1 पत्रुस राङ युहान्ना ङिम्मु तिन बजे मोनलाम क्यायापयि भेलाला मोनलाम क्यासि खिमला ढुन त्येतु। 2 मोनलाम क्यासि खिमयि नाङला स्युङानतेबा ङ्याबो क्येने राङ ढुडिया लोङमा लोङान मिझि खुरते ख्युहि राङ बारतैला सुन्दर मिन क्याक्याइबि कोना भोरिनलो। 3 पत्रुस, राङ युहान्नाला मोनलाम क्यासि खिमयि नाङला स्युङान थोङदे हति लोङमा लाँसोङ। 4 युहान्ना ङ्याबो पत्रुसयि खोला लाम्मा झि ताइरे नाइसोङ, “ङे यहला तोइ!” 5 हतिबाने चिगा खुयापयि सम क्याइरे हति ध्यान पिन्दे हतिबाला ताइसोङ।

6 तेहि पत्रुसयि नाइसोङ, “सेर राङ ङुल ङाला मेता। हिन्नाङ च्हि ङाला होतो, ङा हति ख्योएला तेर च्याइ। नासरतयि येशु ख्रिष्टयि मिनला क्यु!” 7 ख्युइ हति लाक्पा याइबा यहला सुङदे लाँसोङ, राङ हतितुनाराङ राङ हति काङबातेबा सुङदे राङ छिबाला स्यु लेप्सोङ। 8 तेहि होप्तामेला लाँरे हति लाँसोङ राङ ढुवाला छेलसोङ, राङ ढुन राङ फारकिन राङ कजसुबायि छे धेकिन राङ हतिबा ङ्याबो मोनलाम क्यासि खिमला स्युसोङ। 9 तेहि मि पोरोयि हतिबाला ढुन ताताता राङ कजसुबायि छे तेतेका थोङसोङ। 10 हतिबे खोला मोनलाम क्यासि खिमयि सुन्दर खोला लोङमा लोङदु त्योएङान धि राङ ना नाइरे ङोस्येसोङ, राङ हति थोला च्युच्युङायि तामला हतिबा हा:लाइसोङ राङ होन:तोरसोङ।

11 हति मि पत्रुस राङ युहान्नायि च्येच्येला लेलेबा थोङदे मि पोरो लेइराङ हा:लाइरे सोलोमन मिन क्याक्याबि क्यला हतिबे तेहा स्युरते पुइसोङ। 12 धि थोङदे पत्रुसयि मितेबाला नाइसोङ, “इस्राएलि मिबा, धि तामला खे चिला हा:लाइकिन? अथवा हुरि शक्ति वा भक्तियि लाम्ला हुइ हतिला ढोयाप राङ सोसोइबा च्वरा चिला स्येता च्युक्ते ङेला तेन?” 13 अब्राहाम, इसाहाक राङ याकुबयि कजसुबा, हुइ ताङबुइ मितेबे कजसुबा रेँ स्यापच्यि येशुला छे तेसोङ, सुला ख्युइ सुङदु च्युसोङ, राङ पिलातसयि खोला तोङ च्युइ कितितुइना याङ ख्युइ खोला ख्युइ धुनला राङ मिके नाइसोङ। [a] 14 हिन्नाङ खि पवित्र राङ केवाकिङानयि मिला माना नाइरे मिप स्योए झिला तोङयापयि माग क्याइसोङ।[b] 15 राङ मिजे सोङान मिला ख्युइ स्येसोङ, सुला कजसुबे स्यिस्यियाने सोम्बो सोइरे लाँसोङ, ङे धि साछि होतो। 16 ख्युइ मिनयि थोला क्याक्याइबि हिछेयि राङ ख्युइ मिनयि राङ ख्युइ थोथोङायि राङ ङोस्येस्येबायि धि मिला क्योङबो सोइसोङ। येशुने खुँखुँबि हिछेयि धि मिला खे पोरोयि धुनला टाक्तु च्युसोङ।

17 “ता भाइबा, ङाला छ्या होतो, कि ख्युइ हा:माकुवाला धि च्वरा क्याइसोङ, राङ खि आङकिङानतेबे याङ धि च्वरा राङ क्याइसोङ। 18 ख्युइ ख्रिष्टयि तुका ङ्योङ कोइ हुन नाङान कजसुबायि ङोन्सेखिलङान पोरोयि खाने नानाइबि ङोन्सेखिखिला ख्युइ धि च्वरा क्याइरे पुरा क्याइसोङ। 19 हतिचाला घ्योप्पा कि राङ लक्ते सअ, कि खि तिक्पा झतु छ्यु, राङ कजसुबायि उपस्थितिने किप्पोयि भेला लेबोङ, 20 राङ ख्युइ खि चाला ताङलाने राङ धाधामि ख्रिष्ट, अर्थात येशुला चोङिन। 21 कजसुबायि ताङबुइ भेलाने राङ रेँ पवित्र ङोन्सेखिलङानयि खाने नानाइबि क्यु पोरोयि याङ सोलाइ कियापयि भेला मालेप थु ख्रिष्ट तेङलाला त्योए कोइ राङ हुन। 22 मोशायि नानाइबा धु, ‘परमप्रभु कजसुबायि ङाला लाँलँङा च्वरा खि आज्यो भाइयि उइला ङोन्सेखिलङान झि खि चाला लाँङान ना। ख्युइ खेला चिगाचिगा क्याइ हतिबा ताम पोरो खि ङ्यानकोइ हुन।’ ” 23 धि च्वरा होङान ना, कि हति ङोन्सेखिलङानला मिङ्यान ङान उ होएता मितेबे उइने मासि होङान ना। 24 “शमुएने खेरते हति च्येयि ङोन्सेखिलङान चोमयि नानाइबा होतो, हतिबा पोरोयि धि ङिनयि थाकच्योए क्याक्याइ होतो। 25 खे हति ङोन्सेखिलङानतेबा राङ हति ना क्याक्यालि सन्तन ना, काङ वाचा क्याक्याला कजसुबायि खि ताङबुइ अब्राहाम ङ्याबो जु नाइरे तामसोङ, ‘खि सन्तनला पृथ्‍वीयि पोरो प्येराला च्यिनलाब खुङान ना।’ [c] 26 खे पोरोला रेँ अलने लक्तु च्युक्ते खेला च्यिनलाब तेरतु नाइरे कजसुबायि रेँ स्यापच्यिला लाँसोङ राङ ताङस्युवाला खि तेहा चाँसोङ।”

<- प्रिरेरित 2प्रिरेरित 4 ->