PETER
PETER LEKHA THOT KHATNA
Hahsat na ahunglhun leh ipi iti ding
Nangma lengcha nahi! Hiti chun lunglhah bol hih in!
1 Peter lekhabu sung thu umdan
Hahsatna ahunglhun teng ipia kinepna naneiji em? Hahsatnan naphah tengleh hoiya chu thahatna nakimuji em? Hahsat nan nahin chup teng ipin tahsan na'a na khantou sah theiyem? Pakai Yeshua jal'a chu nangma Pathena nahitai. Pathen deilhen, thempu, namtheng chule Pathena chu nahi ahitai 1 Pet 2:9. Chuti ahileh hahsatnan nahin phahteng ikati ding hitam, tia nalung dong em? Pathen in hahsatna ho chu nangma hatsahna dinga amanchah theile, amanchah ji ahi. Tahsan hi hahsat thoh'a kisuthenga Pakai muchet theina le Ama hetbe chehna neitheina ahi. Hinlah Peter in hiche aseiya hi angah jeng ahipoi. Hahsatna thohpum'a Pakaiya dinga kilomtah ihinauva, midang chu Pathen phatna vetsah ding ahi, ajeh chu Aman muthim thaneina'a kon avah loupitah-a eipuilut'u ahitai 1 Pet 2:9.
Lekhathot jihpa, ajih kum chule ajih lona ajeh
Hiche lekhathot hi Pakai Yeshua seijui somle ni lah'a apipu pen, Peter hin AD 63 kum don'a chu anajih ahi. Chule Peter hin Rome khopia kon'a tahsan chate kithecheh ho Asia Minor gamkai, tua Turkey tia kihe, mun'a umho henga athot ahi. Christian hahsatna toh'a gimbol hesohna thoh ho, Pathen in einungsun hitam? tia lungdong ho tilkhouna'a ajih ahi. Aman gimhesoh thohna jenga jong kinepna hinkho aman diu leh hinlona jeh akimudoh diu deisahpeh jeh-a amaho tilkhouna'a ajih ahi.
Pathen tohgon thusim umdan
Apatna lam'a Rome solkal hin Judate le Christian hohi hou chamlhatna anapeh gel ahiuve. Hinlah Judate le Christian kikah a kitomona ahung umbe cheh cheh phat in, Christian ho hetkhelna ahinnei pan kit tauve. Ijeh iham itileh gamsunga kitomona hin Rome solkal dingin lenggam nom'a kivaipohna asuboiye atiu ahi. Hiti chun Christian chonna hohin midangto kibahlouna asodoh e, ti jeh in dangdatna, engbolna, matna chule anei agouhou lahpehna geiyin ahin bolse tauve. Mi phabep chu atahsan nauva alung linglau tauvin, Peter jeng jong chu avoh uva chule atahsan thudol-a songkul'a khum anahitai. Hijeh chun Peter hin thohhahsa thohpum'a tahsan le kinepna neija hin ding ahi, tithua tilkhouna'a ajih ahi.

Salam thu

1 Hiche lekhathot hi Yeshua Christa solchah Peter a kon ahi. Keiman Pathen lhendoh mite gamchom mi dinmun a, Pontus, Galatia, Cappadocia, Asia chule Bithynia gamkai hoa cheng ho henga kajih ahi. 2 Pa Pathen in nanahet uva chule masang peh a nalhendoh uva, chule a Lhagaovin nasuhtheng u ahitai. Hichea kona chu nanghon asei na ngaiyuva chule Yeshua Christa thisan a nasop thengu ahitai. Pathen in lungsetna le cham-lungmon napeh be be jengtau hen.

