zacarias atu sai mai. Sira admira tanba nia kleur iha laran. 22 Depois, bainhira nia sai mai, nia la koalia liafuan ida ba sira. Nia halo sinal deit ho liman, maibee koalia la diak. Entaun sira kompriende katak, Maromak hatudu sinal ruma ba nia iha uma kreda laran.

23 Too nia tempu servisu iha uma kreda boot hotu ona, Zacarias fila ba uma. 24 La kleur nia kaben Isabel isin rua. Durante fulan lima, Isabel hela deit iha uma laran. 25 Nia dehan, “Nai Maromak mak halo ida nee mai hau. Nia hatudu Nia laran diak mai hau, para ema ida la bele hamoe tan hau.”

Anju foo hatene Nai Jesus nia moris ba Maria

26 Bainhira Isabel isin rua fulan neen ona, Maromak haruka anju Gabriel baa iha aldeia Nazaré iha provinsia Galileia 27 hodi hasoru feto raan ida naran Maria. Menina nee troka prenda ona ho mane ida naran José, husi liurai David nia jerasaun.[f] 28 Entaun anju Gabriel baa hasoru Maria hodi kumprimenta nia dehan, “Maria, Nai Maromak foo bensaun boot ba o, i Nia hamutuk ho o.”

29 Rona nunee, Maria sai bilaan tiha hodi hanoin, liafuan nee dehan saida loos. 30 Maibee anju hatutan tan dehan, “Maria, keta tauk! Tanba Maromak nia domin ba o boot teb-tebes. 31 La kleur tan, o sei isin rua, i sei tuur ahi, oan mane ida. O tenki tau Nia naran Jesus.†Naran Jesus ho lian Ebreu dehanYeshua; nee katak “Nai Maromak salva ema”. Haree mos Mateus 1:21.

32 Nia sei sai boot teb-tebes.

I Maromak Aas Liu sei bolu Nia dehan, ‘Hau nia Oan.’

Nai Maromak sei foti Nia hodi kaer ukun,

hanesan Nia bei-ala liurai David.

33 O nia oan nee mak sei ukun ema Israel tinan ba tinan nafatin.[h]

Nia ukun sei la remata.”[i]

34 Maria husu ba anju, “Oinsaa mak hau bele isin rua? Hau seidauk hola mane.”

35 Anju hataan, “Espiritu Santu sei tuun ba iha o, i Maromak Aas Liu nia kbiit sei hamahon o. Nunee, labarik nebee atu moris mai nee, santu teb-tebes, i ema sei bolu Nia ‘Maromak nia Oan’.

36 Laos nee deit. O nia maluk Isabel mos kous ona, maski nia ferik liu ona. Ema dehan nia la bele hetan oan, maibee agora nia isin rua fulan neen ona. 37 Tanba Maromak bele halo buat hotu-hotu.”[j]

38 Maria hataan, “Hau Nai Maromak nia atan. Hau hein buat hotu-hotu sai tuir ita boot nia liafuan.” Depois anju husik tiha nia.

Maria baa vizita Isabel

39-40 La kleur Maria prepara aan hodi baa lalais iha Zacarias nia uma iha aldeia ida iha foho provinsia Judeia nian. Too iha nebaa, nia tama liu ba uma laran hodi kumprimenta Isabel.

41 Bainhira Isabel rona Maria nia liafuan, bebee iha nia kabun laran book aan kedas. Espiritu Santu domina Isabel, 42 i nia koalia sai ho lian makaas dehan, “Maromak foo bensaun ba o liu feto hotu-hotu, i foo bensaun mos ba o nia Oan nebee atu moris mai. 43 Maromak foo buat diak liu mai hau, too hau nia Nai nia inan mai vizita hau! 44 Bainhira hau rona anoi kumprimenta hau, labarik iha hau nia kabun laran book aan kedas tanba haksolok. 45 Nai Maromak foo bensaun ba o, tanba o fiar katak buat nebee Nia promete ona ba o, sei akontese duni.”

Maria hahii Nai Maromak

46 Maria dehan,

“Ho hau nia laran tomak

hau hahii Nai Maromak!

47 Hau nia laran haksolok,

tanba Maromak hau nia Salvador.

48 Nia tau matan mai hau,

Ninia atan kiik ida.

Komesa agora ba oin, ema hotu sei konsidera hau

nudar ema ida nebee simu bensaun boot husi Maromak,[k]

49 tanba Maromak Forsa Teb-tebes

halo ona buat furak mai hau.

