1 हिन्नाङ येशु जैतून सुरला पुइसोङ। 2 खो जब थरह याङ मोनलाम क्यासि खिमला पुइसोङ, राङ मि पोरो ख्युइ तेहा लेप्सोङ, राङ खो त्येसोङ, राङ हतिबाला छोइ पिन्सोङ। 3 शास्त्रि राङ फरिसिबाबे पतारला थेथेबि पोमुवा झिला ख्योँदु, राङ हतिला उइला लाङसोङ। 4 हतिइ येशुला नाइसोङ, “गुरुज्यु, धि पोमुवा पातार कितितुइना सुसुङा ना। 5 ठिमला मोशायि धि च्वरा पोमुवाला टोउ क्याप नाइरे हुला आदेश च्युतु ख्योए धि भारेला च्हि नाज्याइ?” 6 हिन्नाङ हतिबे खोला छोए तायापला राङ ख्युइ थोला आरोप जुयाप ङ्युइन नारे जु नाइरेलो। येशुयि साला क्हुरकुर क्याइरे झुयि टिसोङ।

7 हिन्नाङ जब ख्होए येशुला ढिन राङ ताताता होतो, हतितुइना ख्युइ लाँरे हतिबाला नाइसोङ, “खि नाङने सु तिक्पा माक्याइबा होए हति राङ धि पोमुला ताङस्युवा टोउ क्योप।” 8 याङ ख्युइ कुरकुर क्याइरे साला झुयि टिसोङ। 9 हिन्नाङ जब हतिबे धि थोइरे, हतितुइना छोम्मुवाने सुरु क्याइरे टिमा थु च्यिच्यि क्याइरे पुइसोङ, राङ येशुला हति पोमु ङ्याबो चिक्पा पोरसोङ, तेहि हति पोमुते ख्युइ धुन्नला लाँरे त्येसोङ।

10 येशुयि हति पोमुला ताइरे नाइसोङ, “ए पोमु हतिबा काँहा पुइसुइ? च्हि सुयाङ ख्योएला ङेबा मापिन्सोए?” 11 हति नाइसोङ, “प्रभु, सुइ याङ मा पिन्सोङ।” येशुयि नाइसोङ, “ङा ख्योएला ङेबा मितेर। कु, याङ तिक्पा माके।”

12 येशुयि याङ हतिबाला नाइसोङ, “ङा संसारयि होए ना। ङाहि च्येच्येला होङान मुन्नाला युङान मानाना, हिन्नाङ हतिला मिजेयि होए खुङान ना।”[a] 13 तेहि फरिसिबे खोला नाइसोङ, “ख्योए खुरि भारेला साछि तेरिन्दु। ख्युइ साछि तेम्बा मिहा।”[b]

14 येशुयि जवाक पिन्सोङ, “ङा ङारि भारेला साछि तेरच्याइ, हिन्नाङ ङाहि साछि तेम्बा ना। ङाला छ्या होतो, ङा काने लेलेबा ना, राङ का ढोयाप ना। हिन्नाङ खेला छ्या मेता ङा काने लेलेबाना, राङ काँहा ढोयाप ना।” 15 खे मि लुलामने ल अल भिन्दु। ङा सुलाङ ल अल भेयापयि लाइ मिकिता। 16 ङाहि ल अल भेयापयि लाइ क्याइना, ङाहि ल अल भेयापयि लाइ तेम्बा मिहा। चिचालानाना ल अल भेयापयि लाइ किङान ङा चिक्पा मेता, हिन्नाङ ङा होतो, राङ ङाला चोँङान आके होतो। 17 खि या ठिमला मि ङाहि साछि तेम्बा हुन नाइरे टिटिबादु।[c] 18 ङाहि भारेला ङा ङाराङ साछि तेरच्याइ, राङ ङाला चोँङानयि आकेयि ङाहि भारेला साछि तेरिन। 19 हतिबे खोला नाइसोङ, “ख्युइ आके काँहा होतो?” येशुयि जवाक पिन्सोङ, “खि न ङाला ङोस्येयिन न ङाहि आकेला। खि ङाला ङो स्येस्येबा हिन ना ता ङाहि आकेला हाङ ङोस्येङान ना।”

20 धि ताम ख्युइ मोनलाम क्यासि खिमला छोइ लोबितुइना आलाइ तुइङान दान तोङानयि धुनला नानाइबा ना। तेहि सुइ याङ खोला मा सुङङा, चिचालानाना येशु भेला तरह लेलेबा मेता।

