1 Yahweh Pakai hi leng ahi! Chitin namtin kithing thingjeng hen! Ama Cherub teni kikah a laltouna a atouvin ahi. Vannoi leiset pumpi kithing hen.

2 Yahweh Pakai chu Jerusalem ah loupitah in atouvin ahi. Chitin namtin ho jouse chung vum a dopsang'in aum'e.

3 ama hon namin gimneitah chu thangvah uhen, naminhi athenge!

4 Lengloupi thudih ngailua, nangin thildih hi nadomsang'in, thudih in kal nasong'in Israel lah-a thudih nachelhah sah'in ahi.

5 Yahweh Pakai I-Pathen'u Pathen hi dopsangin umhen! A-angsung'ah bohkhup un, ajeh chu Ama hi atheng ahi.

6 Mose le Aaron jongchu thempu ahilhon e, Samuel injong Amin anakouve. Ama hon Yahweh Pakai kom'ah panpi ngaichan anakouvun ahi, chuleh Aman anahouvin ahi.

7 Aman meilom lah a kon'in Israel ho lah-a thu anasei in, ama hon Yahweh Pakaiyin apeh-u Dan le thupeh ho chu anajui un ahi.

8 O Yahweh Pakai ka Pathen'u Pathen! nangin amaho nana donbut in ahi. Nangma hi amaho ding a mi ngaidam jing Pathen Pathen nahi, ahinla amaho achekhel tengu leh nagim boljin ahi.

9 Yahweh Pakai, I-Pathen'u Pathen hi domsang'un chuleh Jerusalem a moltheng achun chibai boh'un ajeh chu Yahweh Pakai, I-Pathen'u Pathen hi atheng ahi.

<- La Bu 98La Bu 100 ->