Nia naran santu.

50 Maromak sempre hatudu laran luak ba ema hotu nebee respeita i adora Nia,

husi jerasaun ba jerasaun.

51 Nia hatudu Nia forsa

hodi halo ema nebee foti aan halai namkari.

52 Nia hatuun ukun nain sira husi sira nia kadeira,

maibee Nia foti aas ema nebee haraik aan.[l]

53 Nia foo hahaan mesak di-diak deit ba ema nebee hamlaha, too sira bosu,

maibee Nia haruka ema riku sai ho liman mamuk.

54 Nia tulun Nia atan ema Israel sira,

i sempre hatudu Nia laran luak ba sira.

55 Nunee Maromak halo tuir Nia promesa uluk

ba ita nia avoo Abraão ho nia jerasaun

too tinan ba tinan.”[m]

56 Maria hela ho Isabel durante fulan tolu nia laran, depois fila ba nia uma.

João Sarani Nain moris

57 Bainhira nia tempu too ona, Isabel tuur ahi, oan mane ida. 58 Nia familia ho ema nebee hela besik rona katak, Nai Maromak hatudu ona Nia laran luak ba Isabel, i sira hotu haksolok hamutuk ho nia.

59 Kuandu bebee nee halo ona loron walu, sira halibur malu para sunat nia, tuir ema Judeu nia lisan.[n] Sira atu tau naran ba labarik nee, Zacarias, tuir nia aman nia naran.[o] 60 Maibee nia inan dehan, “La bele! Nia naran mak João.”

61 Sira hataan, “Maibee iha imi nia familia tomak la iha ema ida mak naran João.” 62 Entaun sira foo sinal ba Zacarias para buka hatene, nia hakarak foo naran saida.

63 Depois Zacarias halo sinal husu ai kabelak oan ida hodi hakerek. I nia hakerek dehan, “Nia naran João.” Sira hotu admira. 64 Iha momentu nee kedas, Zacarias bele koalia fali, i nia komesa hahii Maromak. 65 Ema nebee hela besik, sira hotu tauk ho admira. Iha foho-foho provinsia Judeia nian, ema hotu-hotu koalia kona ba buat nee. 66 I see-see deit mak rona, hanoin dehan, “Aban-bainrua labarik nee sei sai saida loos?” Tanba sira hatene katak Nai Maromak nia kbiit iha nia.

Zacarias hahii Nai Maromak

67 Depois Espiritu Santu domina João nia aman Zacarias, i nia foo tutan Maromak nia lia menon nunee:

68 “Hahii Maromak, ema Israel nia Nai!

Tanba Nia mai ona para foo liberdade ba Nia povu.

69 Maromak foti ona Ema ida husi Nia atan David nia jerasaun.[p]

Ema nee nia kbiit boot teb-tebes hodi salva ita.

70 Nunee Maromak halo tuir buat nebee Nia promete tiha ona hori uluk

liu husi Nia profeta sira.

71 Ema nee sei salva ita husi ita nia inimigu,

i husi ema hotu-hotu nebee odi ita.

72 Maromak halo nunee para hatudu Nia laran luak ba ita nia bei-ala sira

hodi kumpri Nia promesa ba sira.

73 Uluk Nia jura ba ita nia avoo Abraão katak,

74 Nia sei hasai ita husi ita nia inimigu sira nia liman laran,

atu ita la tauk tan hodi serbi Nia,

75 i bele moris loos ho laran moos iha Nia oin

durante ita nia vida tomak.”

76 Depois Zacarias hatete ba nia oan,

“Hau nia oan, ema sei bolu o Maromak Aas Liu nia profeta.

O sei baa uluk hodi prepara povu atu simu sira nia Nai mai.[q]

77 O sei foo hatene ba Maromak nia povu dehan,

Maromak sei hamoos sira nia sala hodi salva sira,

78 tanba ita nia Maromak nee laran luak teb-tebes.

Nunee loro matan sei sae, lori naroman husi lalehan tuun mai ita

79 hodi leno ema nebee moris iha nakukun laran

ho ema nebee tauk mate,

hodi lori ita ba dalan dame nian.”[r]

80 Loron ba loron, João boot ba dadauk, i nia espiritu mos forti ba beibeik. Depois nia baa hela iha rai fuik maran too tempu nebee nia hahuu nia servisu iha ema Israel sira nia leet.

Lucas 2 ->