Evanjelhu

João

Nai Jesus mak foo konhese Nai Maromak ba ita

1 Hori uluk liu, lalehan ho rai seidauk iha,

Ida nebee hanaran Liafuan iha nanis ona.[a]

Nia hamutuk ho Maromak,

i Nia Maromak duni.

2 Nia hamutuk ho Maromak

hori uluk kedas.

3 Maromak foo fiar ba Nia

hodi halo lalehan ho rai.

Se Nia la halo karik,

buat hotu-hotu la iha.

4 Nia mak moris nia huun,

i Nia moris nee foo naroman ba ita ema.

5 Naroman nee leno iha nakukun laran,

i nakukun la iha forsa atu hamate Naroman nee.

6 Iha loron ida, Maromak haruka ema ida mai,

nia naran João.[b]

7 Nia mai atu foo sasin kona ba Naroman nee,

atu ema hotu-hotu bele fiar liu husi nia sasin.

8 João rasik laos Naroman nee,

nia so mai atu foo sasin deit kona ba Naroman nee.

9 Iha tempu nebaa Naroman nee atu mai ona iha mundu.

Nia mak Naroman lo-loos nebee leno ema hotu nia moris.

10 Hori uluk kedas Maromak foo fiar ba Nia

mak halo mundu.

Nia iha mundu nanis,

maibee ema iha mundu la hatene Nia.

11 Nia mai iha Nia rain rasik,

maibee Nia maluk rasik lakohi simu Nia.

12 Maski nunee ema hotu nebee simu Nia i fiar ba Nia,

Nia foo direitu ba sira hodi sai Maromak nia oan.

13 Sira sai Maromak nia oan nee laos tanba moris husi ema,

i laos liu husi feen-laen nia hakarak atu hetan oan,

maibee Maromak rasik mak foo moris ba sira.

14 Ida nebee hanaran Liafuan nee nakfilak ba ema,

i hela iha ita nia klaran durante tempu badak.

Ita haree tiha ona Nia kbiit boot

nudar Maromak nia Oan mane mesak.

Nia mai husi Maromak,

Nia laran diak nunka hotu

i Nia koalia sempre loos.

15 João foo sasin ho lian makaas kona ba Ema nee dehan, “Nia nee mak uluk hau dehan tiha ona, ‘Iha Ema ida sei mai. Maski hau mak mai uluk maibee Nia boot liu hau, tanba molok hau moris mai, Nia iha nanis tiha ona.’ ”

16 Husi Nia laran diak teb-tebes mak ita hotu hetan bensaun fila-fila. 17 Tanba Maromak foo Nia lei liu husi Moisés, maibee Nia laran diak ho lia loos ita hetan liu husi Jesus Kristu. 18 La iha ema ida mak haree ona Maromak. Maibee Maromak nia Oan mane mesak mak hela iha Aman Maromak nia sorin, i Nia mak foo konhese Maromak ba ita.

João Sarani Nain prepara dalan ba Nai Jesus

(Mateus 3:1-12; Marcos 1:1-8; Lucas 3:1-18)

19 Iha loron ida, nai ulun Judeu sira iha Jerusalém haruka nai lulik ho ema Levi balu ba iha João hodi husu dehan, “Ita boot nee see?”

João hataan kona ba nia aan, 20 nia la bosok, maibee foo sai mo-moos dehan, “Hau laos Mesias, Salvador nebee Maromak atu haruka mai.”

21 Sira husu tan dehan, “Se nunee ita boot see loos? Ita boot mak Maromak nia profeta Elias ka?”

João hataan nafatin, “Lae.”

Sira husu tan, “Ita boot nee Profeta nebee mak ami hein hela ka?”[c]

João hataan, “Lae.”

22 Too ikus sira husu, “Entaun ita boot nee see? Hatete mai ami kona ba ita boot nia aan atu nunee ami bele foo hatene fali ba ema nebee mak haruka ami mai.”

23 João hataan tuir liafuan nebee profeta Isaias uluk foo sai tiha ona dehan, “Hau nee ema ida nebee foo sai ho lian makaas iha rai fuik maran dehan, ‘Hadia dalan nebee kleuk para simu ita nia Nai mai.’ ”[d]

24 Iha mos ema Farizeu balu nebee nai ulun Judeu sira haruka mai. 25 Sira husu ba João, “Se ita boot laos Mesias, laos profeta Elias, i laos Profeta nebee ami hein hela, entaun nusaa mak ita boot foo sarani ema?”

26 João hataan, “Hau foo sarani hodi bee deit, maibee iha Ema ida iha imi nia klaran, imi la konhese Nia. 27 Maski hau mak mai uluk, maibee atu kore deit Nia sandalias talin mos, hau la serve.”

