1 “तेम्बा अंगुरयि तोङभोङ ङ्याना, राङ ङाहि आके स्यिङयि लाइ किङान ना।” 2 ङाला होएता पोरो ढाला काङयि ढेबु मितेरा हतिला तुप्ते ल सोयाप राङ ढेबु तेरङान पोरो ढालाला हतिले याङ झन मा तेरिन नाइरे झन तुप्ते भे क्याकिन। 3 ङाहि खेला नानाइबि वचनयि खे तेकि राङ चाङमा च्युङ छारते। 4 ङाला त्योए, राङ ङा खेला तोच्याइ। च्हिरु क्याइरे ढाला अंगुरयि तोङभोङला मात्येना हति खुरि ढेबु छ्या मिङ्युइबा, हति च्वरा क्याइरे खे ङाला मात्येना खि याङ ढेबु छ्या मि ङ्युइबा।

5 “अंगुरयि भोटि ङा ना, खे ढालातेबा ना। तेम्बारे सुवाङ ङा ङ्याबो त्येना, राङ ङा हतिला त्येना, हति ढेबु लेइराङ छ्यातु झ्युङान ना चिचालानाना ङाने कुरु ताते खि च्याङ कि मिङ्युइबा।” 6 मि सुवाङ ङाला मा त्येना, हति ढाला च्वरा फिला ढिमङान ना, राङ हति कामछारङान ना। हतिच्वरा ढालातेबा मितेबे थुन राङ मेला झ्युकिन, राङ हति झ्योप छारकिन। 7 खे ङाला त्येना, राङ ङाहि ताम खेला त्येना, खेला च्हि धोप्पा होतो लोँ, राङ हति खि चाला होङान ना। 8 खि लेइराङ ढेबु छ्या च्युक्ते ङाहि लोब्टु हिना नाइरे प्रमाण क्याइना हतिला राङ ङाहि आकि छे तेतेका होङान ना। 9 “आकि च्हिरु क्याइरे ङाला करि क्याइरे, ङाहि याङ खेला करि क्याइरे खे ङाहि करिला त्योए।” 10 तेम्बारे खि ङाहि आदेश खाला ङयान ना खे ङाहि करिला त्योएङान ना, च्हिरु क्याइरे ङाहि आकि आदेश खालाङ्यान्दे, राङ ख्युइ करिला तोकिन।

11 ङाहि धि ताम खेला धि चाला नानाइबा ना, कि ङाहि किप्पो खेला होङ, राङ खि किप्पो पुरा होङ। 12 “ङाहि आदेश धि राङ ना, कि ङाहि खेला च्हिरु क्याइरे करि क्याइरे, खि याङ चिकि चिला हति च्वरा क्याइरे करि कि।”[a] 13 रेँ रुवायि चाला रेँ उ तेरच्याइले छेया करि स्यान सुवाङ मिहा। 14 ङाहि खेला आदेश पिन, हति ख्युइ खाला ङ्यान्ना, खे ङाहि रबो ना। 15 ता ङा खेला योक्पुवा मिना, चिचालानाना ख्युइ ताक्पो च्हि किन ख्युइ हा:मिकुवा। हिन्नाङ ङाहि खेला रबो नानाइबा होए, चिचालानाना च्हि ङाहि आकेने थोइरे, ङाहि हति पोरो खेला स्यास्याता होए। 16 ङाला खि माधामा, हिन्नाङ ङाहि खेला धाम्दे, कि खे क्यु, ढेबु छ्यातु छ्यु, तेहि खि ढेबु छ्याछ्याबा राङ त्योए। हतिचाला आकेला ङाहि मिनला च्हि लाँ, ख्युइ खेला हति तेरङान ना। 17 ङा खेला धि आदेश तेरच्याइ, कि खे चिकि चिला करि कि।

18 “तेम्बारे संसारयि खेला अल किना, खे हा:कुवा कि, कि खेला अल किच्याइले ताङला ङाला अल क्याक्याइबा ना। 19 तेम्बारे खे धि संसारयि हिननाता खेला रेँ मि नाइरे करि क्यायोङ ना। हिन्नाङ खे धि संसारयि माना। खेला संसारने ङाहि धाम्दे, हतिचाला संसारयि खेला अल नेन। 20 ङाहि खेला नानाइबि वचन टाम्बाला पोर, ‘यक्पुवा खिमयि ताक्पोले छेया मिहा।’ हतिबे ङाला तुका पिन्न खेला हाङ तुका तेरङान ना। खि ङाहि वचन खालाङ्यान ना खि वचन याङ खाला ङ्यानङान ना।[b] 21 हिन्नाङ हतिबे धि ताम पोरो ङाहि मिनला खेला किङान ना, चिचालानाना ख्होए ङाला चोँङानला ङोमिस्येबा। 22 ङा मालेबा नाना रेँ राङ हतिबाला मानाइबा झिनाना खे तिक्पि दोषि होङान अर्थात, हिन्नाङ ता खिरि तिक्पा ङ्याबो च्याङ ताम सोयाप मिहा। 23 सुइ ङाला मिका किन हति ङाहि आके लाङ मिका किन। 24 तेम्बारे स्यान सुइयाङ माक्याइबि लाइ ङाहि हतिबे उइला माक्याइबा झि नाना हतिबा तिक्पि दोषि होङान अर्थात। हिन्नाङ ता हतिबे ङा राङ ङाहि आके ङिकारला थोथोवा होतो राङ मिका क्याक्याइबा होतो। 25 हिन्नाङ ठिमला टिटिबि धि वचन पुरा होङयापयि चाला धि च्युच्युवा ना, ‘खि ङाला चुराङडि मिका क्याइसोङ।’ ”[c]

26 “जब टोइकिङान हुन, सुला ङा आकि तर्फने खि तेहा चोङज्याइ, मदलब तेम्बि आत्मा, काङते आकेने हुन, ख्युइ राङ ङाहि भारेला साछि तेरङान ना। 27 खे ताङस्युवाने राङ ङा ङ्याबो होतो ति, खे याङ ङाहि साछि ना।”

<- युहान्ना 14युहान्ना 16 ->