1 छो छोम्मुवायि ढुलयि लाम्ला ङे इटालियाला ढोकोइ हुन नाङान थाकच्योए च्युङ छारते, हतिबे पावल राङ स्यान चोम राङ कैदितेबे क्यालबो अगस्टपासयि सिपाहियि युलियस मिन क्याक्याबि घोबायि जिम्लाला टोएसोङ। 2 एड्रामिटेनोसने एशियायि कुरुकुरु बन्दरगाहतेबा हुन राङ ढोङानयि डुङगाला स्योन्दे ङि ढु;ल सुरु क्याइरे। अरिस्‍तार्खस मिन क्याक्याइबि थेसलोनिकेयि मि झि माकेडोनिया ङे ङ्याबो होत। 3 ङाइटोतेला ङि सिदोनला लङ्गर च्युक्ते। युलियसयि पावलला ङिङच्ये तान्दे हतिबे रुवातेबे तेहा पुते कोइयापयि रुवा खेरयापयि आङ पिन्सोङ। 4 हतिने याङ डुङगा छो छोम्मुवा यहला खेरसोङ, राङ हुरबो छोम्मुवा क्याक्याबाति ङे साइप्रसयि आड खेरते पुइसोङ। 5 किलिकिया राङ पामफिलिया फारकानयि छो छोम्मुवाला क्योप छारते च्येला, ङे लुकियायि भजार माइरामाला क्योपसोङ। 6 हतिया इटालियाला ढोङान अलेक्‍जेन्‍ड्रिया डुङगा झि ठाते घोबायि ङेला हतिला पुलदे।

7 ङिन लेइराङ थु कुलेकुले पुते लेइराङ तुका किङगा क्निडसला क्योपसोङ राङ हुरबो छोम्मुवायि तरह ताङला ढोरु माच्युकाति क्रेटयि आड खेरते ङे सालमोनेयि धुनयि लाम्ला पुते। 8 तुका किनकिन हति नेमु नेमुयि लाम्ला ङे लेबो बन्दरगाह नाङान साला क्योपसोङ। हतिने लासिया भजार धुनला राङ धु।

9 भेला लेइराङ पुइसोङ राङ छो छोम्मुवायि ढुल याङ झिझिरा च्युङ छारतु, ङ्याबो राङ घ्योप्पा कियापयि कालापसोलयि वर्तयि भेला याङ पुइ छाछाराति, पावलयि हतिबाला 10 जु नेन राङ खाइकोए च्युसोङ, “रुवा बा, धि छो छोम्मुवायि ढुलयि मात्रा डुङगा राङ साम्मायि मात्रा माना, हिन्नाङ हु स्हुयि समेत झिझिरा हुन राङ नोए हुन नाङान ङाहि थोङिन्दु।” 11 हिन्नाङ घोबायि पावलयि तामले केना डुङगा चला किङान राङ डुङगालियि ताक्पोला लेइ हिछे क्याइसोङ। 12 धि बन्दरगाह कुङगा बिताइ कियापला सुबिधा मेताति चि क्याइरे याङ फोनिक्सला राङ क्योपते कुङगा बिताइ किकोइ हुन नाइरे लेइराङयि हइने डुङगा चलाइ किकोइ हुन नाइरे टोइ क्याइसोङ। फोनिक्सते क्रेटयि बन्दरगाह झि ना, काङते स्यार नुप राङ लो नुप यहला ललका धु।

13 जब च्याङ हुरबो छोम्मुवा गति ढुवाला छेलसोङ, हतिबे उदेश्य थारका च्युङदे नाइ छारते, लङ्गर तोन्दे हतिबा क्रेटयि नेमुनेमुयि लाम्ला राङ ढुल किताला छेलसोङ। 14 टिझि भेलायि च्येला हति छो छोम्मुवायि उइयि साने हुरबो छोम्मुवा छेयायि वेगाला लो-स्यार नाङानयि हुरबो छोम्मुवा क्यापसोङ। 15 जब डुङगा हुरबो छोम्मुवा छेयायि धुइयापला लेप्सोङ, हति हुरबो छोम्मुवा छेया ङ्याबो माङ्युइसोङ, राङ ङि हतिला काँहा ढोनाङ क्यु नारे ताङदे पोरते। 16 क्‍लौडा नाङान झि टिमा छो छिम्मुवायि उइयि साला क्योप छारते ङि तुका क्याइरे डुङगा छोम्मुवायि डुङगाला क्योप ङ्युइसोङ। 17 हतिला याला ते छारते हतिबे च्युइ चिगा क्याइरे डुङलाला हअ यहला तेमिन राङ ख्योरे, राङ सिरटिस नाङान क्‍लौडा धाबाला छ्युकिन नाङानयि झिटायि हतिबे कुर पापसोङ, राङ डुङगा खोराङ च्यारे खेराला छेलसोङ। 18 ता हुरबुइ ङेला लेइराङ धेकिन राङ तेबाला छेलसोङ, राङ ङाइटोतेला हतिबे डुङगायि सामान ढिमाला छेलसोङ। 19 तेहि ङिमा सुबाला हतिबे रेँ लाक्पि डुङगायि लठारा मिलाइ किताला छेलसोङ। 20 ङिन लेइराङ थु ङिमा, कारमा च्याङ थोङज्याइ माखुसोङ। हुरबो छोम्मुवा छेया लेइराङ मिछ्याता क्याक्याबाति किनकिन ता ङि सोनयापयि आशा याङ मेता च्युङसोङ।

