1-2 Ami hanoin teb-tebes imi, too ikus ami la aguenta tan ona. Nunee ami desidi haruka ita nia maluk Timóteo baa haree imi, ami hela deit iha sidade Atenas. Timóteo nee servisu hamutuk ho ami hodi foo sai Liafuan Diak kona ba Kristu. Ami haruka nia baa atu hametin imi nia laran i foo korajen ba imi atu imi fiar metin nafatin ba Kristu,✡Apostolu sira nia Istoria 17:15 3 para imi la bele nakdoko bainhira ema halo terus imi. Imi hatene mo-moos katak ita tenki hetan terus hanesan nee. 4 Tanba uluk bainhira ami hamutuk ho imi, ami foo hatene fila-fila ona katak ita sei hetan terus tanba ita nia fiar. Imi rasik hatene, sai nunee duni. 5 Nee mak hau tauk, keta halo be diabu tentador konsege intenta imi atu fila kotuk ba Kristu. Se nunee, servisu boot nebee uluk ami halo nee saugati deit. Tanba nee, bainhira hau la aguenta tan ona, hau haruka Timóteo ba iha imi hodi buka hatene, imi sei fiar nafatin ba Kristu ka lae.

6 Agora Timóteo fila fali ona husi nebaa. Nia konta mai ami dehan, imi fiar nafatin ba Kristu i hadomi malu nafatin. Ida nee halo ami kontenti. Nia mos dehan, imi sempre hanoin ami ho kontenti, i imi hakarak teb-tebes atu hasoru ami, hanesan mos ami hakarak hasoru imi.✡Apostolu sira nia Istoria 18:5

7 Nee duni maun-alin sira, maski ami hetan terus ho susar oi-oin, maibee bainhira ami rona katak imi fiar metin nafatin ba Kristu, nee halo ami nia laran kamaan tiha. 8 Agora ami senti moris fila fali tanba imi hamriik metin nafatin ho Nai Jesus.

9 Imi halo ami haksolok teb-tebes iha Maromak nia oin, too la hatene oinsaa atu foo agradese ba Nia! 10 Loron-kalan ami halo orasaun ba Maromak ho laran tomak, atu ami bele hasoru malu fali ho imi hodi hanorin buat nebee mak imi sei presiza para hametin imi nia fiar.

11 Ami harohan ba ita nia Aman Maromak ho ita nia Nai Jesus, atu loke dalan para ami baa hasoru tan imi. 12 Ami husu ba Nai Jesus atu tulun imi para hadomi malu liu tan i haboot mos imi nia domin ba ema hotu-hotu, hanesan ami hadomi imi. 13 Ami husu para Ita nia Nai Jesus hametin imi nia laran. Nunee bainhira Nai Jesus fila fali mai ho Nia povu hotu-hotu,*Iha nee Paulo hakerek dehan, Nai Jesus fila fali mai ho Nia “santu sira”. La klaru, Paulo koalia kona ba Nai Jesus nia povu ka koalia kona ba anju. imi bele laran moos i livre husi sala iha ita nia Aman Maromak nia oin.

<- 1 Tesalónika 21 Tesalónika 4 ->