28 Buat sira nee hotu akontese iha rai Betánia, iha mota Jordaun nia sorin ba, iha fatin nebee João foo sarani ema.

Nai Jesus mak Maromak nia Bibi Oan

29 Aban fali João haree Jesus lao mai, i nia dehan, “Haree ba! Maromak nia Bibi Oan nebee hasai mundu nia sala, Nia mak nee. 30 Hau foo sai tiha ona kona ba Nia dehan, ‘Iha Ema ida sei mai. Maski hau mak mai uluk maibee Nia boot liu hau, tanba molok hau moris mai, Nia iha nanis tiha ona.’ 31 Uluk hau rasik la hatene Nia nee see loos. Maibee hau mai foo sarani ema hodi bee atu povu Israel bele konhese Nia.”

32 Depois João foo sasin hanesan nee: “Iha loron ida hau haree Maromak nia Espiritu tuun mai husi lalehan hanesan manu pombu, i hela iha Ema nee. 33 Uluk hau la hatene Nia nee see loos. Maibee Maromak haruka hau foo sarani hodi bee, i Nia hatete nanis mai hau dehan, ‘O sei haree Espiritu Santu tuun mai hela iha Ema ida. Ema nee mak sei foo sarani hodi Espiritu Santu.’ Husi nee mak foin hau konhese lo-loos Nia. 34 Hau haree ho matan rasik, nunee hau foo sasin katak Nia nee Maromak nia Oan.”

Nai Jesus nia eskolante primeiru

35 Iha loron tuir mai João ho nia eskolante nain rua iha fali fatin nee. 36 Bainhira nia haree Jesus lao liu, nia dehan, “Haree ba! Maromak nia Bibi Oan mak nee!”

37 Rona nunee, João nia eskolante nain rua nee baa tuir kedas Jesus. 38 Jesus hateke ba kotuk, haree sira nain rua tuir hela Nia. I Nia husu sira, “Imi buka saida?”

Sira hataan, “Rabi, Ita Boot hela iha nebee?” (Liafuan rabi dehan “mestri”.)

39 Jesus hataan, “Mai haree rasik.” Nunee sira baa hamutuk ho Jesus, i haree Nia hela fatin. Iha loron nee tuku haat lokraik ona, entaun sira hela ho Nia too kalan.

40 Eskolante nain rua nebee rona João nia liafuan hodi tuir Jesus, ida mak André, Simão Pedro nia alin. 41 André baa kedas buka nia maun Simão hodi hatete ba nia, “Ami hetan ona Mesias!” (Mesias katak “Kristu”, Salvador nebee Maromak atu haruka mai.) 42 Depois André lori nia maun ba Jesus.

Jesus hateke ba Simão hodi dehan, “O nee Simão, João nia oan. Ema sei bolu o Cefas.” (Cefas katak “Pedro” ka “fatuk isin”.)

Nai Jesus bolu Filipe ho Natanael

43 Aban fali Jesus desidi atu baa iha provinsia Galileia. Nia hasoru Filipe, i dehan, “Mai tuir Hau.” 44 Filipe nee husi aldeia Betsaida, Pedro ho André mos husi nebaa.

45 Depois Filipe hetan Natanael hodi dehan, “Ami hetan tiha ona Ema nebee mak Moisés foo sai iha Maromak nia lei, profeta sira seluk mos hakerek kona ba Ema nee. Nia nee Jesus husi aldeia Nazaré, José nia oan.”

46 Natanael hataan, “Buat diak ida hanesan nee bele mosu fali husi Nazaré ka?”

Filipe dehan, “Mai haree rasik.”

47 Bainhira Jesus haree Natanael lao dadauk mai, Nia koalia kona ba Natanael dehan, “Ema nee Israel isin, nia la hatene bosok.”

48 Natanael husu ba Jesus, “Oinsaa mak Ita Boot bele konhese hau?”

Jesus hataan, “Molok Filipe bolu o mai, Hau haree tiha ona o iha ai figeira huun.”

49 Depois Natanael foo sai dehan, “Mestri, Ita Boot mak Maromak nia Oan. Ita Boot nee ema Israel sira nia Liurai.”

50 Jesus dehan, “O fiar tanba Hau foo sai katak Hau haree o iha ai figeira huun ka? O sei haree buat makaas liu fali ida nee.”

51 Depois Jesus hatutan tan, “Hau dehan lo-loos ba imi. Imi sei haree lalehan nakloke i Maromak nia anju sira sae-tuun mai iha Hau, Ema Umanu nia Oan.”[e]

João 2 ->