Kinepna hing jing

3 I-Pakaiyu Yeshua Christa Pa Pathen ah vahchoina jouse umjing tahen. Ama milungsetna let jeh'a eiho pengthah a ihiu hi Pathen in Yeshua Christa chu athilah a kona akai thou jal jeh ahi. 4 Chule eihon gou simjou lou loding ineiyui-gouchan ding chu vana nangho dinga kikoiya ahi. 5 Chule natahsan jaluva chu, Pathen in athahat'a hiche huhhingna hi nakisan kahseuva na honbit uva, mi jousen amutheina dinguva ni nununga hung kilang ding ahi. 6 Hijehchun kipah tahbeh un. Nanghon phat chomkhat a dinga patepna hahsa tampi nathoh dingu ahivangin, kipana kidangtah namasanguvah aume. 7 Hiche patepna ho hin natahsanu chu akicheh monge ti avetsah ding ahi. Meiyin apatep banga natahsan u chu patep'a uma ahin chule sana maimai sanga natahsan nau mantamjo ahivanga, sana kilhantheng banga natahsan u chu kipatep'ah ahi. Hijeh a chu natahsan u chun patepna tintang ato jouva hattah a aum den a ahileh, Yeshua Christa chu vannoi pumpia akiphondoh teng chuleh nangho dinga vahchoina le loupina chule jabolna tamtah ahin lhutding ahitai. 8 Ama namu khah louvang uvin nangailu uve. Tuhin Ama namu loulai vanguvin, Ama natahsan tauve; chule nangho kipana loupitah phondoh theihoi hilou chun nakipah tauve. 9 Ama natahsan jeh uva ahung sohdoh chu na lhagaovu huhhing channa ahung hitai. 10 Hiche huhhingna thudol, lungset man'a huhhingna nangho dinga kigong chu ahi, themgao hon gaova anasei laiyuva ahetchet nom'u chu. 11 Amahon itih phat a ahilouleh itih a asunguva um Christa Lhagao chun Christa gimthohna le khonunga Aloupina kidangtah thudol chu akihou piuva, anaseipeh masah u ham ti chu adatmo uvin ahi. 12 Amaho chu athupohhou amahoa dinga hilouvin, nanghoa ding joh ahi ti seipeh anahiuve. Chule hiche Kipana Thuphahi nangho koma Vana kona Lhagao Theng thahatna'a seiphonga pang ho chun ahin phondoh u ahitai. Hiche hi akidanna kit chu vantil tenjong lung gutten a hicheho hi avetvet'u ahi.

Hinkho thenga hinna dinga kouna

13 Hijeh chun, phatechan gelun chule kitim themun. Yeshua chu vannoiya ahung kilah tengleh nachunguva lungsetna huhhingna hung lhung ding chu galdot un. 14 Hiti chun, Pathen thua nungte bangin hinkho mangun. Nalung ngaichat u suhbulhitna dingin masang nahin khouva chun kinungtol kit hih un. Chupet a chu aphajo ding nahet loulaiyu ahi. 15 Hinlah tun, Pathen nadei lhenpau athen tobanga chu nangho jong imalam jousea nathen dingu ahi. 16 Ajeh chu Pathen Thubun, “Keima kathen jeh hin nangho jong thengun,” ati.✡ 17 Chule geldoh uvin, natao nau Vana Pa chun koima lungset tum aneipoi. Aman natoh dung juiyuva nachung thu'u atan ding ahilouleh kipaman napeh dingu ahi. Hitia hi gamsunga kholjin nahi nauva hi Ama jana neiya nagin lhungkei dingu ahi. 18 Ajeh chu nanghon nahe tauve, Pathen in napu napa teuva kona kiloson hinkho panna beiya kona hi lhatdohna man apeh ahitai. Chule hiche lhatna man apeh chu sana ahilouleh dangka thila ahipoi. 19 Chonset bei, nolnabei Pathen kelngoinou, Christa thisan manlutah a chu kilhat nahiuve. 20 Pathen in ama chu vannoi kiphudoh masangpeh a nalhat diuva alhendoh chu, hiche ninununga hi Ama hung kiphongdoh a ahitai. 21 Christa jal'a Pathen nahin tahsanu ahitai. Chule nanghon Pathena natahsan u le nakinep nau chu nangap det'u ahitai, ajeh chu Aman Christa chu thinaa konin akaithouvin chule loupina lentah chu napetauve. 22 Nangho thutah thua nanun phat uva nachonset nauva kona thenga nahi tauve, hijeh a chu tua hi nangho sopi hina a nangho ngailutna dihtah chu nakineito diu ahitai. Nalung gil pum piuvin khat le khat kingailu touvin. 23 Ajeh chu nangho penthahna hi abeiloi ding tuhinkhoa ahipoi. Hinna thah naneiyu hi aitih a umjing ding ahi, ajeh chu hichu Pathen Thuhing jing tonsot'a um jinga kon ahi. 24 Pathen Thubun asei dung juiyin, “Mihemte hi hampa tobangbep ahi, ahoinau jong loujaova pahcha pah tobangbep ahi. Hampa agopjin chule apah chu amolloiji.✡ 25 Hinlah Pakai Thu chu imatih chan'a umjing ding ahi.” Chule hiche thuhi Kipana Thupha nahenguva kiseiphong chu ahi.

1 Peter 2 ->