JUDE

JUDE LEKHA THOT

Tahsanjal'a pandet ding

Agilou atamcheh cheh jongleh Pathen in natuh jinge tigeldoh in

Jude lekhabu sung thu umdan

Jude lekhathot hi lhagao lam thudol-a kichihtheina dinga Christian ho kihilchahna ahi. Kichihtheina neilou ho dinga ichangeiya lhagao lam settona ahitadem? Hijeh chun, hiche lekhathot hi phatah'a igelkhohdiu chule asunga thu kisun thuchomcha hi kihetmosah ahilouleh donlouva koi-igotlou diuva pha ahi.

Jude lekhathot hin thutah'a iti idindet-uva chule tahsanna'a iti ipandet diu ham, ti eihil un ahi. Tun hiche lekhathot nasim to kilhon in jong simtha le chun Houbung sunga thuhil lhem ho chu iti douva chule kimaitopi ding ham ti eihil-uve, ti nahetdoh ding ahi. Hiche lekhabu hin Christian hinkho dihtah man na'a Pathen in eithutep ule eitilkhounahou jong akisunin ahi. Hiche hin thuhil dihlou ho iti iki-doupi diujong eihilun ahi. Hitichun achainakeiya Pathen loupina ihinsodohdiu hi alunggon pipen ahi Jde 24; 25.

Lekhathot jihpa chule ajih kum

Jude hi Pakai Yeshua dia tahsalamdol-a asopi ahin, chule Jacob lekhathot jihpa penpi ahi. Hiche lekhathot hi Peter in alekhathot Nina ajihphat toh kithakhat din ginchat aumin, hichu AD 65 sung hidin, ginchat ahi.

Lekhathot ajihna lo

Jude hin thuhillhem hon Christian ho chu thutah'a kon puilamvai get-unte tihi, agelkhohpen ahi. Aman tahsan chatehon atahsan-u chu akihuhbit diu hi deisahna'a ajih ahi.

Chulai phat dinmun

Thuhil dihlou choihon Gospel thu akalea aheijeh-un Houbung sunga boina asodoh uvin ahi. Amahohin, mikhat chu lungset mana huhhing'a aum tengleh itobang hinkho mangjong leh akhohpoi, atiu ahi. Hichun Jude hin tahsan cha khatchun Cain umchan Semtilbu 4:1-25, Balaam umchan Minbu 22:1-24; 25 chule Korah umchan Minbu 16:1-49 ajomlou ding ahetsah in ahi.

1 Hiche lekhathot hi Yeshua Christa soh le Jacob sopipa, Jude a kon ahi. Keiman, nangailu uleh Yeshua Christa venbitna noiya nahongbit jinguvah, Pa Pathen in akouho jouse dinga hiche lekhathot hi kahinjih ahi.✡Matt 13:55; Mk 6:3 2 Pathen in nangho hepina, cham-lungmonna chule ngailutna napeh be jingu hen.