21 येशुयि याङ हतिबाला नाइसोङ, “ङा ढो छारच्याइ, राङ खि ङाला फेङान ना, खे खिरि तिक्पाला स्यिङान ना। काँहा ङा होतो, खे होङ मि ङ्युइबा।”

22 यहुदि आङकिङानबे नाइसोङ, “धिनि खो राङ रेँ राङला स्योएङान यिनटा कि च्हिरु? चिचालानाना ‘खो काँहा ढुन खे होङ मिङ्युइबा’ नाइरे नेन्दु।”

23 तेहि येशुयि हतिबाला नाइसोङ, “खे हकिना। ङा कोङी ना। खे धि संसारयि ना। ङा दु संसार यि माना। 24 ङाहि खेला नाइरे, ‘खे खेरि तिक्पाला स्यिङान ना, चिचालानाना ङा हति राङ ना नाइरे खि हिछे माक्याइना खिरि तिक्पाला स्यिङान ना।’ ”

25 हतिबे येशुला टिसोङ, “ख्योए सुना?” येशुयि हतिबाला नाइसोङ, “ङा हति राङ ना, काङते ङाहि खेला ताङलाने राङ नेन ताता होतो। 26 ङाहि खि भारेला ल अल भेयाप राङ समलो तोङयाप लेइराङ होतो हिन्नाङ ङाला चोँङान तेम्बा होतो, राङ ख्युइ चाने ङाहि च्हि थोइ संसारला हति ताम राङ नेन।”

27 आकि भारेला येशुयि नानाइबा हिना नाइरे हतिबे हा:माकुवा। 28 हतिचाला येशुयि नाइसोङ, “जब खि मि पिजा याला धेकिन, ङा हति राङ हिना नाइरे हा:कोङान्ना, राङ ङा ङारि आङ यि च्याङ मिकिता हिन्नाङ आकि लालाबि तामतेबा नेन नाइरे ङाला छ्या होतो। 29 ङाला चोँङान ङा ङ्याबो होतो। ख्युइ ङाला चिक्पा पोपोरा मेता चिचालानाना ङा बारतै ख्युइ सम क्याप यि लाइ मात्रा किन।” 30 येशुयि धि ताम नेतुइना ता ङ्यान ङान लेइराङयि ख्युइ थोला हिछे क्याइसोङ।

31 येशुयि खुरि थोला हिछे किङान यहुदिबाला नाइसोङ, “खे ङाहि वचनला त्येना ङाहि तेम्बा लोब्टु ना। 32 तेहि खि तेम्बा च्हि ना नाइरे हा:कोङान ना, राङ तेम्बि खेला मनस्याङ सोङान ना।”

33 हतिबे खोला जवाक पिन्सोङ, “ङे अब्राहामयि ख्युइ ना, राङ ङेला थाल्ला थु सुइयाङ यक्पुवा च्युङदे ताताता मेता। ‘खे मनस्याङ होङान ना’ नाइरे च्हिरु क्याइरे नेन?”[d]

34 येशुयि हतिबाला जवाक पिन्सोङ, “तेम्बारे, ङा खेला नाज्याइ, तिक्पा किङान पोरो तिक्पि यक्पुवा ना। 35 यक्पुवा बारतै खिमला मितोता हिन्नाङ पिजा ते बारतै खिमला तोकिन।[e] 36 हतिचाला पिजि खेला मनस्याङ सोइना खे तेम्बारे मनस्याङ होङान ना। 37 ङाला छ्या होतो, खे अब्राहामयि ख्युइ ना। हिन्नाङ खे ङाला सोच्याइ फाकिन्दु, चिचालानाना ङाहि वचनला खि तेहा त्योएसा मिखुबा। 38 काङकाङ ङाहि ङारि आके होतोला थोथोवा होतो, हति ङा नेन। खे याङ च्हि खि आकेने थोइ, हति किन।” 39 हतिबे खोला नाइसोङ, “ङाहि आके नि आब्रहाम हिना।” येशुयि हतिबाला नाइसोङ, “खे आब्रहमयि मि हिन नाता, अब्राहामयि च्हि लाइ क्याइ हति किङान ना। 40 ङाहि कजसुबाने तेम्बा थोथोइबाते खेला नानाइबा होए, हिन्नाङ थाल्ला खे ङाला सोच्याइ फाकिन्दु। अब्राहाम धि च्वरा लाइ माक्याइबा। 41 खि आकि च्हि लाइ क्याइ खि याङ हति लाइ किन।” हतिबे खोला नाइसोङ, “ङा पातान्नि च्युङदे क्येक्येबा माना! ङाहि आके च्हि राङ होतो, हति कजसुबाना।”