21 ङिन लेइराङ थु हतिबा मिसा त्येतु। तेहि पावल हतिबे तेहा लेप्ते नाइसोङ, “रुवातेबा, खि ङाहि खाइकोए ङ्यान्दे क्रेटने डुङगा चला मिकिता ताता नाना च्युवा ना, राङ धि च्वरा दशा राङ नोए खेला ङ्योङकोइ माच्युङाना। 22 ता ङा नाज्याइ, हिम्मत पोर। खि नाङने सुहुङ मिस्यिया, हिन्नाङ डुङगाते मासि होङान ना। 23 चिचालानाना काङ कजसुबायि ङा ना, राङ सुइ आराधाना ङा किन, ख्युइ लोन खेरङान झि तिरिङ छाम्मु ङा धुनला लाँसोङ। 24 ख्युइ ङाला नाइसोङ, ‘पावल, माझि, ख्योए कैसरयि धुनला लाँकोइ राङ हुन, राङ तोइ, ख्योए ङ्याबो डुङगाला स्योस्योना पोरोयि उ कजसुबायि ङि लाक्पाला टोएसोङ।’ 25 हतिचाला रुवा बा, हिम्मत कि। ङा कजसुबाला हिछे किन, ङा च्हिरु स्यास्याता होए, थारका हति च्वरा राङ किच्याइ। 26 हिन्नाङ हुते रेन छो छोम्मुवायि उइयि सायि नेमुला ढोकोइ राङ हुन।”

27 हिन्नाङ जब छान स्यिबा च्युङदे, राङ एड्रियास छो छोम्मुवाला स्युरे ढुन ताताता होए, तेहि छान फेला माला छोयि मितेबे हु सा झिकि धुनला क्योपलेके धु नाङान अनुमान क्याइसोङ, 28 राङ तिङरिङमुवा नापि क्याइरे तोतितुइना हतिबे ङिस्यु राङ च्युइरु मिटर पत्ता लाइ क्याइसोङ, राङ याङ टिझि फाला पुते तिङ नापि कितुइना हतिबे ङिस्यु राङ टु पत्ता लाइ क्याइसोङ। 29 तेहि चि क्याइना टोउला फहोङ नाङानयि झिटायि, हतिबे डुङगायि क्याप यहने लङ्गर स्यि थाबा टिम्सोङ, राङ नामे होङवार सअ नाइरे मोनलाम क्यापसोङ। 30 जब छोयि मितेबा डुङगाने टोइरे ढुवा फाताला छेलसो, राङ धुन यहला लङ्गर ढिमयापयि बाहानाति डुङगा छोला छारछारतु। 31 तेहि पावलयि घोबा राङ सिपाहितेबाला नाइसोङ, “धि मितेबा डुङगाला मा स्योन्ना खे सोनङान मानाना।” 32 तेहि सिपाहितेबे डुङगायि थाक्पातेबा तुपसोङ, राङ डुङगाला ढोरु च्युसोङ।

33 नाम सिरि भिरि हुवाला छेलसोङ, पावलयि हतिबा पोरोला ङ्योपा सायापयि स्युवा क्यापसोङ। ख्युइ नाइसोङ, “तिरिङयि ङिन च्युपझि च्युङ छारसोङ, खे आच्या माच्या च्युङदे टोपा तोङबा च्याङ मासाइबा त्येसोङ। 34 हतिचाला च्याङ मासा नाइरे ङा ख्योएला स्युवा क्याकच्याइ। चिगा साइना खोला तोप खुङान ना, खि सुइ याङ स्येबु झि याङ मास्यि होङान मानाना।” 35 धि तामबा पोरो नाइ छारते ख्युइ लोटा खेरसोङ, राङ पोरोयि धुनला कजसुबाला कटिनक्याँ नाइछारते सो च्याक्ते साला छेलसोङ। 36 तेहि हतिबाला सम स्यु खुँरे चिगा सायाप साइसोङ। 37 (डुङगाला होएता ङे जम्मा पोरो क्याइरे ङिक्या खलसुम राङ च्युइरु होतो) 38 हतिबा ढ्हाढ्हा थु साइरे, डुङगा या सोयापयि चाला छो छोम्मुवाला ढु टिम्सोङ।

39 साल्बो च्युङ छारते याङ हतिबे हति सा ङोस्ये माङ्युइसोङ, हिन्नाङ हतिबे तोङ झि थोङसोङ। हति बलौटे नेमु झि धु। च्युङना डुङगाला हतिया खोङ च्युइ क्याइसोङ। 40 हतिबे लङ्गरतेबा पापसोङ, राङ छो छोम्मुवाला राङ हति तोतु च्युसोङ। हति भेलाला राङ खोल्लोतेबा तातामायि थाक्पातेबा टोलसोङ। धुनयि कुरतेबा तेक्ते हुरबो छोम्मुवा यहला लसोङ राङ डुङगाला नेमु यहला खेरसोङ। 41 हिन्नाङ छ्युयि हअकि हिहिबि पेमायि धाबाला डुङगा भारतो क्यापते ढो माङ्युइसोङ, तेहि क्यापयि भागते भाल्लापयि स्युटायि तुबुतुबु हुवाला छेलसोङ।

42 कैदितेबा पौडि क्यापते टोइरे पुयोङ नाइबा क्याइरे सिपाहितेबे हतिबाला सोएयापयि टोइ क्याइसोङ। 43 हिन्नाङ घोबायि पावलला क्योपसोम क्याइरे हतिबाला हति च्वरा कियापले काक्ते पोरसोङ। पौडि क्या मिङ्युइङानतेबा ताङला डुङगाने फारते थाङला क्यु नाङानयि आदेश ख्युइ पिन्सोङ, 44 राङ लाँमा लुलुइबाते पालेपला राङ डुङगायि तुभुला फारकानला क्यु नाइसोङ। हति च्वरा क्याइरे पोरो ल क्याइरे नेमुला ढो ङ्युइसोङ।

<- प्रिरेरित 26प्रिरेरित 28 ->