3 Deitah teho, keiman nangho henga eiho jousen chan ineikhom'u huhhingna thudol hi kahinjih got ahi. Hinlah tun keiman achom dang khat, Pathen in amithengte henga khatveiya apehdoh tahsanna a pandet ding thujoh hi jihlouva phamo dan in kagel tai. 4 Hiche kiseilona ajeh hi Pathen ngaisahlou phabep nahoubung sung uvah ahunglut un, Pathen milungsetna kidangtah hin thenlouna hinkho man aphatsah dan'in aseidoh'uvin ahi. Hitobang mi ho themmo channa hi masang apat'a kisun ahitai, ajehchu amahohin Ipipu'u khatseh le IPakaiyu aseilep un ahi. 5 Hijeh a chu, hicheho jouse hi nahetsau hijongleh avel a kageldohsah nomu chu, Pakai chun Israel nam mite chu amasatah in Egypt'a konin ahuhdoh in, hinlah tahsan theitah a umjom louho chu khonungin asumangin ahi.✡Potdohbu 12:51; Minbu 14:29,30 6 Chule Pathen in thuneina ahibep apeh kalvala chon, aumnau mun dalha a potdoh vantil ho chu muthim lah a songkul'a thihkhauva ahen chahkheh a, athutanna niloupini chu ngah a uma ahiu chu keiman kageldoh sah kit nahiuve. 7 Chule Sodom le Gomorrah chule akinaipi khopi ho chu thenlouna jonthanhoina chule numei le pasal kingaichatna phalou dimset ahiuve ti sumil hih un. Hiche khopiho chu meiyin suhmangin aumin, tonsot meidil a Pathen thutanna um dinga gihna ahitai.✡Semtilbu 19:1-24 8 Hitima chun, hiche mi ho–amangmat uva kona thuneitah'a kigel ho hin, thenlouna in hinkho amanguvin, thuneiho anelkal uvin, chule boltheina kidang bol ho jong ajontaiyun ahi. 9 Hinlah Michael, vantil lah'a athanei pen khat, jeng jong chun Diabol chu taitoma houset angampon, hinlah, “Pakaiyin nasamse hen,” tibou aseiye. (Hiche hi Michael'in Mose long chungchanga Diabol toh akinel pet a thilsoh ahi).✡Daniel 10:13,21; 12:1; Rev 12:7; Danbu Ni Na 34:6; Zechariah 3:2 10 Hinlah hiche mihohin ahetchenlouvu thil ho chu nuisat hoh'in aneiyuve. Amaho hi lunggel asuhsah neilou gancha ho bangin, ahinauvin ahinphut dung juiyin amoh bolbol uvin, chuti chun amahotah in amanthahna diu akiloilut jiuve. 11 Amaho hi itobang lunggimnan angau hitam! Ajehchu amahon asopipa thatpa, Cain lampi chu ahotauve. Balaam bangin, miho sum deichatnan alhemlhauve. Chule Korah bangin, doulung aputnauva amah thahlo tauve.✡Semtilbu 4:3-8; Minbu 22:1-35; Minbu 16:1-35 12 Hiche mihotoh hin Pakai ngailutna geldohna a an nehkhom nanei tengu leh, amaho hi twinoiya songpi um tobang, nakong'u kesah thei ahiuve. Amaho hi jachatna neilou kelngoi ching amabou kikhohsah ho ahiuve. Amaho hi leiset chung lama hung kitol lea ahiala go a julhalou meibol tobangbep ahiuve. Amaho hi chavang laiya thingphung, nivei thisa, aga sodohlou ajung geiya kibotdoh tobang ahiuve. 13 Amaho hi twikhanglen kinong husetah tobang, jachat umtah athilsebol'u twiphon kinotkhom banga umho ahiuve. Amahohi ahsi-somleng tobang ahiuvin, tonsot'a themmo changa muthim lhangkhal kihehlah a dinga gotsa ahiuve. 14 Adam'a pat khang sagi lhina a anahing, Enoch chun hiche mite chungchang ah gaothu anaseidoh e. Aman aseiyin, “Ngaiyun! Pakai chu amitheng sim a simjoulou asang sang hotoh ahunguve.✡Semtilbu 5:18,21-24 15 Vannoi mite chungthu tan dinga hung ahi. Aman mitin Pathen ngaisahlouna a athilbol'u le amadouna a jachatsahna dinga athusei dohhouva kona ahetphotsah ding ahi” ati. 16 Hiche mite hi phunchel hat le mi-oimo hat ahiuvin, alung ngaichat u suhbulhitna dinga bou hinga ahiuve. Ama ho hin achungchang thubou ahaseiphong uvin, chule alung ngaichat u akimu theina teiding uvin midang aseiseuvin ahi.

17 Hinlah nangho, kagol ngaitahten, IPakaiyu Yeshua Christa solchah hon ipi anaseiyu nageldoh dingu ahi. 18 Amahon ninunung phattengleh mitaitom hat, ama lung ngaichat phalou suhbulhit ding bouseh ngaito ho, hung um ding ahi tia nanahil'u ahitai.✡2 Pet 3:3 19 Amaho hi nalahuva kitomona hinsemdoh ho ahiuve. Amaho hin alungsunguva Pathen Lhagao aneilou jeh uva amihinau ngaitona lungput chu ajuiyu ahi. 20 Hinlah kagol ngaitahte, nangho natahsannau theng chungnung a chun khat le khat kisadoh un, Lhagao Theng thahatna achun taovun, 21 chule i-Pakaiyu Yeshua Christa, tonsot hinna a napui dingu, mikhotona chu ngahjing un. Hiche lampi a chu nangma hotah Pathen ngailutna a chu bit keiya naumthei diu ahi. 22 Chule nanghon tahsanna a detjoulou ho chunga khotona navetsah dingu ahi. 23 Adangho chu thutanna meikou deujejua konchun loidoh un. Midang ho suhthipna dingin khotona vetsah un, ahin chingtheitah in vetsah un, ahinkhou suboh chonsetnen chu thetbol un.

24 Tun, nangho lhuhna theiya kona nahongbit thei uvah, chule kipana lentah a napuilut theiyuvah, Aloupina angsunga themmona neokhat jengjong umlouva nakoitheiyu, Pathen chu loupina jouse chang hen. 25 I-Pakaiyu Yeshua Christa a kona eihuhhingpau, achangseh'a Pathen hi, Ama a chun loupina jouse umhen. Loupina jabolna, thaneina le thuneina jouse chu, phat jouse masanga, chule tupet'a, chule phat hung lhung ding ho jouse geiyin Ama a hijing hen! Amen.