42 येशुयि हतिबाला नाइसोङ, “कजसुबा खि आके हिना ता खि ङाला करि क्यायोङ ना, चिचालानाना ङा कजसुबाने थोथोना ना। ङा ङारि धोप्पि लेलेबा माना, हिन्नाङ ख्हुइ ङाला चाँचाँबा ना। 43 ङाहि नानाइबा खि चिचाला हा:मिकुवा धुइ? चिचालानाना खि ङाहि वचन ङ्यान मिङ्युइबा। 44 खे खिरि आके दियाबलसयि ना, खे खिरि आकि धोप्पा पुरा कियापला ख्युइ च्हि धोप्पा किन हति किन। खो ता ताङलाने राङ मिसोए हिना, राङ तेम्बा ङ्याबो खोला च्याङ मदलब मेता। चिचालानाना हतिला च्याङ तेम्बा मेता। जब खो चुन नेन, हति खुरि बानि च्वरा क्याइरे नेन। चिचालानाना हति चुन ना राङ चुनयि आके ना।[f] 45 ङा तेम्बा नेन, हिन्नाङ खे ङाला हिछे मिकिता। 46 खि नाङने सुइ ङाला तिक्पि दोषि नाङ्युइकिन? तेम्बारे ङा तेम्बा नाना चिचाला खे ङाहि थोला हिछे मिकिता? 47 सु कजसुबाने हुन, हति कजसुबे वचन ङ्यानकिन हिन ज्याइता खे कजसुबाने माना, हतिचाला खे मिङ्याना।”

48 यहुदिबे खोला जवाक पिन्सोङ, “च्हि ङाहि धि नानाइबा तेम्बा मानाइ, कि ख्योए सामरि ना राङ ख्योएला ढे कालदु?” 49 येशुयि जवाक पिन्सोङ, “ङाला ढे क्याकाला मेता, हिन्नाङ ङा ङारि आकि सम्मान किन, राङ खे ङाहि सम्मान किन्दु। 50 हिन्नाङ ङा ङारि छे मिफाता, च्हि होतो सुइ खुरि छे फाकिन राङ ल अल भेयापयि किन। 51 तेम्बारे ङा खेला नाज्याइ, तेम्बारे सुइ ङाहि वचन ङ्यान हति नामयाङ मिसिया।” 52 यहुदिबे खोला नाइसोङ, “ता ङेला छ्या च्युङसोङ, ख्योएला ढे कालदु। अब्राहाम स्यिरे पुइसोङ, ङोन्सेखिलङान याङ स्यिसोङ, हिन्नाङ ख्योए नेन्दु, ‘सु ङाहि वचन ङ्यान हति नामयाङ मिसिया नाइरे।’ 53 च्हि ङाहि ताङबुइ अब्राहामले ख्योए छेया हिनाइ? खो स्यिरे पुइसोङ, तेहि ङोन्सेखिलङान याङ स्यिरे पुइसोङ। ख्योए ते ख्योराङ सु हिना नाइरे दाबि किन?” 54 येशुयि जवाक पिन्सोङ, “तेम्बारे ङा ङारि छे त्येना ङाहि छे तेतेका फान मिहा। ङाहि छे धेङान ङाहि आके होतो, काङला खि ङाहि कजसुबा नेन। 55 खि खोला जब याङ ङोस्येस्येबा मेता, हिन्नाङ ङाहि खोला ङोस्येयिन। ङाहि खोला ङोमिस्येबा नाइना ङा खे च्वरा चुन हुन। हिन्नाङ ङाहि खोला ङोस्येयिन, राङ ख्युइ वचन ङ्यान किन। 56 खि ताङबुइ अब्राहाम ङाहि धि ङिन थोङज्याइला क्याका होतो, राङ ख्युइ थोङसोङ राङ कारे।” 57 हतिचाला यहुदिबे खोला नाइरेलो “ख्योए तरह लो ङोपच्यु माक्योबि, चिला अब्राहामला थोङसोङ नेन?” 58 येशुयि हतिबाला नाइसोङ, “तेम्बारे ङा खेला नाज्याइ, अब्राहामले होङ ज्याइले ताङला राङ ङा होतो।” 59 तेहि हतिबे खोला क्याकच्याइ नाइरे टोउ तुरेलो, हिन्नाङ येशु हिप्ते मोनलाम क्यासि खिमने फिला थोन्दे पुइसोङ।

<- युहान्ना 7युहान्ना 9 ->